லோக்பால் விவகாரத்தில் தி.மு.க. முரண்பட்டு நிற்பதால் காங்கிரஸ் கூட்டணிக்குள் பிளவுகள்

லோக்பால் விவகாரத்தில் தி.மு.க. முரண்பட்டு நிற்பதால் காங்கிரஸ் கூட்டணிக்குள் பிளவுகள்
விசாரணை வரம்புக்குள் பிரதமரை கொண்டு வர வேண்டுமென கருணாநிதி திடீர் நிலைப்பாடு
லோக்பால் விசாரணை வரம்பிற்குள் பிரதமரைக் கொண்டுவரக் கூடாது என ஐ. மு. கூட்டணியில் உள்ள பிற கட்சிகள் எல்லாம் எதிர்ப்பு தெரிவித்து வரும் நிலையில், ‘பிரதமரை விசாரணை வரம்பிற்குள் கொண்டு வர வேண்டும்’ என தி. மு. க. அதிரடியாக ஆதரவு தெரிவித்துள்ளது. இதனால் ஐ. மு. கூட்டணிக்குள், லோக்பால் மசோதாவை மையமாக வைத்து பிளவுகள் தோன்றியுள்ளன.

லோக்பால் வரைவு மசோதா தொடர்பான அனைத்து நவடிக்கைகளும் முழு தோல்வியில் முடிந்து விட்டதை அடுத்து, அரசு கடந்த செவ்வாய்க்கிழமை இரவு அதிரடியாக ஐ. மு. கூட்டணியின் ஆலோசனை கூட்டம் கூடுவதாக அறிவித்தது. இதுவரை முக்கிய முடிவுகள் எதற்குமே இதுபோன்ற கூட்டத்தை கூட்டாமல் சோனியா தலைமையிலான உயர்மட்ட குழுவில் வைத்தே பல முடிவுகள் எடுக்கப்படுகின்றன.

இந்த சூழ்நிலையில் லோக்பால் விவகாரத்தில் ஐ. மு. கூட்டணி ஒற்றுமையாக உள்ளது என காட்டுவதற்காக இக்கூட்டம் நடத்தப்பட்டது. ஆனால் கூட்டம் கூடிய பின் நிலைமை மாறிவிட்டது. தி. மு. க. தலைவர் கருணாநிதி தன் மகளை பார்ப்பதற்காக டில்லி வந்து தாங்கியிருந்தாலும்கூட இக்கூட்டத்திற்கு போகாமல் டி. ஆர் பாலுவை அனுப்பி வைத்தார்.

வழக்கம் போல நாங்கள் எடுக்கும் முடிவுகளுக்கு அனைத்து கூட்டணி கட்சிகளும் ஆதரவு தெரிவிக்கும் என காஙகிரஸ் தலைவர்கள் எதிர்பார்த்தனர். ‘பிரதமர் பதவியை லோக்பால் விசாரணை வரம்பிற்குள் கொண்டு வர தேவையில்லை.

பிரதமர் பதவி உயர்ந்தது இப்பதவிக்கு எந்த விதத்திலும் களங்கம் வந்துவிடக் கூடாது என திரிணாமுல், தேசியவாத காங்கிரஸ் உள்ளிட்ட அனைத்து கட்சி தலைவர்களும் தங்களின் கருத்துக்களை எடுத்து வைத்தனர். தவிர மாநில அளவில் அமைக்கப்படும் லோக் அயுக்தா அமைப்பும் தேவையில்லை என்றும் கூறினர். ஆனால் தி. மு. க. வின் டி. ஆர். பாலு தன் கருத்துக்களை தெரிவித்த போது அனைவரும் அதிர்ச்சி அடைந்தனர்.

அவர் பேசியதாவது: பிரதமர் பதவியை லோக்பால் விசாரணை வரம்பிற்குள் கட்டாயம் கொண்டு வர வேண்டும். இன்றைக்கு மன்மோகன் சிங் போன்ற நேர்மையானவர்கள் பதவியில் இருக்கலாம். நேர்மையானவர்கள் தான் இந்த பதவியில் அமருவர் என எந்தவிதமான உத்தரவாதமும் கிடையாது. நாளைக்கு வேறு யாராவது பிரச்சினைக்குரிய நபர்கள் இந்த பதவியில் அமர நேரிடும். எதிர்காலத்தில் என்ன வேண்டுமானாலும் நடக்கலாம். இன்றைய சூழ்நிலையை வைத்து மட்டுமே, இப்போதைய பிரச்சினையை பார்க்கக் கூடாது.

லோக்பால் சட்டம் நிரந்தரமானது. எனவே எதிர்காலத்தை கருத்திற்கொண்டு பிரதமர் பதவியை இந்த சட்ட வரம்பிற்குள் கொண்டு வருவதே சரி. பிரதமர் பதவி என்பது அதிகாரமிக்கதோடு மட்டுமல்லாது, பொறுப்பு வாய்ந்தது. எனவே அந்த பதவியும் பதில் சொல்ல கடமைப்பட்டது என்றே மக்கள் நினைக்கின்றனர். உயர் நீதிமன்ற மேல் நீதிமன்ற நீதிபதிகளையும் கட்டாயம் லோக்பால் விசாரணை வரம்பிற்குள் கொண்டுவர வேண்டும். இவ்வாறு டி. ஆர். பாலு தெரிவித்தார்.

தி. மு. க. வின் இந்த திடீர் நிலைப்பாட்டால் லோக்பால் மசோதா பிரச்சினையில் ஐ. மு. கூட்டணிக்குள் ஒற்றுமை இல்லை என்பது உறுதியாகியுள்ளது. இருப்பினும் பாராளுமன்றத்திலோ அல்லது அனைத்து கட்சி கூட்டத்திலோ இதே கருத்தை பகிரங்கமாக ஐ. மு. கூட்டணிக்கு எதிராக தி. மு. க. வெளிப்படுத்தினால் நிலைமை மேலும் சிக்கலாகும் என்று தகவலறிந்த வட்டாரங்கள் தெரிவிக்கின்றன.

லோக்பால் மசோதா விவகாரத்தில் ஐ. மு. கூட்டணியின் பிற கட்சிகளில் இருந்து தி. மு. க. முரண்பட்டு நிற்பதால், காங்கிரஸ் உள்ளிட்ட பிற கூட்டணி கட்சிகளுக்கு தர்ம சங்கடம் ஏற்பட்டுள்ளது. ஸ்பெக்ட்ரம் விவகாரத்தில் தங்களை காங்கிரஸ் கைவிட்டு விட்டதை தி. மு. க. மன்னிக்க தயாராக இல்லை.

அதேபோல் இதே விவகாரத்தில் நீதித் துறையும், தி. மு. க. வை உலுக்கி எடுத்து வருவதையும் சற்று ஆழமாகவே பார்க்கிறது. இதனால் தான் பிரதமர் பதவியையும் நீதித்துறையும் கண்டிப்பாக லோக்பால் விசாரணை வரம்பிற்குள் கொண்டு வர அதிரடியாக ஆதரிக்கிறது. ஸ்பெக்ட்ரம் விவகாரத்தில் தங்களை முழுவதுமாக வஞ்சித்து விட்ட மத்திய அரசுக்கும், காங்கிரசுக்கும் பதிலடி கொடுக்கும் நோக்கில் தான், தி. மு. க. வின் இந்த திடீர் நிலைப்பாடு இருப்பதாக கூறப்படுகிறது.