நபிகள் நாயகம் தொடர்பில் சர்ச்சைக்குரிய கருத்துத் தெரிவித்தவர் நாடு கடத்தல்

by **முனாஸ் சுலைமான்** Mon 13 Feb 2012 - 12:26

நபிகள் நாயகம் (ஸல்) தொடர்பில் சர்ச்சைக்குரிய கருத்தை வெளியிட்டமையால் தண்டனைக்கு அஞ்சி மலேஷியாவுக்குத் தப்பிச்சென்ற இளம் எழுத்தாளரை மலேஷியா சவூதிக்குத் திருப்பி அனுப்பியுள்ளது. ஹம்சா கஷ்காரி (23) என்ற இளம் எழுத்தாளர் நபிகள் நாயகத்தின் பிறந்த நாளையொட்டி தனது டுவிட்டரில் செய்தியொன்றை வெளியிட்டார். இவர் தனது டுவிட்களை பதிவு செய்து சில மணி நேரத்திலேயே இவரது கருத்துக்கு பலத்த எதிர்ப்புக் கிளம்பியது. கஷ்காரி புனித இஸ்லாம் மதத்தினை அவமதித்தாகவும், தனது மதத்திற்கே துரோகம் செய்துள்ளதாகவும் இவரின் கருத்துக்கு எதிர்ப்புக் கிளம்பியது. இதனையடுத்து உடனே தனது டுவிட்களை அழித்த ஹம்சா கஷ்காரி தன்னை மனிக்குமாறும் வேண்டுகோள் விடுத்தார். எனினும் இவரது டுவிட் படு வேகமாக இணையத்தில் பரவத்தொடங்கியது.

இதனால் இவரது நிலைமை மேலும் மோசமாகியது.

அவருக்கெதிராக மக்களின் எதிர்ப்பு அதிகரிக்கவே அந்நாட்டு மன்னர் கஷ்காரியை கைது செய்யும்படி உத்தரவிட்டார். இதையடுத்து ஹம்சா ஆசிய நாடொன்றுக்குத் தப்பிச் சென்றுள்ளதாகத் தெரிவிக்கப்பட்டது. இவ்வாறு தப்பிச்சென்ற ஹம்சா கஷ்காரி மலேஷியாவுக்கே சென்றுள்ளதாகவும் இஸ்லாமிய நாடான மலேஷியா இவரை மீண்டும் சவூதிக்குத்திரும்ப அனுப்பி விட்டதாகவும் தெரிவிக்கப்படுகிறது.