ஆற்றில் மூழ்கி குடும்பஸ்தர் பலி

by **Naseeb Mohammed** Sat 14 Jun 2014 - 20:52

ஆற்றில் மூழ்கிய குடும்பஸ்தர் ஒருவர் மரணமாகியுள்ள சம்பவம் திருக்கோவில் பிரதேசத்தில் இடம்பெற்றுள்ளது.

இது தொடர்பாக மேலும் தெரிய வருவதாவது,

திருக்கோவில் பொலிஸ் பிரிவிற்குட்பட்ட விநாயகபுரம் மரணகண்டி ஆற்றில் மூழ்கி விநாயகபுரம் – 03 கப்பூகனார் வீதியைச் சேர்ந்த திருக்கோவில் பிரதேச செயலகத்தின் அலுவலக உதவியாளராக கடமை புரியும் மூன்று பிள்ளைகளின் தந்தையான சபாரெத்தினம் வில்சன்சேகர் (வயது 50) என்பவர் நேற்று முன்தினம் வியாழக்கிழமை மாலை 07 மணியளவில் நீரில் மூழ்கி இவ்வாறு மரணமடைந்துள்ளார்.

இவர் அன்றைய தினம் மதிய வேளையில் மரணகண்டி ஆற்றில் பொழுது போக்காக தூண்டில் மூலம் மீன் பிடிப்பதற்காக சென்றுள்ளார்.ஆயினும் இரவு 7 மணியாகியும் வீடு திரும்பாத நிலையில் உறவினர்கள் இவரை தேடிச் சென்றபோது இவர் ஆற்று நீரில் மூழ்கி மரணமடைந்துள்ளதாக தெரிய வருகின்றது.

இது தொடர்பில் திருக்கோவில் பொலிஸாருக்கு தெரியப்படுத்தியதை அடுத்து சம்பவ இடத்திற்கு விரைந்த பொலிஸார் ஆற்றிலிருந்து சடலத்தை மீட்டு பிரேத பரிசோதனைக்காக கல்முனை ஆதார வைத்தியசாலைக்கு கொண்டு சென்றுள்ளனர்.அத்தோடு மேலதிக விசாரணைகளை திருக்கோவில் பொலிஸார் மேற்கொண்டு வருகின்றனர்.