சுயநலமற்ற சேவையை வழங்கத் தவறின் உள்@ராட்சி அதிகாரம் ஆணையாளரிடம்

விருப்பு வாக்குக்கான செயற்பாட்டை விட்டு மக்களுக்கு சேவையாற்றுங்கள் -ஜனாதிபதி
லோரன்ஸ் செல்வநாயகம்
சுயநலமற்ற சேவையை மக்களுக்கு வழங்கத் தவறினால் உள்ளூராட்சிச் சபைகளின் அதிகாரங்களை ஆணையாளர்களுக்குக் கையளிக்க நேரிடும் என ஜனாதிபதி மஹிந்த ராஜபக்ஷ அவர்கள் தெரிவித்தார்.

விருப்பு வாக்குக்காக செயற்படுவதை விடுத்து நாட்டின் மீது அக்கறைகொண்டு செயற்பட முன்வரவேண்டும் என குறிப்பிட்ட ஜனாதிபதி; பொறுப்பற்ற விதத்தில் செயற்பட்டால் புதிய உள்ளூராட்சிச் சபைச் சட்ட திட்டங்களுக்கேற்ப தீர்மானங்களை எடுக்க நேரிடும் எனவும் தெரிவித்தார்.

அலரி மாளிகையில் நேற்று நடைபெற்ற தேசிய உள்ளூராட்சி மாநாட்டில் பிரதம அதிதியாகக் கலந்துகொண்டு உரையாற்றிய போதே ஜனாதிபதி இவ்வாறு தெரிவித்தார். அமைச்சர்கள் ஏ. எல். எம். அதாவுல்லா, பசில் ராஜபக்ஷ, எஸ். பி. நாவின்ன உட்பட அமைச்சர்கள், மாகாண முதல்வர்கள், ஆளுநர்கள் மற்றும் நாடளாவிய ரீதியிலிருந்து மாநாட்டில் கலந்து கொண்ட உள்ளூராட்சிச் சபைகளின் பிரதிநிதிகள் மத்தியில் உரையற்றிய ஜனாதிபதி தமதுரையில் மேலும் தெரிவிக்கையில் :-

அரசாங்கத்தின் அபிவிருத்திப் பயணத்தில் முழுமையான பங்களிப்பை உள்ளூராட்சிச் சபைப் பிரதிநிதிகள் வழங்கி வருகின்றனர். அதனால் தான் அரசாங்கம் உள்ளூராட்சிச் சபைகளுக்கு அதிகளவு நிதியினை வழங்கி வருகிறது. பாராளுமன்ற உறுப்பினர்கள்; அமைச்சர்களுக்கு வழங்கப்படும் நிதியை விட அதிகமான நிதி உள்ளூராட்சிச் சபைத் தலைவர்களுக்கு வழங்கப்பட்டு வருகிறது.

நேற்று முன்தினம் அலரி மாளிகையில் பல புதிய வெளிநாட்டுத் தூதுவர்கள் தமது நியமனக் கடிதங்களை கையளிக்க வருகை தந்திருந்தார்கள். அவர்கள் அனைவருமே எமது நகர்ப்புறங்களின் எழிலையும் தூய்மையையும் வியந்து பாராட்டினர். அதனைக் கேட்க பெரும் மகிழ்ச்சியாய் இருந்தது.

சகல நகரங்களையும் கிராமங்களையும் அவ்வாறு வைத்திருக்க முடியுமானால் எவ்வளவு நல்லது. எமக்கு நீண்ட வரலாறு உள்ளது. கடந்த காலங்களில் கிராம சபைகள் மூலமே மக்களின் சகல பிரச்சினைகளுக்கும் தீர்வு காணப்பட்டன. ஏனைய நாடுகளுக்கு முன்மாதிரியாக செயற்பட எம்மால் முடிந்துள்ளது. ஆசிரியர்களுக்கு உரிய சன்மானம் வழங்கும் பழக்கத்தை எமது அரசர்களே ஆரம்பித்துள்ளனர்.

தற்போது சில உள்ளூராட்சிச் சபைகளில் மோசடிகள் நடக்கின்றன. நிதியை முறையாகப் பயன்படுத்துவதில்லை. வாக்குகளை நோக்கமாகக் கொண்டே செயற்பாடுகள் முன்னெடுக்கப்படுகின்றன.

வாக்குகள் சில குறையுமென்றால் கிடைக்கவுள்ள பதவி பறிபோகாது. அந்த விடயத்தில் உள்ளூராட்சிச் சபை உறுப்பினர்கள் பயப்படத் தேவையில்லை. விருப்பு வாக்கு முறையை நாம் தொடர்ச்சியாக வைத்திருக்கப் போவதில்லை. விருப்பு வாக்கை மறந்து நாட்டு மக்களுக்கு முறையாக சேவை செய்வதில் அக்கறை கொள்ளுங்கள்.

30 வருடங்களுக்குப் பின் வடக்கு கிழக்கு உட்பட சகல உள்ளூராட்சிச் சபை பிரதிநிதிகளும் இம் மாநாட்டுக்கு வருகை தந்திருப்பது மகிழ்ச்சி தருகிறது. குறிப்பாக வடக்கு பிரதிநிதிகள் வந்துள்ளனர்.

எந்தக் கட்சியில் இருந்தாலும் மக்களிடம் குரோதம், வைராக்கியத்துடன் செயற்பட வேண்டாம். பிரிவினை ஒருபோதும் வேண்டாம். அத்தகைய செயற்பாடுகள் நாட்டையே சீரழித்து விடும்.

இந்த நாட்டை மீளக் கட்டியெழுப்ப நாம் பட்ட கஷ்டங்கள் போதும். இனியும் அனைவரும் அதனை உணர்ந்து செயற்படுவது அவசியம். ஒத்துழைப்புடன் செயற்படுவோம் ஒரே தாயின் பிள்ளைகள் போல் இணைந்து மக்களுக்காக உழைப்போம் எனவும் ஜானதிபதி மேலும் தெரிவித்தார்.

சில நிமிடங்கள் தமிழில் உரையாற்றிய ஜனாதிபதி; மக்கள் சேவை மிக முக்கியமானதும் பொறுப்பு வாய்ந்ததுமாகும். நாம் எல்லோரும் அதற்காக ஒன்றுபட வேண்டும். அதற்கான சகல உதவிகளையும் செய்வதற்கு நாம் தயாராகவுள்ளோம் எனவும் தெரிவித்தார்.

இந்நிகழ்வில் உள்ளூராட்சிச் சபைகளின் முகாமைத்துவச் செயற்பாடுகள், திண்மக் கழிவு அகற்றலில் சிறப்பாகச் செயற்பட்ட சபைகளுக்கு ஜனாதிபதியினால் விருதுகளும் பணமும் வழங்கி கெளரவிக்கப்பட்டது. அமைச்சர் ஏ. எல். எம். அதாவுல்லா மேற்படி மாநாட்டைக் குறிக்கும் நினைவுச் சின்னமொன்றை ஜனாதிபதி அவர்களுக்கு வழங்கி கெளரவித்தமை குறிப்பிடத்தக்கது. (ஸ)

நல்ல தகவல் பகிர்வுக்கு நன்றி