நன்றாக படித்து முன்னேற வேண்டும்

ஈரோடு: ""நன்றாக படித்து வாழ்க்கையில் முன்னேற வேண்டும், அதுவே பெற்றோர்களுக்கு செய்யும் கடமை,'' என, பள்ளி விழாவில் முதன்மை கல்வி அலுவலர் குமார் பேசினார்.ஈரோடு காமராஜ் மாநகராட்சி ஆண்கள் மேல்நிலைப்பள்ளியில் முதன்மை கல்வி அலுவலர் குமார் பேசியதாவது:அரசு பொது தேர்வுக்கு தயாராகும் மாணவர்களிடம் படிக்க வேண்டும் என்ற வெறி இருக்க வேண்டும். நீங்கள் நல்ல முறையில் படித்து முன்னேறினால் பெற்றோருக்கு பெருமை. நல்ல முறையில் படித்து எல்லோரும் பாராட்டும்படி உயர்ந்தால், உங்கள் உறவினர்கள் உங்களை அடையாளம் காட்டுவர்.மாணவர்களாகிய நீங்கள் எழுந்து நடந்தால், உங்கள் பின்னால் உலகமே வரும்; படுத்து கிடந்தால் படுக்க பயன்படும் பாய் கூட உங்களுக்கு பகையாகி விடும். காலம் கடந்து விடவில்லை. தினமும் எல்லா பாடங்களையும் எழுதி பார்க்க வேண்டும். வரைபடங்களை வரைந்து முக்கிய இடங்களை குறித்து பழக வேண்டும். திரும்ப திரும்ப இதை செய்து வந்தாலே போதும் அதிக மதிப்பெண்கள் பெற்று விடலாம்.

இவ்வாறு அவர் பேசினார்.அரசு மகளிர் மேல்நிலைப் பள்ளியில் சி.இ.ஓ., குமார் பேசியதாவது:அதிக பணம் செலவழித்து படிக்க வைக்க முடியாத பெற்றோர்தான் தங்கள் குழந்தைகளை அரசு பள்ளியில் சேர்த்துள்ளனர். பெரும்பாலான பெற்றோர் படிக்காதவர்களாக இருப்பர். நமக்கு கிடைக்காத கல்வி நமது குழந்தைகளுக்கு கிடைக்க வேண்டும் என்பதால், உங்கள் தேவைகளை நிறைவேற்றுபவர்களாக பெற்றோர் உள்ளனர்.தங்களின் சுகத்தை மறந்து உங்களுக்காக உழைக்கும் பெற்றோர் தியாகிகள் தானே. அவர்களுக்கு நாம் என்ன செய்ய வேண்டும். நல்லமுறையில் படித்து, முன்னேறினால் அவர்களுக்கு அதை விட வேறு என்ன உதவியை நாம் செய்து விட முடியும். பொது தேர்வை எதிர்கொள்ளும் மாணவியருக்கு ஆசிரியர்கள் எல்லா வழிகளிலும் உதவி செய்ய தயாராக இருக்கின்றனர். நீங்கள் அதை பயன்படுத்திக் கொள்ள வேண்டும்.இவ்வாறு அவர் பேசினார்.