அசத்துகிறார் "குட்டி' பாகவதர்

கர்நாடக சங்கீதம் தற்போது இளைய தலைமுறையினருடைய இசை ஆர்வத்தால் அபார வளர்ச்சி அடைந்துள்ளது. படிப்பு, விளையாட்டு, சங்கீதம் எல்லாமே இன்றைய தலைமுறையினரை கவர்ந்து இருக்கிறது. மயிலப்பூர் ஸ்ரீ தியாகராஜ வித்வத் சமாஜ வளாகத்தில் பதினோரு வயதே ஆன ஸ்ரீ கிருஷ்ணா குட்டி பைஜாமா குர்தாவுடன் ஒரு குட்டி பாகவதராக மேடையில் அமர்ந்து பாடிய விதம் மனதை கவர்ந்தது.
இசையையும், நடனத்தையும் கற்றுக் கொடுப்பதற்காகவே துபாயிலிருந்து இந்தியா வந்திருக்கும் நந்தா - ரவிசங்கர் தம்பதிகளுடைய செல்வங்களான மாதங்கியும், மாஸ்டர் ஸ்ரீ கிருஷ்ணாவும் முறையே நடனத்திலும், இசையிலும் இளம் வயதிலேயே திறமை சுடர் விட பல மேடைகளில் தோன்றி புகழ் பெற்றவர்கள் என்பது குறிப்பிடத்தக்கது.
இந்த நிகழ்ச்சியில், மாஸ்டர் ஸ்ரீ கிருஷ்ணா பாடிய ஸ்ரீ தியாகராஜ சுவாமிகளுடைய சிறப்பான பொருள் அமைந்த முத்தான கீர்த்தனை தேர்வு பாராட்டும்படி இருந்தன. குரு சாவித்திரியின் சிறப்பான பயிற்சியையும், குழந்தைக்கு ஏற்ற முறையில் கடும் பயிற்சி அளித்துள்ள அவருடைய அக்கறையும் நிகழ்ச்சியில் நன்றாகவே தெரிந்தது.
இவ்வளவு சிறு வயதில் காபி நாராயணி ராகத்தில் சரச சாமதான பேத தண்ட சிந்ந நாட (கலாநிதி) நா ஜீவாதார (பிலஹரி), நாத தநுமணிசம் (சித்த ரஞ்சனி) போன்ற கீர்த்தனங்களின் சங்கதிகளை எந்த பிசகும் இல்லாமல் துல்லிய சுருதியுடன் கணீரென்று பாடியது அபாரம். மைசூர் வாசுதேவாச்சாருடைய புகழ்பெற்ற "ப்ரோச்சேவா' (கமாஸ்) கீர்த்தனத்தின் ஒவ்வொரு சங்கதி விரிவுகளும் மனதை கவரும் விதத்தில் இருந்தது. பிரதானமாக ஸ்ரீ தியாகராஜ சுவாமிகளுடைய புகழ்வாய்ந்த ஸ்ரீ ரகுவர (காம்போதி) கீர்த்தனத்தை மதுரமாக பாடியது மெச்சும்படி இருந்தது.
தொடர்ந்து ராமநாதபுரம் சீனிவாச அய்யங்காருடைய பரஸ் ராக தில்லானாவும் ஸ்ரீ கிருஷ்ணாவின் ஆர்வத்திற்கும், உழைப்பிற்கும் நல்ல உதாரணமாக விளங்கின. இவ்வளவு இசை ஆர்வம் இந்த வயதிலேயே உள்ளது வியக்க வைத்தது. வயலினில் ஸ்ரீ கிருஷ்ணாவின் சகோதரி மாதங்கியின் படுஅனுசரணையான வாசிப்பு பாராட்ட வைத்தது. பாட்டை ஒட்டியே கச்சிதமாக அனாவசியம் இல்லாமல் வாசித்த விதம் மனம் கவர்ந்தது. எஸ்.சங்கரநாராயணன் மிருதங்க வாசிப்பு சற்று சப்தம் அதிகமாக இருந்ததோடு மேலும் சற்று அனுபவம் தேவை என்று நினைக்க வைத்தது. ஸ்ரீ தியாகராஜ வித்வத் சமாஜம் இப்படி வயதில் இளைய கலைஞர்களை ஆதரிப்பதை அவசியம் பாராட்டலாம். -மாளவிகா.