கட்சியின் உண்மையான மறுசீரமைப்புக்கு தொடர்ந்தும் போராட்டம்

ஐக்கிய தேசியக் கட்சியினால் தேசிய அமைப்பாளர் பதவிக்கு நியமனம் வழங்கும் நடைமுறை யின்போது கட்சி யாப்பு முற்றாக மீறப்பட்டுள்ளதாக ஐ.தே.க பிரதித் தலைவர் சஜித் பிரேமதாச தெரி விக்கின்றார்.

கொழும்பு நூலக சேவைகள் மன்றத்தில் நேற்று முன்தினம் (11) நடைபெற்ற ஐக்கிய தேசியக் கட் சியை பாதுகாக்கும், வெற்றிபெறச் செய்யும் மக்கள் கருத்தரங்கு தொடரின் முதலாவது கூட்டத்தில் கலந்துகொண்டு உரையாற்றும்போதே அவர் மேற்கண்டவாறு கூறினார்.

கட்சியின் உண்மையான மறுசீரமைப்புக்காக தாம் போராடுவதற்குத் தயாராக உள்ளதாகவும், எக்காரணம் கொண்டும் அப்போராட்டத்தை கைவிடப் போவதில்லை எனவும் சஜித் பிரேமதாச மேலும் கூறினார்.

கட்சியின் தலைவர் தேர்வின்போது சிரேஷ்ட அங்கத்தவர்கள் சிலரின் வேண்டுகோளின் பிரகாரம் தாம் ஒரு அடி பின் வைத்ததாகவும், எனினும் தற்போதைய நிலையில் சிரேஷ்ட அங்கத்தவர்கள் மெளனம் காப்பதாகவும் அவர் வலியுறுத்தினார்.

கட்சி தற்போது படிப்படியாக ஒரு சிலரை பழிவாங்கி வருவதாகக் கூறிய அவர், கட்சி இன்று அரசியல் மற்றும் பொருளாதார நெருக்கடிக்கு ஆளாகியுள்ளதாகவும், கட்சிக்கு நிதி சேகரிக்கப்படுவது தனிப்பட்ட சிலரது பெயருக்கு தேயிலை தோட்டங்கள், தென்னம் தோட்டங்கள் வாங்குவதற்கல்ல எனவும் சஜித் பிரேமதாச சுட்டிக்காட்டினார்.

தேசிய அமைப்பாளராக தெரிவாவதற்கான சிறந்த தகுதிபெற்றவர் ரன்ஜித் மத்தும பண்டார என்பதை தாம் ஏற்றுக்கொள்வதாகவும், ரன்ஜித் கொழும்பு 07 இல் பிறந்திருந்தால் அவருக்கும் கட்சியின் உயர் பதவி வரை செல்ல முடியுமெனவும் அதனை கட்சியில் 79 வீதமானவர்களுக்கு இன்று புரிந்துள்ளதாகவும் சஜித் பிரேமதாச மேலும் கூறினார்.

இதன்போது பாராளுமன்ற உறுப்பினர்களான தயாசிறி ஜயசேகர, ரன்ஜித் மத்துமபண்டார உட்பட பாலித்த பெலிபொல, சிராலி லக்திலக்க, இம்தியாஸ் பாக்கீர் மாக்கார், ருக்மன் சேனநாயக்க உள்ளிட்ட மேலும் பலர் கருத்துத் தெரிவித்தனர்.