நாட்டு மக்களுக்கு ராஜபக் ஷே அறிவுரை

கொழும்பு:இலங்கையின் அமைதியை சீர்குலைக்க நினைக்கும் தீயசக்திகளுக்கு யாரும் துணை போகக் கூடாது; நாட்டு மக்கள் யாரும், மத வேற்றுமை பாராட்டக் கூடாது, என, இலங்கை அதிபர், ராஜபக் ஷே வேண்டுகோள் விடுத்துள்ளார்.
இலங்கையில், பெரும்பான்மை சமூகமாக, சிங்களர்கள் உள்ளனர். தமிழர்கள் மற்றும் முஸ்லிம்கள் அதிக எண்ணிக்கையில் இருந்த போதிலும், சிறுபான்மை சமூகங்களான அந்த இரு சமூகங்களுக்கு, சம உரிமை வழங்கப்படுவதில்லை.
அந்நாட்டின், இரண்டு கோடி மக்கள் தொகையில், முஸ்லிம்கள், 20 லட்சம் பேர் வசிக்கின்றனர். அவர்களுக்கு சிறப்பு அந்தஸ்து, சிறப்பு அதிகாரங்கள் வழங்கப்படுவதாக, தவறாக நினைக்கும், புத்த துறவிகளைக் கொண்ட சிங்களர் அமைப்பு ஒன்று, முஸ்லிம்கள் மீது மோதல் போக்கு கொண்டிருந்தது.
கடந்த வாரம், அந்நாட்டின் தென்மேற்கு பகுதியில் உள்ள பெருவெல, தர்கா டவுன், அலுத்கமா ஆகிய இடங்களில், சிங்களர் ஆதரவு புத்த துறவிகள் நடத்திய தாக்குதலில், நான்கு முஸ்லிம்கள் கொல்லப் பட்டனர்; ஏராளமான பொருட்கள், சொத்துகள் சூறையாடப்பட்டன. இந்த விவகாரம் வெளியே தெரிந்ததும், அமெரிக்கா மற்றும் ஐரோப்பிய யூனியன் நாடுகள், இலங்கைக்கு கண்டனம் தெரிவித்தன. எனினும், நேற்று முன்தினம், முஸ்லிம்களின் நிறுவனம் ஒன்று எரிக்கப்பட்டது.
இந்நிலையில், சுதந்திரா கட்சியைச் சேர்ந்த அதிபர் ராஜபக் ஷே, படுல்லா என்ற இடத்தில், பொதுமக்கள் மத்தியில் நேற்று பேசியதாவது:நம்மை எந்த விதத்திலாவது வீழ்த்த வேண்டும் என நினைக்கும் கும்பல்களுக்கு, நாமே விலை போகக் கூடாது. நம் நாட்டின் அமைதி மற்றும் வளர்ச்சிக்கு பாதகமான, மத வேற்றுமையை யாரும் பின்பற்றக் கூடாது; அத்தகையவர்கள் மீது கடும் நடவடிக்கை எடுக்கப்படும்.அனைத்து மதத்தினரும் ஒற்றுமையுடன் வாழ வேண்டும். இவ்வாறு அவர் கேட்டுக் கொண்டார்.
இலங்கையின் இரண்டாவது பெரிய சமுதாயமான தமிழர்கள், சம உரிமை கோரி, நீண்ட காலமாக போராடி வருகின்றனர். எனினும், இது வரை வழங்கப்படவில்லை. இதற்காக ஆயுதம் ஏந்தி, வன்முறை பாதையில், 30 ஆண்டுகளுக்கும் மேலாக போராடிய விடுதலைப் புலிகள், 2009ல் முற்றிலும் ஒடுக்கப்பட்டு விட்டனர்.

-தினமலர்