சி.பி.ஐ.க்கு பயந்து வெளிநாட்டுக்கு தப்பி ஓட முயன்ற ஜனார்த்தன ரெட்டி

by **நண்பன்** Fri 9 Sep 2011 - 9:39

கர்நாடக முன்னாள் மந்திரி ஜனார்த்தன ரெட்டி இரும்பு சுரங்க
முறைகேட்டில் ஈடுபடுவதாக புகார்கள் எழுந்தன. இதையடுத்து சி.பி.ஐ. சில
நாட்களுக்கு முன்பு அவரது வீடு மற்றும் அவருக்கு சொந்தமான பல்வேறு
நிறுவனங்களில் அதிரடி சோதனை நடத்தினர். இதில் அவர் பல கோடி அளவுக்கு
முறைகேடு செய்திருப்பது தெரிய வந்தது.

இதையடுத்து
அவர் கைது செய்யப்பட்டு சிறையில் அடைக்கப்பட்டார். சி.பி.ஐ. விசாரணையில்
அவர் ஆந்திர மாநிலத்தில் உள்ள ஒடிலாபுரம் இரும்பு சுரங்கத்தை ராஜசேகர
ரெட்டி ஆட்சியின்போது குத்தகைக்கு எடுத்தார். ஆனால் அவர் குத்தகை நிலம்
தவிர கூடுதல் இடங்களை ஆக்கிரமித்து இரும்புத்தாது எடுத்துள்ளார். இதனால்
அரசுக்கு பெரும் வருமான இழப்பு ஏற்பட்டிருப்பது கண்டுபிடிக்கப்பட்டது.

ஜனார்த்தன
ரெட்டி நிறுவனங்களில் சில வெளிநாட்டு நிறுவனங்களும் பங்குதாரராகி உள்ளன.
இரும்பு சுரங்கம் மூலம் பல்லாயிரம் கோடி அளவுக்கு சம்பாதித்த ஜனார்த்தன
ரெட்டி இந்தோனேஷியாவின் சுமத்ரா தீவிலும் காலடி பதித்தார். அங்குள்ள
நெல்பரோ பகுதியில் 438 ஏக்கர் நிலத்தை குத்தகைக்கு எடுத்து இரும்பு
சுரங்கம் நடத்துகிறார்.

ஜனார்த்தன ரெட்டி
சிட்பண்ட் நிறுவனமும் நடத்தி வருகிறார். சில மாதங்களுக்கு முன்பு அவர்
சிட்பண்ட் மூலம் வசூலான பணம் மூலம் ரஜினிகாந்த், சிரஞ்சீவி ஆகியோரை வைத்து
பிரமாண்ட படம் தயாரிக்க திட்டமிட்டிருந்தார். இப்படங்கள் மூலம் கிடைக்கும்
லாபத்தை சிட்பண்ட் வாடிக்கையாளர்களுக்கு திருப்பித்தர திட்டம் ஒன்றை தீட்டி
இருந்தார்.

இரும்பு சுரங்க ஊழலில் சி.பி.ஐ.
தன்னை கைது செய்து விடுமோ என்று ஜனார்த்தன ரெட்டி கடந்த சில மாதங்களாகவே
கலக்கத்தில் இருந்துள்ளார். இதனால் அவர் ஐரோப்பாவில் ஒரு குட்டித் தீவை
விலைக்கு வாங்கினார். ஒருவேளை சி.பி.ஐ. தன்னை கைது செய்ய முயன்றால் அந்த
தீவுக்கு தப்பி ஓட திட்டமிட்டிருந்தார். ஆனால் அவர் வெளிநாட்டுக்கு தப்பி
ஓடுவதற்கு முன்பே சி.பி.ஐ. அவரை பொறி வைத்து பிடித்து கைது செய்தது.