காதல் செய்ததால் எனக்கு நானே கொடுத்து கொள்ளும் தண்டனை

by **நேசமுடன் ஹாசிம்** Sat 25 Jun 2011 - 11:18

செஞ்சி அருகே, காதல் திருமணம் செய்து கொண்ட பெண், திருமணம் முடிந்த ஐந்தாவது நாளில்,
கணவர் வீட்டு முன் தீக்குளித்து இறந்தார். அவர் எழுதி வைத்துள்ள கடிதத்தில், புகார் கொடுக்க சென்ற போது போலீசார் தன்னை திட்டியதாக தெரிவித்துள்ளார்.

விழுப்புரம் மாவட்டம், செஞ்சி தாலுகா நெகனூர் காலனியைச் சேர்ந்த காண்டீபன் மகள் மகேஸ்வரி, 21; பி.காம்., பட்டதாரி. இவர், சென்னை திருவொற்றியூரில் தன் சகோதரியுடன் தங்கி, தனியார் நிறுவனத்தில் வேலை செய்து வந்தார்.நெகனூர் காலனியில் இருந்து, சென்னை ஐய்யப்பன்தாங்கலில் தங்கி, டிரைவர் வேலை செய்து வந்த ராமதாஸ் மகன் துரைமுருகன் என்பவருடன், இவருக்கு காதல் ஏற்பட்டது.கடந்த 20ம் தேதி, கோவிலில் ரகசிய திருமணம் செய்து கொண்ட இவர்கள், 23ம் தேதி, நெகனூர் கிராமத்திற்கு வந்தனர். தன் பெற்றோரிடம் தாங்கள் திருமணம் செய்து கொண்டதை சொல்லும் படி, மகேஸ்வரியை மட்டும் அனுப்பினார். இதை கேட்டு ஆத்திரமடைந்த துரைமுருகன் குடும்பத்தினர், மகேஸ்வரியை திட்டி, அடித்து விரட்டினர்.மகேஸ்வரி, நடந்த சம்பவத்தை துரைமுருகனிடம் மொபைல் போனில் கூறினார். அவர் சரியான பதில் சொல்லாமல், சென்னை சென்றுவிட்டார். மகேஸ்வரி குடும்பத்தினர், ஊராட்சித் தலைவரிடம் தெரிவித்தனர். அவர் சமாதானம் பேச அழைத்ததற்கு, துரைமுருகன் குடும்பத்தினர் வர மறுத்து விட்டனர்.

துரைமுருகனிடம் போனில் பேசியபோது, தன் தந்தை சொல்வது தான் இறுதி முடிவு என கூறியுள்ளார். இதையடுத்து, போலீசில் புகார் செய்யும் படி ஊராட்சித் தலைவர் கூறினார்.வளத்தி போலீசில் புகார் கொடுத்த போது, அங்கிருந்த போலீசார், "திருமணம் நடந்ததற்கு ஆதாரம் ஏதும் இல்லை; எங்கு திருமணம் நடந்ததோ அங்கேயே போய் புகார் செய்யுங்கள்' என அனுப்பினர்.இதையடுத்து, நெகனூர் கிராமத்திற்கு வந்த மகேஸ்வரி, முற்பகல் 11 மணியளவில், உடலில் மண்ணெண்ணெய் ஊற்றி, தீவைத்துக் கொண்டு துரைமுருகன் வீட்டு வாசலில் வந்து விழுந்தார்.

உடல் முழுவதும் எரிந்து உயிருக்கு போராடிய அவரை, செஞ்சி அரசு மருத்துவமனையில் முதலுதவி செய்து, புதுச்சேரி ஜிப்மர் மருத்துவமனைக்கு அனுப்பி வைத்தனர். அங்கு சிகிச்சை பலனின்றி, அவர் இறந்தார்.மகேஸ்வரி தீக்குளிப்பதற்கு முன், தன் தந்தைக்கும், ஊராட்சித் தலைவருக்கும் தனித்தனியாக கடிதம் எழுதி வைத்துள்ளார். அதில், "என் சாவுக்கு துரைமுருகன் தான் காரணம். போலீஸ் மீது நம்பிக்கை இல்லை. அவர்கள் என்னை திட்டினர். இது எனக்கு நானே கொடுத்து கொள்ளும் தண்டனை' என எழுதியுள்ளார்.