தயாநிதி மாறனுக்கு எதிராக உச்சநீதிமன்றத்தில் மனு

by *சம்ஸ் Sat 7 Jan 2012 - 6:24

தயாநிதி மாறனுக்கு எதிராக உச்சநீதிமன்றத்தில் மனு
தொலைத்தொடர்பு துறை, சி.பி.ஐக்கு உத்தரவு
2ஜி அலைக்கற்றை விவகாரத்தில் தயாநிதி மாறனை மத்திய அரசு பாதுகாப்பதாக உச்ச நீதிமன்றில் மனுதாக்கல் செய்யப்பட்டு உள்ளது. இது தொடர்பாக மத்திய தொலைத் தொடர்பு துறை, சி. பி. ஐ. அமுலாக்கப் பிரிவு ஆகியவற்றுக்கு உத்தரவு அனுப்பப்பட்டு உள்ளது.

பொதுநல வழக்குகளுக்கான மையம் சார்பில் உச்ச நீதிமன்றில் தாக்கல் செய்யப்பட்ட மனுவில் கூறப்பட்டு இருப்பதாவது :-

2ஜி அலைக்கற்றை விவகாரத்தில் புகார் எழுந்ததால், மத்திய ஜவுளித்துறை மந்திரி பதவியை தயாநிதி மாறன் கடந்த ஆண்டு ராஜினாமா செய்தார். அவரிடம் சி. பி. ஐ. அமுலாக்கப் பிரிவு ஆகியவை விசாரணை நடத்தின. இருப்பினும், தயாநிதி மாறன் அலைக்கற்றை வழக்கில் குற்றம் சாட்டப்பட்டவராக சேர்க்கப்படவில்லை. அவர் மீது குற்றப் பத்திரிகையும் தாக்கல் செய்யப்படவில்லை.

தயாநிதி மாறன் மீது முதல் தகவல் அறிக்கை பதிவு செய்யப்பட்ட பிறகு, சி. பி. ஐ. எந்த நடவடிக்கையும் எடுக்கவில்லை. அந்த அளவுக்கு தயாநிதி மாறனை மத்திய அரசு பாதுகாக்கிறது. ஏர்செல் நிறுவன அதிபர் சிவசங்கரனை தயாநிதி மாறன் நிர்ப்பந்தப்படுத்தி, மலேசியாவைச் சேர்ந்த மேக்சிஸ் நிறுவனத்துக்கு ஏர்செல்லை விற்கச் செய்ததற்கு முதல் நோக்கிலேயே ஆதாரம் உள்ளது.

ஏர்செல் நிறுவனம் மேக்சிஸ் நிறுவனத்துக்கு விற்கப்பட்ட பிறகுதான், அந்நிறுவனத்துக்கு அலைக்கற்றை உரிமத்தை தயாநிதி மாறன் கொடுத்துள்ளார். இவ்வாறு மனுவில் கூறப்பட்டுள்ளது. நோட்டீசு இம்மனு, நீதிபதிகள் ஜி. எஸ். சிங்வி, ஏ. கே. கங்குலி ஆகியோர் அடங்கிய சிறப்பு பெஞ்ச் விசாரணைக்கு வந்தது.

மனுதாரர் சார்பில் மூத்த வழக்கறிஞர் பிரசாந்த் பூஷண் ஆஜராகி வாதாடினார். அப்போது அவர், தயாநிதி மாறனை மத்திய அரசு பாதுகாப்பதாக குற்றம் சாட்டினார். மேலும், எஸ்ஸார் நிறுவனத்துக்கு எதிரான விசாரணையில் மத்திய சட்ட மந்திரி சல்மான் குர்ஷித் தலையிடுவதாகவும் கூறினார். அவரது வாதத்தை கேட்ட நீதிபதிகளி, மனுவுக்கு பதில் அளிக்குமாறு, மத்திய தொலைத்தொடர்பு துறை, சி. பி. ஐ. அமுலாக்கப் பிரிவு ஆகியவற்றுக்கு உத்தரவு அனுப்ப உத்தரவிட்டனர்.