தொலைக்காட்சி பெட்டியினால் புதுமணத் தம்பதிகளிடையே பிரச்சினை

by **நண்பன்** Thu 1 Sep 2011 - 11:30

தொலைக்காட்சி பெட்டியினால் புதுமணத் தம்பதிகளிடையே பிரச்சினை
தொலைக்காட்சி பெட்டிகள் எவ்விதம் சிலரின் இல்லற வாழ்க்கைக்கு தீங்கிழைக்கின்றது என்பதை எடுத்து காட்டும் ஒரு உண்மைச் சம்பவம் மீகாவத்தை எனும் இடத்தில் சமீபத்தில் இடம்பெற்றது. இதுபோன்ற பல சம்பவங்கள் இலங்கைக்கு தொலைக்காட்சி சேவை அறிமுகமான 1978 ம் ஆண்டிலும் 1982ம் ஆண்டிலும் இடம்பெற்றன.

தொலைக்காட்சி சேவை நம் நாட்டில் அறிமுகமான புதிதில் எல்லா வீடுகளிலும் தொலைக்காட்சி பெட்டிகள் இருக்கவில்லை. பத்து,பதினைந்து வீடுகள் உள்ள ஒரு பகுதியில் ஒரே வீட்டில் மாத்திரமே தொலைக்காட்சி பெட்டி ஒன்று இருக்கும். இதனால் மற்ற வீடுகளில் இருக்கும் சராசரியாக முப்பது நாற்பது பேர், அந்த வீட்டை மாலை 5 மணிமுதல் இரவு 10.30மணிவரை முற்றுகையிட்டு சம்பந்தப்பட்ட வீடுகளில் உள்ளவர்களுக்கு அசெளகரியங்களை பல மாதங்களாக ஏற்படுத்திவருவதுண்டு. காலப்போக்கில் தொலைக்காட்சி பெட்டிகள் சிறிய சேரி வீடுகளிலும் இருக்க தொடங்கியதையடுத்து, இப்பிரச்சினை முடிவு பெற்றது. ஆயினும் நாம் ஆரம்பத்தில் குறிப்பிட்ட மீகாவத்த பிரதேசத்தில் ஒரு இளம் கணவனும், மனைவியும் தாங்கள் காதல் திருமணத்தையடுத்து மகிழ்ச்சியோடு வாழ்ந்து கொண்டிருந்த போது தொலைக்காட்சிப் பிரியன் என்ற போர்வையில் அடுத்த வீட்டில் வசிக்கும் ஒரு காதல் மன்னன் அந்த வீட்டில் அடியெடுத்து வைத்தான்.

முதலில் கணவன் இருக்கும் போது அவ்வீட்டுக்கு வந்து தொலைக்காட்சியில் காண்பிக்கப்படும் நாடகங்களை பார்த்து வந்த அடுத்தவீட்டு மன்மதன், கணவன் இல்லாத போதும் தொலைக்காட்சி பார்ப்பதாக வீட்டிற்குள் நுழைவான். இதனால் கணவன் மனைவியை சந்தேகப்பட ஆரம்பித்தான். இதனால் ஏற்பட்ட குடும்பப்பிரச்சினை இறுதியில் பொலிஸார் ஒருவர் முன்னிலையில் சமரசமாக தீர்த்து வைக்கப்பட்டது.

நான் அவனை காதலிக்கவில்லை. வீட்டில் வேலையாட்கள் இல்லாதபடியால் அவனை கடைக்கு அனுப்பி பொருட்களை வாங்குவேன். அந்த அறிமுகத்தில் தான் அவன் வீட்டுக்கு வந்து தொலைக்காட்சி பார்ப்பான். நான் தனியாக இருக்கும் போதும் வீட்டுக்கு வந்து தொலைக்காட்சி பார்ப்பான். அப்போது அவன் என்னை உற்றுப்பார்த்து கொண்டு இருப்பானேயொழிய என்னுடன் முறைகேடாக நடந்ததில்லை என்று அவள் பொலிஸாரிடம் தெரிவித்தாள்.

சரி, இனி உன் கணவன் உனக்கு வீட்டுப்பொருட்களை வாங்கி வருவான். இனிமேல் அவனை வீட்டுக்குள் அனுமதிக்காதே என பொலிஸார் புத்திமதி கூறி கணவன்,மனைவி இருவரையும் சமாதானப்படுத்தி வீட்டுக்கு அனுப்பி வைத்தனர்.