சத்துணவு சாப்பிடும் மாணவர்களுக்கு பால் கலந்த மாம்பழ ஜூஸ் விரைவில்

by **நேசமுடன் ஹாசிம்** Sat 24 Dec 2011 - 16:47

சத்துணவு சாப்பிடும் மாணவர்களுக்கு பால் கலந்த மாம்பழ ஜூஸ் விரைவில் வழங்கப்படும் என்று அமைச்சர் மாதவரம் மூர்த்தி கூறினார். செங்குன்றம் அரசு ஆண்கள், பெண்கள் மேல்நிலைப்பள்ளிகளில் படிக்கும் பிளஸ் 2 மாணவர்களுக்கு இலவச சைக்கிள் வழங்கும் விழா நேற்று மாலை நடந்தது.
ஆண்கள் பள்ளி தலைமை ஆசிரியர் வரதராஜன் தலைமை வகித்தார். பேரூராட்சி கவுன்சிலர்கள் கோகுல் வைத்தீஸ்வரன், கவிஞர் திருநாவுக்கரசு, அப்துல் ரபீக், ஜாகீர் உசேன் முன்னிலை வகித்தனர். அதிமுக நகர செயலாளர் ரமேஷ் வரவேற்றார். விழாவில் 399 மாணவிகள், 169 மாணவர்களுக்கு இலவச சைக்கிள்களை அமைச்சர் மூர்த்தி வழங்கினார். அப்போது அவர் பேசுகையில், ‘‘பள்ளியில் சத்துணவு சாப்பிடும் மாணவர்களுக்கு பால் கலந்த மாம்பழ ஜூஸ் விரைவில் வழங்கப்படும். இந்த பள்ளியில் பிளஸ் 2 முடித்து செல்லும் மாணவர்களுக்கு முன்பணமாக அரசு வங்கிகளில் பாண்டு பத்திரம் மூலம் ரூ.2 ஆயிரம், பிளஸ் 1 முடித்த மாணவர்களுக்கு ரூ.1,500 வழங்கப்படும். மேலும் மடிக்கணினி விரைவில் மாணவர்களுக்கு வழங்கப்படும்’’ என்றார். விழாவில் கட்சி நிர்வாகிகள் ரமேஷ், சேரன், ஜம்புலிங்கம், உதயன், குருசாமி உள்ளிட்ட பலர் கலந்து கொண்டனர். பெண்கள் பள்ளி தலைமை ஆசிரியை கற்பகம் நன்றி கூறினார்.