பஞ்சபூதங்கள் பாதம் பணிவோம்!

by **rammalar** Thu 27 Mar 2014 - 2:21

ஒவ்வொரு வெள்ளிக்கிழமை காலை ஏழு மணிக்குக் கிளம்பி, ஞாயிறு இரவு எட்டு மணிக்கு சென்னை திரும்பும் வகையில் அமைக்கப்பட்டிருக்கிறது பஞ்சபூத ஸ்தங்கள் டூர். இந்த தலங்களுக்கு நாம் இப்போது ஒரு குட்டி டூர் அடிப்போமா?

ஸ்ரீ காளஹஸ்தி:
தமிழ்நாடு - ஆந்திரா எல்லையை ஒட்டி ஆந்திர மாநிலம் சித்தூர் மாவட்டத்தில் அமைந்துள்ள தலம் இது. இங்குள்ள மூலவரின் பெயர் ஸ்ரீ காளஹஸ்தீஸ்வர ஸ்வாமி. ஒருமுறை வாயு பகவானுக்கும், ஆதிசேஷனுக்கும் யார் பெரியவன் என்ற ஈகோ மோதல். பஞ்சாயத்து சிவனிடம் போயிற்று. விந்திய மலையை யார் கட்டிப் பிடிக்கிறார்களோ அவரே பெரியவர் என்று சொன்னார் ஈசன். ஆதிசேஷன் உடனே மலையை கட்டிக் கொண்டான். பார்த்தார் வாயு. சூறாவளியை கிளப்பினார். மலை மூன்று துண்டுகளாகப் போக, ஒரு துண்டு காளஹஸ்தியில் விழுந்தது. எனவே காளஹஸ்தி வாயுவுக்கு உரிய தலம் ஆயிற்று. மற்ற இரண்டு துண்டுகளும் இலங்கை திரிகோணமலையிலும் திருச்சியிலும் விழுந்ததாம்.

காஞ்சிபுரம்:
சிவனின் கண்களை விளையாட்டாக மூடிவிட்டார் பார்வதி. உலக இயக்கமே நின்று போனது. கோபம் கொண்ட ஈசன் பார்வதியை பூலோகத்துக்கு அனுப்பிவிட்டார். மண்ணால் லிங்கம் செய்து பூஜித்து வந்தார் பார்வதி. அவரைச் சோதிக்க வெள்ளமாகப் புரண்டு வந்தார் ஈசன். லிங்கத்தைக் கட்டிக் கொண்டு தன் பக்தியை நிரூபித்தார் பார்வதி. அவரை மீண்டும் கைலாயம் அழைத்துச் சென்றார் சிவபெருமான். மண்ணால் லிங்கம் செய்து வழிபட்டதால் மண் (நிலம்) தலம் ஆனது காஞ்சிபுரம். இன்றைக்கும் ஏகாம்பரேஸ்வரர் கோயிலில் உள்ள மூலவருக்கு அபிஷேகம் கிடையாது.

திருவானைக்காவல்:
சிவபெருமான் செய்த யாகத்தைக் கிண்டல் செய்தார் பார்வதி. கோபித்த ஈசன் அவரைப் பூலோகத்துக்கு அனுப்பிவிட்டார். தண்ணீரால் லிங்கம் செய்து பூஜித்து வந்தார் பார்வதிதேவி. அப்படிப் பூஜை செய்து வந்த இடம்தான் திருச்சி அருகில் உள்ள திருவானைக்காவல். இங்குள்ள ஜம்புகேஸ்வரர் கோயிலில் மழைக்காலங்களில் ஊற்றுத் தண்ணீர் மூலம் லிங்கத்தையே மூழ்கடித்து விடும்.

சிதம்பரம்:

ஆகாயத்தையும் உள்ளடக்கிய இந்தப் பிரபஞ்சத்திலிருந்து பூமியைப் படைத்தார் ஈசன். பஞ்சபூதங்களில் ஒன்றான ஆகாயத் தலமாக சிதம்பரம் அழைக்கப்பட்டாலும் வாயு, நெருப்பு, நிலம், நீர் ஆகிய பஞ்சபூதங்களும் சிதம்பரம் நடராஜருடன் ஐக்கியமாக இருப்பதாக ஐதீகம்.

திருவண்ணாமலை:
இது அக்கினித் தலம். சிவபெருமானின் அடியையும் முடியையும் காணப் புறப்பட்ட விஷ்ணுவும் பிரம்மாவும் அடிமுடி காணாமல் திரும்ப, அவர்களுக்கு அக்னி ஸ்வரூபமாக ஈசன் காட்சியளித்த தலம்.

மேலும் டூர் பற்றி விவரங்களுக்கு:
தமிழ்நாடு சுற்றுலா வளர்ச்சிக் கழகம் (விற்பனை பிரிவு)
2, வாலாஜா சாலை, சென்னை - 600 002.
போன்: 044-2538 3333, 2538 1286
ஃபேக்ஸ்: 044-2536 1385

நன்றி: மங்கையர் மலர்