மலிவாகி விட்டதா மனித உயிர்கள்?

தடுக்கி விழுந்தால் விபத்து என்ற ரீதியில்தான் மதுரை நாள்தோறும் பரபரப்பாக இயங்கி கொண்டிருக்கிறது. குறுகலான ரோடு, ஆக்கிரமிப்பு பிளாட்பாரங்கள், ஆங்காங்கே 'காவு' வாங்கும் ரோடுகள், நடுநடுவே 'வா...வா...' என அழைக்கும் மரண பள்ளங்கள் என தீர்க்கவே முடியாத பிரச்னைகளுடன் தினமும் விழித்து தவித்துக் கொண்டிருக்கிறது மதுரை.இதனால்தான் என்னவோ, மதுரையும், விபத்தும் தவிர்க்க முடியதாகிவிட்டது. ஆண்டுதோறும் மனித உயிர்கள் பலியாகுவதை தடுக்க முடியாதது சோகம். கடந்த 2008ல் நகரில் 142 பேரும், புறநகரில் 362 பேரும் இறந்தனர். 2009ல், 127(451), 2010ல் 121(550), 2011ல் (471), 2012ல் 124(471), 2013ல் 127(482) என இறந்தவர்களின் பட்டியல் நீள்கிறது.

ஹெல்மெட் அணிந்தும் விபத்து ஏன்?


உயிர் பாதுகாப்பு கருதி ஹெல்மெட் அணிந்து டூவீலர் ஓட்டுவது பாராட்டுக்குரியது என்றாலும், சிலர் தரமில்லாத ஹெல்மெட் அணிந்து ஓட்டி, உயிரை பறிகொடுக்கும் துயரமும் அவ்வப்போது நடக்கிறது. காரணம் தரமற்ற ஹெல்மெட். 'ஹெல்மெட் அணியாவிட்டால் போலீசார், அபராதம் விதிப்பார்கள்' என அச்சத்துடன், ரோட்டோரம் கடைவிரித்திப்பவர்களிடம் தரமற்ற ஹெல்மெட்டை மலிவு விலைக்கு வாங்கி, 'நாங்களும் வாங்கிட்டோம். பார்த்துக்கோ... பார்த்துக்கோ...' என அணியாமல் டூவீலர் மீது வைத்துக் கொள்கின்றனர். போலீசாரை கண்டதும், தலையில் மாட்டிக்கொள்கின்றனர். அதுவும் 'லாக்' இல்லாமல். இதுபோன்ற காரணங்களால்தான், உயிரிழிப்பு ஏற்படுகிறது. 'சட்டம் தங்களை பாதுகாக்கவே அமல்படுத்துகிறது' என்ற விழிப்புணர்வு வாகன ஓட்டிகளிடம் ஏற்படாதவரை உயிரிழப்புகள் குறையபோவதில்லை.

அரசு கண்காணிக்குமா?


ஹெல்மெட் கட்டாயம் என அரசு சட்டம் கொண்டு வந்தபோதிலும், அது தரமானதா என கண்காணிக்க தவறிவிட்டது. இதனால், புற்றீசல்கள் போல் ரோடுகளில் ஹெல்மெட் கடைகள் முளைத்து வருகின்றன. திருப்பூரில் சில மாதங்களுக்கு முன் ஹெல்மெட் கட்டாயமாக்கப்பட்ட போது, தரமற்ற ஹெல்மெட்களை போலீசார் பறிமுதல் செய்தனர். அதேபோல், மதுரையிலும் செய்தால் மட்டுமே உயிரிழப்பை தடுக்க முடியும்.


நன்றி:தினமலர்