இராணுவத்துக்கு கிலானி திடீர் பாராட்டு

இராணுவத்துக்கு கிலானி திடீர் பாராட்டு
பாகிஸ்தானில் நிலவும் அசாதாரண சூழ்நிலைக்கு முற்றுப்புள்ளி வைக்க இராணுவத் தலைமையுடன் சமரசமாக செல்ல பிரதமர் கிலானி முயற்சி மேற்கொண்டுள்ளார்.

இஸ்லாமாபாத்தில் கடந்த சனிக்கிழமை நடைபெற்ற ஆலோசனைக் கூட்டத்தில் இராணுவத் தலைமைத் தளபதி கயானி மற்றும் முக்கிய அமைச்சர்கள் கலந்து கொண்டனர்.

இதில் பேசிய பிரதமர் கிலானி, பாகிஸ்தானை தாங்கி நிற்கும் தூணாக இராணுவம் விளங்குகிறது என்று புகழாரம் சூட்டினார்.

நாடாளுமன்ற ஜனநாயகத்தை வலுப்படுத்த அரசியல் சாசன அமைப்புகள் அனைத்தும் ஒன்றிணைந்து செயல்பட வேண்டும் என்றும் அவர் கேட்டுக் கொண்டார். இதன் பின்னர் செய்தியாளர்களிடம் பேசும் போதும், பிரதமர் கிலானி இராணுவத்தைப் பாராட்டிப் பேசினார். இதுவரை இராணுவத்தை விமர்சித்து வந்த பிரதமர், திடீரென பாராட்டி பேசியிருப்பது அவர் சமரசமாக செல்ல விரும்புவதை உணர்த்துவதாக அரசியல் நோக்கர்கள் தெரிவித்துள்ளனர். ஆனால் இராணுவத் தளபதி கயானி தனது நிலையில் இருந்து இறங்கி வரவில்லை என்று கூறப்படுகிறது.

மெமோகேட் விவகாரத்தில் இராணுவத் தளபதி, ஐ. எஸ். ஐ. தலைவர் ஆகியோர் குறித்து பிரதமர் தெரிவித்த கருத்துக்கு அவர் மன்னிப்பு கோர வேண்டும் என்று இராணுவத் தரப்பில் வலியுறுத்தப்பட்டிருப்பதாகத் தெரிகிறது.