பிணை கிடைத்ததால் கொண்டாட்டம் உறவினர்களை கண்டித்த நீதிபதி

by *சம்ஸ் Fri 25 Nov 2011 - 9:43

பிணை கிடைத்ததால் கொண்டாட்டம் உறவினர்களை கண்டித்த நீதிபதி
ஸ்பெக்ட்ரம் வழக்கு விசாரணை நேற்று முன்தினம் டில்லியில் உள்ள சி. பி. ஐ. தனி நீதிமன்றத்தில் நீதிபதி ஓ. பி. சைனி முன்னிலையில் நடைபெற்றது.

அப்போது இந்த வழக்கில் குற்றம் சாட்டப்பட்டுள்ள முன்னாள் மத்திய மந்திரி ஆ. ராசா, கனிமொழி உள்ளிடட அனைவரும் நீதிமன்றத்தில் ஆஜர்படுத்தப்பட்டு இருந்தனர்.

எச். டி. எப். சி. வங்கியின் உதவி துணைத் தலைவர் உதய் சகாஸ்ராபுத்தேயிடம் குறுக்கு விசாரணை நடைபெற்று கொண்டிருந்த போது சஞ்சய் சந்திரா, வினோத் கோயங்கா, ஹரிநாயர், கவுதம் தோஷி, சுரேந்திர பைபரா ஆகிய 5 அதிகாரிகளுக்கு உச்ச நீதிமன்றம் பிணை வழங்கியது பற்றிய தகவல் கிடைத்தது.

அப்போது அவர்கள் 5 பேரும் தங்கள் இருக்கையில் இருந்து துள்ளி எழுந்து ஒருவருக்கு ஒருவர் கைகுலுக்கி தங்கள் வாழ்த்துக்களைத் தெரிவித்துக் கொண்டனர். உறவினர்களுடனும் மகிழ்ச்சியை பகிர்ந்து கொண்டார்கள். சிலருடைய உறவினர்கள் இனிப்பும் வழங்கினார்கள். பிணை பெற்ற 5 பேருக்கும், அவர்களுடைய உறவினர்களுக்கும் ஆ. ராசா, கனிமொழி உள்ளிட்ட மற்றவர்களும் வாழ்த்து தெரிவித்தனர்.

இதனால் நீதிமன்ற அறையில் சிறிது நேரம் பரபரப்பும், குழப்பமும் ஏற்பட்டது. இதைத் தொடர்ந்து நீதிபதி குற்றம் சாட்டப்பட்டவர்களின் உறவினர்களையும், நிருபர்களையம் பார்த்து ‘விசாரணைக்கு இடையூறாக இருக்காதீர்கள் வெளியே போங்கள்’ என்றார்.