ஜப்பானில் உணவு விஷமாகியதால் 950 குழந்தைகள் சுகவீனம்

by *சம்ஸ் Wed 16 Feb 2011 - 6:30

ஜப்பான் ஹொக்கெய்டோ தீவிலுள்ள 9 பாடசாலைகளைச் சேர்ந்த 950 இற்கும் மேற்பட்ட பள்ளிக்குழந்தைகள் உணவு விஷமாகியதன் காரணமாக தீடீரென சுகவீனமுற்றுள்ளனர்.

அத்துடன் 13 குழந்தைகள் இவாமிஸாவாவிலுள்ள வைத்தியசாலையில் அனுமதிக்கப்பட்டுள்ளதோடு 48 ஆசிரியர்கள் மற்றும் பாடசாலை ஊழியர்களும் இதனால் பாதிக்கப்பட்டுள்ளனர்.

மேற்குறிப்பிட்ட பாடசாலைகள் இவ்வார இறுதிவரை மூடப்பட்டுள்ளன.

ஜப்பானில் இவாமிஸாவா போன்ற பல நகரங்களில் முக்கியமான உணவுச்சாலைகள் பல பாடசாலைகளுக்கான உணவு விநியோகத்தில் ஈடுபடுகின்றன.

இச்சம்பவத்தின் பிரதிபலிப்பாக 3 உணவுச்சாலைகள் மூடப்பட்டுள்ளதுடன் மேலதிக விசாரணைகளும் முன்னெடுக்கப்பட்டுள்ளன.

மிஸோ சூப், சலாட், மரக்கறி மற்றும் இறைச்சி போன்ற உணவு வகைகளை உட்கொண்டதன் காரணமாக கடந்த வாரங்களில் சிறுவர்கள் சுகவீனமுறத் தொடங்கினர். அதேவேளை சிறுவர்களின் நிலை கவலைக்கிடமானதாக இல்லை என்றும் தெரிவிக்கப்படுகின்றது.

ஹொக்கெய்டோவின் சுகாதாரப்பிரிவினர் இச்சம்பவத்திற்குக் காரணம் ஸல்மொனெல்லா பக்ரீறியா என எண்ணுவதாகவும் எனினும் இது தொடர்பான விசாரணைகள் முன்னெடுக்கப்படும் எனவும் தெரிவித்துள்ளனர்.

நன்றி வீரகேசரி