முபாரக் சொத்துக்கள் முடக்கப்படுமா?

கெய்ரோ:எகிப்து அரசியல் சாசனத்தில் சீர்திருத்தங்கள் மேற்கொள்வது குறித்து ஓய்வு பெற்ற நீதிபதி தலைமையில், ஒரு குழுவை அமைத்து உத்தரவிட்டுள்ளது ராணுவ அரசு. இதற்கிடையில், முபாரக்கின் நெருங்கிய அதிகாரிகள் மற்றும் உதவியாளர்களது சொத்துக்களை முடக்கும்படி அமெரிக்கா, பிரிட்டன் மற்றும் பிரான்ஸ் நாடுகளை ராணுவ அரசு கேட்டுக் கொண்டுள்ளது.எகிப்தில், கடந்த 13ம் தேதி முதல் அரசியல் சாசனத்தை ராணுவ அரசு ரத்து செய்தது.
தொடர்ந்து, அரசியல் சாசனத்தில் தேவையான சீர்திருத்தங்களை மேற்கொள்வதற்காக, ஓய்வு பெற்ற நீதிபதி தாரிக் அல் பிஷ்ரி தலைமையில் ஒரு குழுவை அமைத்துள்ளது.இக்குழு 10 நாட்களுக்குள் அரசிடம் அறிக்கை சமர்ப்பிக்கும். அதைத் தொடர்ந்து இரண்டு மாதங்களுக்குள் அத்திருத்தங்கள் குறித்து பொது ஓட்டெடுப்பு நடத்தப்படும்.இந்நிலையில், மக்கள் தங்கள் பணிகளுக்குத் திரும்ப வேண்டும்; நாட்டின் பொருளாதாரத்தை மேம்படுத்த உழைக்க வேண்டும் என்று, ராணுவ அரசு கேட்டுக் கொண்டுள்ளது. கெய்ரோவில் தற்போது, இயல்பு வாழ்க்கை திரும்பியுள்ளது.
இதற்கிடையில், முன்னாள் அதிபர் முபாரக்கின் நெருங்கிய அதிகாரிகள் மற்றும் உதவியாளர்களின் சொத்துக்களை முடக்கி வைக்கும்படி அமெரிக்கா, பிரிட்டன் மற்றும் பிரான்ஸ் நாடுகளை ராணுவ அரசு கேட்டுக் கொண்டுள்ளது. அதேநேரம் முபாரக் பற்றி மூச்சுவிடவில்லை.ஆனால் தங்கள் பட்டியலில் முபாரக் இல்லை என்று அமெரிக்காவும், பிரிட்டனும் தெரிவித்து விட்டன.
கட்சி துவக்க முடிவு:எகிப்தின் பிரதான எதிர்க்கட்சியான முஸ்லிம் சகோதரத்துவ இயக்கம், புதிய அரசியல் கட்சி ஒன்றை விரைவில் துவக்க உள்ளதாகத் தெரிவித்துள்ளது. முபாரக் ஆட்சியில் போடப்பட்ட தடைச் சட்டங்களால் அதுபோன்ற கட்சி ஒன்றைத் துவக்க விருப்பம் இருந்தபோதிலும் செயல்படுத்த முடியாமல் போனதாக அதன் தலைவர்கள் தெரிவித்துள்ளனர்.இந்நிலையில், எகிப்து போராட்டத்தில் பலியானோரின் குடும்பங்களுக்கு மாதம்தோறும் பென்ஷன் வழங்கப்படும் என்று பிரதமர் அகமது சபீக் அறிவித்துள்ளார். போராட்டத்தில் 300க்கும் மேற்பட்டோர் பலியானதாக ஐ.நா., தெரிவித்திருந்தது. அவர்களின் பட்டியல் உடனடியாக தயாரிக்கப்படும் என்று, நிதியமைச்சர் தெரிவித்துள்ளார்.


நன்றி தினமலர்

:”@: :”@: