முகாம்களில் வசிக்கும் இலங்கைத் தமிழர்களுக்கு உதவித்தொகை

by **நேசமுடன் ஹாசிம்** Thu 14 Jul 2011 - 6:54

கிருஷ்ணகிரி, ஜூலை 14: கிருஷ்ணகிரி மாவட்டம், பாம்பாறு அணை முகாமில் வசிக்கும் இலங்கை அகதிகளுக்கு மாவட்ட ஆட்சியர் சி.நா. மகேஸ்வரன் செவ்வாய்க்கிழமை ரூ.20.40 லட்சம் மதிப்பிலான நலத்திட்ட உதவிகளை வழங்கினார்.

இதுகுறித்து மாவட்ட நிர்வாகம் புதன்கிழமை வெளியிட்ட செய்திக்குறிப்பு:

தமிழகத்தில் உள்ள அகதிகள் முகாம்களில் வசிக்கும் இலங்கைத் தமிழர்களுக்கு உதவித்தொகை வழங்க அரசு உத்தரவிட்டுள்ளது. ஆதரவற்ற முதியோர் ஓய்வூதியத் திட்டம், ஆதரவற்ற விதவையர் ஓய்வூதியத் திட்டம் என பல்வேறு நலத்திட்ட உதவிகள் வழங்கப்பட்டு வருகின்றன. அதன்படி பாம்பாறு அணை அகதிகள் முகாமில் வாழம் 17 இலங்கைத் தமிழர்களுக்கு மாதம் ரூ.1,000 உதவித்தொகை பெறுவதற்கான உத்தரவை மாவட்ட ஆட்சியர் சி.நா.மகேஸ்வரன் வழங்கினார்.

மேலும், இந்திராகாந்தி தேசிய விதவை உதவித்தொகை திட்டத்தின் கீழ் 9 நபர்களுக்கு ரூ.10.80 லட்சமும், ஆதரவற்ற மாற்றுத்திறனாளிக்கு ரூ.1.20 லட்சமும், ஆதரவற்ற விவசாயக் கூலித் தொழிலாளர்களுக்கான உதவித்தொகையாக 7 பேருக்கு ரூ.8 லட்சத்து 40 ஆயிரமும் என மொத்தம் ரூ.20.40 லட்சத்துக்கான காசோலைகள் வழங்கப்பட்டன.நிகழ்ச்சியில், வட்டாட்சியர் (சமூகப் பாதுகாப்புத் திட்டம்) கே. புகழேந்தி உள்ளிட்ட அதிகாரிகள் பங்கேற்றனர்.