நாய்களுக்கும் வாழ்வுரிமை மறுக்கப்பட்ட மண்ணில் ஜனநாயகம் தழைக்குமா?

கடந்த இரு வருடங்களுக்கு முன் யுத்த பூமியாக இருந்த வன்னி தற்போது புத்தபூமியாக மாற்றமடைந்து கொண்டு வருகின்றது. அரச மரங்கள் அரசாட்சியின் சின்னங்களாக எங்கும் முளைவிடச் செய்யப்பட்டுள்ளன.
இதற்கும் அப்பால் பெரிய மரங்கள் வேருடன் இடம் மாறி அமைந்து புத்தருக்கு நிழல் கொடுக்கின்றன.

இவ்வாறு அரச மரத்துடன் அரசாட்சி வேர் பதித்து விரவி நிற்க, "ஒரு நாடு ஒரு தேசம்'' என்ற இலக்கை நோக்கி வன்னி நிலம் அடிக்கப்பட்டு நகர்த்தப்படுகின்றது.

அரச மரத்துடனான அரசாட்சியுடன் ஒரு தேசம், ஒரு கொள்கைக்குள் தமிழர்களின் அரசியல் அபிலாஷைகள், அதனை நோக்கிய அதிகாரப் பரவலாக்கல்கள் பேசாப் பொருளாகிப் போய் விட்டன.

கடந்த காலங்களில் தமிழ் மக்களின் வாக்குகளைப் பெறுவதற்காகவேனும் அரசியல் தீர்வு குறித்து பேசப்பட்டது. இப்பொழுது அந்த கலாசாரம் கூட மலையேறி விட்டது. இன்று வடக்கின் வசந்தத்திற்குள் ஒளி வீசும் அபிவிருத்தி பற்றியே பேசப்படுகின்றது.

கடந்த சில வாரங்களாக குறிப்பாக வட பகுதி உள்ளூராட்சி சபைகளுக்கான தேர்தல் பிரசாரப் பீரங்கிக ளாலும், இலவசங்களாலும் அதிர்ந்து போனது. யுத்த காலத்தில் மக்கள் தமது உயிரைப் பணயம் வைத்து வாழ்ந்தமை மறக்க இயலாது.

அமைதி திரும்பிய பின்னும் உயிர்கள் பறிபோன போதும் அவை ஆங்காங்கே இடம்பெற்ற சம்பவங்களாகப் பார்க்கப்பட்டன. ஆனால், யுத்த காலத்தில் விடுதலைப்புலிகளாக இருக்கலாம் அல்லது படைத்தரப்பாக இருக்கலாம்.

நாய்களுக்கு சுதந்திரம் வழங்கப்பட்டிருந்தது. அவைகள் தாராள சுதந்திரத்துடன் சுற்றித் திரிந்தன. விமானக் குண்டு வீச்சாலும் சரமாரியான துப்பாக்கிச் சூட்டுக்கு மிடையில் அகப்பட்டு உயிரிழந்த சம்பவங்களும் இல்லாமல் இல்லை.

ஆனால் தற்போதைய உள்ளூராட்சி சபைத் தேர்தலின் போது நாய்கள் தமது உயிர்களைப் பாதுகாத்துக் கொள்வதில் பெரும் சிரமங்களை எதிர்நோக்கியிருந்தன.

தம்மை நோக்கிய ஆபத்தை அறியாது சுற்றித் திரிந்த நாய்கள், வெட்டியும் சுட்டும் சாய்க்கப்பட்டு, தலை இல்லாத முண்டங்களாக மனிதர்களைப் போல் எதிரணி வேட்பாளர்களின் வீடுகளின் முன்னாலும், அவர்களது கிணறுகளிலும் வீசப்பட்ட புது தேர்தல் கலாசாரம் யாழில் அரங்கேறியுள்ளது.

சுதந்திரமாக நடமாடித் திரிந்து வாழும் உரிமை மறுக்கப்பட்ட அந்த ஆத்மாக்களுக்காகவும் நாம் பேசியாக வேண்டும்.

சிலவேளைகளில் தேர்தல் முடிவுடனான வெற்றி தோல்விகளின் வெளிப்பாடாகத் தேர்தல் காலத்தில் போன்று நாய்கள் மாத்திரமின்றி மனிதர்களும் வேட்டையாடப்படலாம். இது பற்றி யாரும் கவலை கொள்ளாமல் இருக்க முடியாது.

நாய்களுக்கும் வாழ்வுரிமை மறுக்கப்பட்ட மண்ணில் ஜனநாயகம் தழைக்குமா என்பதும் கேள்விதான். இலங்கையில் முக்கியமான தேர்தல் எனக் கணிக்கப்படும் தேர்தல் பிரசாரங்கள் தமிழ் மக்களின் அபிலாஷை குறித்து பேசாது இடம்பெற்றுள்ளது.

ஆனால் அமெரிக்கா முதற்கொண்டு சர்வதேச சமூகம் முதலாக தமிழக முதல்வர் செல்வி ஜெயலலிதா வரை தமிழ் மக்களுக்காக அரசியல் தீர்வு குறித்துப் பேசுகின்றனர்.

போர்க் குற்றம் குறித்து இலங்கை அரசு உரிய விசாரணை நடத்தவில்லையென்றால் இலங்கைக்கான உதவிகள் நிறுத்தப்படுமென்று அமெரிக்க செனட் சபையில் தீர்மானம் நிறைவேற்றப்பட்டுள்ளது.

ஆனால் தமிழர்களோ, புலம்பெயர் தமிழர்கள் உட்பட ஜெயலலிதாவும் ஹிலாரியும் தமிழர் விவகாரம் குறித்துப் பேசுவார்களா என்று பட்டிமன்றம் நடத்திக் கொண்டிருக்கின்றோம்.

முதலில் எமக்காக மற்றவர்கள் என்ன செய்கின்றார்கள் என்பது குறித்து பட்டிமன்றங்கள் நடத்துவதை விடுத்து, எமக்கிடையிலான முரண்பாடுகளை தூர வீசி எறிந்து விட்டு தமிழ் மக்களின் அபிலாஷைகளை அடைந்து கொள்வதற்கேற்ற நடைமுறைச் சாத்தியமான, உறுதியான, தூர நோக்குடனான திட்டங்களை வகுத்து நாம் செயற்பட முன்வர வேண்டும்.

தமிழர்களுக்கு அரசியல் தீர்வு வழங்கப்பட வேண்டுமென்று அமெரிக்கா வலியுறுத்தி வருகின்றதை நாம் அனைவரும் அறிவோம். ரொபேர்ட் பிளேக் கூட்டமைப்பினரைச் சந்தித்தபோது அரசியல் தீர்வை முன் வைக்குமாறு கோரியதுடன், முன் வைக்கப்படும் தீர்வுப் பொதிக்கு அமெரிக்கா ஆதரவளிக்கத் தயார் என்றும் கூறியுள்ளார். இப்பொழுது பந்து தமிழர் பக்கமே உள்ளது.

வி.தேவராஜ்

:”@: :”@: