“குளோனிங்’ முறையில் பிரம்மாண்ட மிருகம்

சைபீரியா மிகவும் குளிர்ந்த பிரதேசம். மைனஸ் 40 டிகிரி கூட இங்கு அதிசயமல்ல. இதன் தீவிரத்தை உணர்ந்து ஜெர்மானிய சர்வாதிகாரியான ஹிட்லர் செயல்படாததால்தான். அவரால் ரஷியாவை வெற்றி கொள்ள முடியவில்லை. இது ஒருபுறம் இருக்கட்டும்.
-
இந்தக் கடுங்குளிர் பிரதேசத்தில் பல்லாயிரக்கணக்கான ஆண்டுகளுக்கு முன்பு “மம்மோத்’ என்று அழைக்கப்படும் மிகப்பெரிய யானைகள் இருந்தன. இவற்றின் தந்தங்கள் நீண்டு மேல்நோக்கி வளைந்து இருக்கும். உடலில், குளிரைத் தாங்கும் அளவுக்கு ரோமம் காணப்படும். அவ்வப்போது பனிப் பாறையில் இவை புதையுண்டது கண்டறியப்பட்டது.
-
இப்போது 10000 - 15000 ஆண்டுகளுக்கு முன்பு இருந்த அம்மாதிரியான பெண் யானையின் சடலம் ஆர்க்டிக் பிரதேசத்தில் கண்டறியப்பட்டுள்ளது. இதில் வியப்புக்குரிய விஷயம் என்னவென்றால், இதன் சடலத்தில் உள்ள ரத்தம் உறையாத நிலையில் உள்ளது.
-
இந்த ரத்தம் மிகவும் கருமையான நிறத்தில் இந்த யானையின் வயிற்றில் காணப்பட்டது. இந்த ரத்தம் உள்ள இடத்தில் ஒரு குச்சியால் குத்தியபோது இந்த ரத்தமானது திரவ நிலையில் வெளிவரத் தொடங்கியது.
-
இதைப்பற்றி, இம்மாதிரி சரித்திரகாலத்திற்கு முற்பட்ட பெரிய யானைகளை வைத்துள்ள அருங்காட்சியகத்தின் தலைவரான செமியோன கிரோகிரிவ் சொல்வது என்னவென்றால், திரவநிலையிலான ரத்தத்தைக் கொண்டு இம்மாதிரியான ரோமங்களடர்ந்த மிகப் பெரிய யானை வர்க்கத்தை குளோனிங் முறையில் உருவாக்கலாம் என்பது.
இந்தச் சடலத்தை வெளிக்கொணரும் போது இருந்த உஷ்ணநிலை 7 முதல் 10 டிகிரி செல்சியஸ் ஆக இருந்தது. அதனால் இந்தப் பெரிய யானையின் ரத்தம் உறைநிலையை மாற்றும் ரசாயனத்தைக் கொண்டதாக இருக்கலாம். இதனை மேலும் ஆராய்ச்சி செய்தால் எவ்வாறு இத்தனை ஆயிரக் கணக்கான ஆண்டுகளுக்குப் பிறகும் ரத்தம் உறையாமல் இருக்க முடியகிறது என்பதை கண்டறியலாம் என்கிறார் இவர்.
-
ஆர்க்டிகா, மற்றும் அன்டார்டிகாவில் வாழும் பூச்சியினங்கள் நிலத்திலும் நீரிலும் வாழும் பிராணிகள், மீன்கள் இம்மாதிரியான உயிர்களின் ரத்தத்தில், ரத்தம் உறையாமல் இருக்கும் வேதிப்பொருள் உள்ளது. அதனால்தான் கடுங்குளிரான சமயங்களிலும் இப்பிராணிகளால் உயிர் வாழமுடிகிறது.
-
இந்த மாபெரும் யானையின் உடல் திசுக்களும் நல்ல நிலையில் உள்ளன. இந்த யானையின் மேல்பாகம், தலை, இடது பின்னங்கால் இவை கடினமான எலும்புகளாகி இருக்கின்றன. ஆனால் இதன் உடலின் மற்ற பகுதிகளில் காணப்படும் திசுக்கள் இயற்கையான சிவப்பு நிறத்துடன் புதிய மாமிசம் போல் உள்ளது. காரணம் என்னவெனில், இம்மிருகத்தின் கீழ்ப்பகுதிகள் சுத்தமான உறைபனிக்கட்டிக்குள் புதையுண்டும், மேற்பகுதி வெளியே தெரிந்தவாறும் இருந்தது. இதன் துதிக்கை மிகவும் சிதைந்து நிலையில் தனியாக அறுந்து காணப்பட்டது.
இதன் பற்களைப் பரிசோதித்த விஞ்ஞானிகள் இந்த யானை 50-60 வயதானதாக இருந்திருக்கலாம் என்கிறார்கள். இதன் திரவ உருவமான ரத்தத்தை அப்படியே பாதுகாக்க வேண்டி அதற்கான பிரத்தியேகமான ரசாயனக் கலவை கொண்ட “டெஸ்ட் டியூபில்’ ஆராய்ச்சியாளர்கள் எடுத்து வைத்து மேலும் ஆராய்ச்சி செய்து வருகிறார்கள்.

இந்த செய்தியை படித்தபோது எனக்கு ஒரு பழைய கார்ட்டூன் ஞாபம் வந்தது. இப்படித்தான் துருவப்பிரதேசத்திற்கு ஆராய்ச்சிக்காகச் சென்ற சில விஞ்ஞானிகள் பல்லாயிரம் ஆண்டுகளுக்கு முன்பு வாழ்ந்த “வைக்கிங்’ போர்வீரர் ஒருவரின் சடலத்தை அப்படியே முழுமையான நிலையில் கையில் கோடரி போன்ற ஆயுதங்களுடன் பனிப்பாறையின் உள்ளே இருப்பதை கண்டனர்.
-
அந்தப் பனிப்பாறையை அப்படியே பெயர்த்துத் தமது நாட்டிற்கு விமானமூலமாக எடுத்து வந்து ஆராய்ச்சி சாலையில் அந்தப் பனிக்கட்டிப் பாறையை உருக வைத்து, சாதாரணமான உஷ்ண நிலைக்கு கொண்டு வந்தனர். மிகவும் ஆச்சரியப் படத்தக்க விதத்தில் அந்த வைக்கிங் போர் வீரன் கோடரியை வீசிக்கொண்டு எழுந்து உக்கிரகமாக அனைவரையும் தாக்க ஆரம்பித்தான். பிறகு அவனைக் கொன்று விடுகின்றனர்!
-
அதுபோல இப்போது இனமே முழுவதுமாக அழிந்து போன ஒரு புதிய மிருகத்தை உருவாக்கினால் அதன் பின் விளைவுகள் என்னவாக இருக்கும் என்பதையும் ஊகித்துக் கொண்டுதான் இம்முயற்சியில் ஈடுபட வேண்டும். என்னவோ இப்புதிய முயற்சியில் வெற்றி கண்டால் அதனால் ஏதேனும் தீய விளைவுகள் ஏற்படாமல் இருந்தால் சரிதான்...

- டி.எம்.எஸ்.
நன்றி: மஞ்சரி