சிதம்பரம் பயணம் செய்த ஹெலியில் இயந்திரக் கோளாறு

by **நண்பன்** Fri 24 Jun 2011 - 9:51

சிதம்பரம் பயணம் செய்த ஹெலியில் இயந்திரக் கோளாறு
மத்திய உள்துறை அமைச்சர் சிதம்பரம் சென்ற ஹெலிகொப்டரில் திடீர் கோளாறு ஏற்பட்டதால், அவர் வேறு ஒரு ஹெலிகொப்டருக்கு மாற வேண்டிய நிலை ஏற்பட்டது.

இரண்டுநாள் சுற்றுப்பயணமாக காஷ்மீர் மாநிலம் சென்றிருந்த மத்திய உள்துறை அமைச்சர் சிதம்பரம், காஷ்மீரின் தென் பகுதியில் உள்ள பகல்காம் நகரில் இருந்து, வடபகுதியில் உள்ள குரீஸ் நகருக்கு நேற்று முன்தினம் ஹெலிகொப்டரில் சென்றார், அவருடன் எல்லைப் பாதுகாப்புப் படை (பி.எஸ்.எப்) தலைவர் ராமன் ஸ்ரீவத்சவா மத்திய ரிசர்வ் பொலிஸ் படை தலைவர் கே. விஜயகுமார் மற்றும் உள்துறை அமைச்சக அதிகாரிகள் சிலரும் சென்றனர்.

எம்.ஐ. 17 ரகத்தைச் சேர்ந்த அந்த ஹெலிகொப்டரில் உள்ள இரு இயந்திரங்களில் ஒன்று திடீரென இயங்கவில்லை. இதை உணர்ந்த விமானி வேறு வழியின்றி ஸ்ரீநகரில் உள்ள சேநரு ஹெலிபேடில் ஹெலிகொப்டரை தரையிறக்கினார்.

அடுத்த அரை மணிநேரத்தில் எல்லை பாதுகாப்புப் படைக்கு சொந்தமான மற்றொரு ஹெலிகொப்டரில் சிதம்பரம் மற்றும் அவருடன் இருந்தவர்கள் குரீஸ் நகருக்குச் சென்றனர்.