புலிகளின் தலைவர் பிரபாகரனை விட இந்த அரசாங்கத்தின் கொடுங்கோலாட்சி கொடியது: மங்கள சமரவீர

விடுதலைப் புலிகளின் தலைவர் பிரபாகரனை விட இந்த அரசாங்கத்தின் கொடுங்கோலாட்சி கொடியது என்று ஐ.தே.க. பாராளுமன்ற உறுப்பினர் மங்கள சமரவீர குறிப்பிட்டுள்ளார்.
அவசர காலச் சட்ட நீடிப்பு மீதான பிரேரணையில் கலந்து கொண்டு நேற்றைய தினம் பாராளுமன்றத்தில் உரையாற்றும் போதே அவர் மேற்கண்டவாறு குறிப்பிட்டுள்ளார்.

விடுதலைப் புலிகளுடனான யுத்தம் முடிவடைந்து இரண்டு வருடங்கள் கடந்துவிட்ட நிலையிலும் மாதாமாதம் அவசர காலச் சட்டம் நீடிக்கப்பட்டுக் கொண்டிருக்கின்றது. அதன் மூலம் விடுதலைப் புலிகளின் பயங்கரவாதம் இல்லாதொழிக்கப்பட்ட பின் நாட்டில் சுதந்திரமான சூழல் ஏற்படும் என்று எதிர்பார்த்த அனைவரினதும் எதிர்பார்ப்புகள் பொய்த்துப் போயுள்ளது.

இன்னொரு புறத்தில் சொல்வதானால் பிரபாகரனை விட இந்த அரசாங்கத்தின் அடக்குமுறை கொடியது. சர்வாதிகார போக்குக் கொண்டது. அதுமாத்திரமன்றி இவர்கள் தங்களைத் தாங்களே புத்த பெருமானின் இரத்த உறவினர்களாகவும், முன்னைய அரசர்களின் பரம்பரை வம்சாவளியினராகவும் அடிவருடிகளைக் கொண்டு துதிபாடிக் கொள்கின்றனர்.

விடுதலைப் புலிகள் அமைப்பின் கட்டாய ஆயுதப் பயிற்சியை அன்று விமர்சித்தவர்கள் இன்று அதனை விட மோசமான முறையில் பல்கலைக்கழக மாணவர்களுக்கு இராணுவப் பயிற்சிகளை கட்டாயப்படுத்தியுள்ளனர்.அதன் மூலம் அரசாங்கத்தின் அடக்குமுறைகளுக்கு அடிபணியத்தக்க எதிர்காலத் தலைமுறையொன்றை உருவாக்குவதே இந்த அரசாங்கத்தின் நோக்கமாகும்.

இராணுவம் இன்று அரசியல் மயப்படுத்தப்பட்டுள்ளது. நாட்டின் சிவில் நிர்வாகம் இராணுவத்தின் கீழ் கொண்டுவரப்பட்டுள்ளது. அரசாங்கம் தனக்கு எதிரானவர்களையும் எதிர்க்கட்சிகளையும் அடக்க இராணுவத்தைப் பயன்படுத்தத் தொடங்கியுள்ளது.

நாட்டின் பாதுகாப்புச்செயலாளர் அனைத்து நிர்வாக மற்றும் அரசியல் விடயங்களிலும் தலையிடுகின்றார். அரசாங்கத்துக்கு மட்டுமல்ல எதிர்காலத்தில் அவரால் நாட்டின் ஜனாதிபதிக்கே கூட ஆபத்துக்கள் நேரலாம் என்றும் பாராளுமன்ற உறுப்பினர் மங்கள சமரவீர தொடர்ந்தும் தனது உரையின் போது கருத்து வெளியிட்டிருந்தார்.