தறிகெட்டு போகும் தங்கம்

தங்கம் விலை உயர்வு விண்ணை நோக்கி பாய்கிறது. இன்னும் 216 ரூபாய் இன்றோ நாளையோ
அது அதிகரித்தால், ஒரு பவுன் ரூ.20,000 ஆகிவிடும். நேற்று ஒரே நாளில் தங்கம் விலை ஒரு சவரனுக்கு ரூ.312 அதிகரித்து ரூ.19,784 ஆக உயர்ந்தது. ஒவ்வொரு நாளும் புதிய உச்சத்தை அது தொடுகிறது.

உலக நாடுகள் பலவற்றில் ஏற்பட்டு வரும் பொருளாதார மந்தநிலை, விலைவாசி உயர்வு, கடன் நெருக்கடி போன்றவற்றால் பங்கு சந்தைகள் உட்பட பல முதலீடுகளில் சரிவு காணப்படுகிறது. எனவே, தங்கத்தை சிறந்த முதலீடாக மக்கள் கருதுகின்றனர். எனவே, தங்க வர்த்தகத்தில் ஈடுபடுவோர் அதிகரித்துள்ளனர். வங்கிகள், அஞ்சல் நிலையங்களும் தங்கம் வாங்கி விற்கின்றன. பல நாடுகளின் ரிசர்வ் வங்கிகள் தங்கத்தை அதிக இருப்பு வைக்கின்றன.

இதனால், கடந்த சில நாட்களாக தங்கத்தின் விலை தாறுமாறாக உயர்ந்து வருகிறது. சர்வதேச விலை நிலவரத்தால் நம்நாட்டிலும் தங்கம் விலை விண்ணை நோக்கி பாய்கிறது. அத்துடன் எதிர்வரும் பண்டிகை மற்றும் திருமண சீசனால் தங்கம் விற்பனை அதிகரிக்கும் என்று கணக்கிட்டு வர்த்தகர்கள் அதிக அளவில் தங்கம் வாங்குகின்றனர்.
இதனால், கடந்த ஒரு வாரத்தில் தங்கம் பவுனுக்கு சுமார் ரூ.2,000 வரை உயர்ந்து விட்டது. ரூ.17,000 ஆக கடந்த 10 நாட்களுக்கு முன் இருந்த அது, 3 நாட்களுக்கு ரூ.1,000 வீதம் நேற்று ரூ.19,784 ஆனது. ஒரு கிராம் ரூ.39ம், பவுனுக்கு ஸி312ம் உயர்ந்தது. இன்றோ அல்லது நாளையோ அது ரூ.20,000 ஆகலாம்.

8 நாளில் ரூ.2,328 உயர்வு

இந்த மாத துவக்கம் முதல் தங்கத்தின் விலை வரலாறு காணாத வகையில் உயர்ந்து வருகிறது. கடந்த 8 வர்த்தக நாளில் மட்டும் ஆபரண தங்கம் கிராமுக்கு ஸி291ம் சவரனுக்கு ரூ.2,328ம் அதிகரித்துள்ளது. அதாவது கடந்த 1ம் தேதி 17,456க்கு விற்பனையான ஒரு சவரன் தங்கம் நேற்று ரூ.19,784க்கு விற்பனையானது. கடந்த 8 வர்த்தக தினங்களில் 7 நாட்கள் உயர்வுடன் இருந்த தங்கம் விலை, ஒரே ஒரு நாள் மட்டும் சரிந்து காணப்பட்டது. இந்த ஆண்டில் மட்டும் ரூ.4,000 உயர்ந்துள்ளது.