பிலிப்பைன்ஸ் புயல்: ஆயிரக்கணக்கானோர் பலியாகி இருக்கலாமென அச்சம்

பிலிப்பைன்ஸ் புயல்: ஆயிரக்கணக்கானோர் பலியாகி இருக்கலாமென அச்சம்
பிலிப்பைன்ஸ் நாட்டை தாக்கிய ஹையான் புயலுக்கு 10 ஆயிரத்துக்கும் மேற்பட்டோர் பலியாகியிருக்கக் கூடும் என அஞ்சப்படுகிறது.

பெரும் சேதத்தை சந்தித்து இருப்பதால் உயிர்ப்பலியை உடனே அறுதியிட்டு சொல்ல முடியவில்லை. இருப்பினும் ஆயிரத்து 200 பேர் இறந்து விட்டதாக மட்டும் அதிகாரப்பூர்வமாக சொல்ல முடியும் என அந்நாட்டு செஞ்சிலுவை சங்க செயலாளர் ஜெனரல் ஜி. விண்டோலிஜ் பங்க் கூறியுள்ளார்.

அவர் மேலும் கூறுகையில், பிலிப்பைன்சின் கடந்தகால வரலாற்றில் இது போன்ற மிக மோசமான புயலை சந்திக்கவில்லை என்றார்.

பிலிப்பைன்சில் தாக்கிய ஹையான் புயல் காரணமாக 315 கி. மீற்றர் வேகத்தில் சூறாவளிக்காற்றுடன் 10 மீற்றர் அளவிற்கு எழுந்த சுனாமி போன்ற கடல் அலைகள் தாக்கியதில் கடற்கரை நகரங்களின் வீடுகளும் பாதிக்கப்பட்டன. மின்சாரம், சாலை போக்குவரத்துகள் முற்றிலும் துண்டிக்கப்பட்டன.

இராணுவம் மற்றும் மீட்புப்படையினர் அனைத்து இடங்களுக்கும் செல்ல முடியாததால் உயிருக்காக பலர் போராடிக் கொண்டிருக்கக் கூடும் என்று அஞ்சப்படுகிறது. 10 இலட்சம் பேர் பாதுகாப்பான இடங்களில் தங்கவைக்கப்பட்டுள்ளனர். பிலிப்பைன்ஸைக் கடந்த வெள்ளிக்கிழமை தாக்கிய ஹையான் புயல் தென் சீனக் கடல் வழியாக வியட்நாம் நோக்கி செல்கிறது. இன்று வியட்நாமில் கரையை கடக்கும் எனக் கூறப்படுகிறது.

தற்போது மீட்பு பணியும் துண்டிக்கப்பட்ட கிராமங்களை மீட்பதிலும்தான் நாங்கள் முழுக்கவனம் செலுத்தி வருகிறோம். உயிரிழந்தோர் எண்ணிக்கை கணக்கெடுக்கப்பட்டு வரகிறது. பாக்லேரபான் நகரமும் லெய்த் தீவும் கடும் பாதிப்பை சந்தித்திருக்கிறது என்று ஜனாதிபதி பெனிக்னோ ஆக்யூனோ தெரிவித்தார். இந்நிலையில் மீட்பு பணிகளுக்கு கப்பல், விமானம் உள்ளிட்டவைகளை அனுப்பி உதவ தயாராக உள்ளதாக அமெரிக்காவின் பாதுகாப்பு தலைமையகமான பெண்டகன் கூறியுள்ளது.

பிலிப்பைன்ஸ் பொலிஸ் உயர் அதிகாரி எல்மா சோரியா கூறும் போது, புயல் தாக்கத்தினால் பிலிப்பைன்சில் உள்ள தீவுகளில் பெரும் சேதம் எற்பட்டுள்ளது. கனமழை காரணமாக கட்டுக்கடங்காத வெள்ளப்பெருக்கு ஏற்பட்டது. இதனால் தகவல் தொடர்பு துண்டிக்கப்பட்டுள்ளது. மழையால் ஏராளமான மின்கம்பங்கள் சாய்ந்ததால் மின் விநியோகமும் தடைப்பட்டுள்ளது என்று தெரிவித்தார்.

மேலும் மீட்புப் பணிகளுக்கு இராணுவ ரீதியிலான உதவி அளிக்கத் தயாராக இருப்பதாக அமெரிக்கா தெரிவித்துள்ளது. மணிக்கு 315 கி. மி. வேகத்தில் காற்று வீசியதால், புயல் கரையைக் கடந்த பகுதிகளில் 80 சதவீத வீடுகள் சேதமடைந்துவிட்டதாக பலிப்பைன்ஸ் அதிகாரிகள் தெரிவித்தனர்.

புயலுக்கு 10 ஆயிரத்துக்கும் மேற்பட்டோர் பலியாகிவிட்டதாக அதிகாரப் பூர்வமற்ற தகவல்கள் தெரிவிக்கின்றன. இருப்பினும் இந்தப் புயல் வெள்ளத்தில் சிக்கி இதுவரை 138 பேர் இறந்துள்ளதாக அரசு அதிகாரபூர்வ தகவல் தந்துள்ளது.