அச்சுவேலி கைத்தொழில் பேட்டை இன்று அங்குரார்ப்பணம்

அச்சுவேலி கைத்தொழில் பேட்டை இன்று அங்குரார்ப்பணம்

அமைச்சர் பசில், இந்திய உயர்ஸ்தானிகர் ஆகியோர் அதிதிகள்


பாரம்பரிய கைத்தொழில்கள் மற்றும் சிறுதொழில் முயற்சி அபிவிருத்தி அமைச்சினால் புனரமைக்கப்பட்டு நவீன மயப்படுத்தப்பட்ட அச்சுவேலி கைத்தொழில் பேட்டையின் முதலாம் கட்டம் இன்று (27) புதன்கிழமை பொருளாதார அபிவிருத்தி அமைச்சர் பசில் ராஜபக்ஷ தலைமையில் அங்குரார்ப்பணம் செய்து வைக்கப்படும். இலங்கை, இந்திய அரசாங்கங்களின் நிதியுதவியின் கீழ் 275 மில்லியன் ரூபா செலவில் 65 ஏக்கர் காணியில் அச்சுவேலி கைத்தொழில் பேட்டை புனர் நிர்மாணம் செய்யப்பட்டுள்ளதாக அமைச்சின் செயலாளர் வி. சிவஞானசோதி தெரிவித்தார்.
மோதலுக்குப் பின்னர் இலங்கையில் ஸ்தாபிப்பதற்கு தீர்மானிக்கப்பட்டுள்ள ஐந்து கைத்தொழில் பேட்டைகளில் ஒன்றே அச்சுவேலி கைத்தொழில் பேட்டையாகும்.
மோதல் காரணமாக 1991 ஆம் ஆண்டு முதல் அச்சுவேலி கைத்தொழில் பேட்டையின் செயற்பாடுகள் முடக்கப்பட்டிருந்தது. பாரம்பரிய கைத்தொழில்கள் மற்றும் சிறுதொழில் முயற்சி அபிவிருத்தியமைச்சர் டக்ளஸ் தேவானந்தா தலைமையில் இது புனர்நிர்மாணம் செய்யப்பட்டுள்ளதுடன் நவீன மயப்படுத்தப்பட்டுள்ளது.
இதற்காக இந்திய அரசாங்கம் 225 மில்லியன் ரூபாவையும் இலங்கை அரசாங்கம் 50 மில்லியன் ரூபாவினையும் வழங்கியுள்ளது.
அமைச்சர் டக்ளஸ் தேவானந்தாவின் அழைப்பின் பேரில் பொருளாதார அபிவிருத்தியமைச்சர் பசில் ராஜபக்ஷவும் இலங்கைக்கான இந்திய உயர்ஸ்தானிகர் வை. கே. சின்ஹாவும் கைத்தொழில் பேட்டையை உத்தியோகபூர்வமாக திறந்து வைப்பர்.
அமைச்சின் அதிகாரிகள் 2011 ஆம் ஆண்டில் குறித்த பேட்டையை சென்று பார்த்தபோது, அது வெறும் காடாகவே இருந்தது. எல். ரீ.ரீ. ஈ. யினால் வைக்கப்பட்ட நிலக்கண்ணிவெடிகள் இராணுவத்தினரின் உதவியுடன் அகற்றப்பட்ட பின்னர் 65 ஏக்கர் நிலப்பரப்பில் மீண்டும் இந்த கைத்தொழில் பேட்டை கட்டியெழுப்பப்பட்டதாகவும் செயலாளர் வி. சிவஞானசோதி தெரி வித்தார்.
ஜனாதிபதி அவர்களின் மஹிந்த சிந்தனையில் சிறிய மற்றும் நடுத்தர கைத்தொழில்களுக்கு முக்கிய இடம் வழங்கப்பட்டுள்ளது.
அந்த வகையில், வடக்கிலுள்ள மக்களின் வாழ்க்கைத்தரத்தை உயர்த்த அச்சுவேலி கைத்தொழில் பேட்டை உதவுமென நம்புவதாகவும் அவர் கூறினார்.

தினகரன்