புரட்சியாளர்கள் வன்முறை: நைஜீரியா செல்லும் இந்திய பயணிகளுக்கு அரசு எச்சரிக்கை

அபுஜா, ஜூன் 6-

நைஜீரியா நாட்டில் போகோ ஹாரம் எனப்படும் புரட்சி இஸ்லாமியர்களுக்கும், அரசுக்கும் இடையிலான போராட்டங்கள் தொடர்ந்த வண்ணம் உள்ளன. 2009ம் ஆண்டிலிருந்து தொடரும் கலவரங்களுக்கு, இதுவரை 2,000 பேருக்கு மேல் பலியாகி உள்ளனர்.

நாட்டின் வடகிழக்குப் பகுதியில் உள்ள போர்னோ, யோபே மற்றும் அதமாவா ஆகிய மூன்று மாநிலங்களிலும், கடந்த சில மாதங்களாக இவர்களின் வன்முறை அதிகரித்தது. எனவே, சென்ற மே மாதம் 14 ஆம் தேதி முதல், அந்த மாநிலங்களில் அதிபர் ஜோனாதன் அவசர நிலை உத்தரவைப் பிறப்பித்துள்ளார்.

நைஜீரியாவில் உள்ள இந்திய ஹை கமிஷன், இந்த மூன்று மாநிலங்களுக்கும் வரும் இந்தியப் பயணிகளை தங்களுடைய பிரயாணத்தைத் தள்ளிப் போடும்படி கேட்டுக்கொண்டுள்ளது.

இந்த மாநிலங்களில் தொடர்ந்து தங்கியிருக்க விரும்புவோர், தங்களின் பாதுகாப்பு குறித்து மிகவும் விழிப்புடனும், கவனத்துடனும் இருக்கவேண்டும் என்று ஒரு அறிக்கை வெளியிட்டுள்ளது. வெளியிடங்களுக்குச் செல்லும்போது துணிகர முயற்சிகள் எதிலும் ஈடுபட வேண்டாம். அவ்வாறு செல்ல நேரிட்டால், சாலைகளின் பாதுகாப்பு பற்றி அறிந்தவர்களை உடன் அழைத்துச் செல்லவேண்டும் என்றும் அந்த அறிக்கையில் அறிவுறுத்தப்பட்டுள்ளது.

இரவு நேரங்களில் பயணத்தைத் தவிர்க்க வேண்டும். பாதுகாப்பு அதிகாரிகள் சோதனை இடும்போது உதவிடும் வகையில் அடையாள ஆவணங்களை உடன் வைத்திருக்கவேண்டும். நண்பர்கள், பக்கத்து வீட்டினர், காவல்துறை மற்றும் ஹை கமிஷனின் தொலைபேசி எண்களை கையில் வைத்திருக்க வேண்டும். தேவையான பொருட்கள், உணவுப்பொருட்கள், தண்ணீர், மருந்துகள் போன்றவற்றையும் கையிருப்பில் வைத்திருக்க வேண்டும் என்று அந்த அறிக்கையில் விளக்கமளிக்கப்பட்டுள்ளது.

இதுதவிர, நைஜீரியா நட்பு நாடு என்ற எண்ணத்தைப் பிரதிபலிக்கும்படி இந்தியர்கள் நடந்துகொள்ள வேண்டும் என்றும் ஹை கமிஷன் கேட்டுக்கொண்டுள்ளது.

கடல் கொள்ளையர்களின் ஆக்கிரமிப்பு அதிகமாகி வருவதால், கினியா வளைகுடாவில் பயணம் செய்யும் இந்திய மாலுமிகளும் எச்சரிக்கப்பட்டு வருகின்றனர்.