வாட்டும் வைரஸ்

by **ahmad78** Wed 21 Jan 2015 - 10:07

உடலில் துவங்கி நாம் பயன்படுத்தும் தகவல் தொழில்நுட்ப சாதனங்களையும் தாக்கி ஹேங்க் செய்கிறது வைரஸ். மழைக்காலங்களில் இதன் தாக்கம் அதிகமாகவே இருக்கும். வைரஸ், பாக்டீரியா, பூஞ்சை போன்ற கிருமிகள் நோய்ப்பரப்பும் வேலையை திறம்பட செய்கிறது. இவற்றில் நோய் பரப்பும் பணியில் அதி தீவிரமாக ஈடுபடும் வல்லமை வைரசுக்கே உண்டு. இந்தக் கிருமிகள் வளர்ந்து பெருகிப் பரவ மழைக்காலம் உகந்ததாக உள்ளது. மழைக்காலங்களில் இதன் தாக்கம் அதிகமாக இருக்கும். எந்த நோயை உருவாக்கினாலும் அதன் முதல் அறிகுறி காய்ச்சல் தான்.

வாட்டும் வைரசின் தாக்கம் மற்றும் அதிலிருந்து பாதுகாத்துக் கொள்வது குறித்து மருத்துவர் சசிக்குமார் கூறுகையில், “வைரஸ் நோய்க்கு ஆளானவர்கள் காலை நேரத்தில் இயல்பாக இருப்பார்கள். காய்ச்சல் மதிய வேளையில் தொடங்கி மாலையில் அதிகரிக்கும். காய்ச்சலுடன் உடல் சோர்வு, மூட்டு வலி, கண் எரிச்சல், வாந்தி, தசை இறுக்கம், வயிற்று வலி, தலை சுற்றல் போன்ற அறிகுறிகள் தென்படும். நோயாளி மற்றும் வைரசின் தன்மைக்கு ஏற்ப நோயின் அறிகுறிகள் மாறும்.

காய்ச்சல் வந்தால் உடனடியாக காய்ச்சலின் அளவைக் குறைக்க முயற்சி செய்ய வேண்டும். காய்ச்சல் அதிகமாவதால் உடலில் உள்ள செல்களின் நீர் அளவு குறைந்து ரத்தத்தில் உள்ள நீரின் அளவும் குறைகிறது. உடலில் தாதுக்கள் கடந்து போகும் நிலை குறைந்து உடல் சோர்வு ஏற்படுகிறது. இதனால் தண்ணீரை அதிகமாக அருந்தி உடல் சூட்டைக் குறைக்க வேண்டும். சுத்தமான துணியை தண்ணீரில் நனைத்து உடலில் சுற்றி விடலாம். குழந்தைகளுக்கு தொடர்ந்து காய்ச்சலின் அளவு அதிகரித்தால் வலிப்பு வர வாய்ப்புள்ளது.

இதனால் ஸ்பான்சிங் முறையை பயன்படுத்தி உடலின் வெப்ப அளவைக் குறைக்க வேண்டும். காற்றோட்டம் உள்ள அறையில் இருக்க வேண்டும். வைரசின் தாக்கத்தால் உடல் சக்தி இழந்து விடுகிறது. எனவே உணவுகளைத் தவிர்க்கக் கூடாது. எளிதில் ஜீரணமாகும் உணவுகளை எடுத்துக் கொள்ள வேண்டும். காய்ச்சலை சாதாரணமாக நினைத்து விட்டு விடமால் மருத்துவரை அணுகி உரிய சிகிச்சை எடுத்துக் கொள்ள வேண்டும். குழந்தைகளை தொடர்ந்து கண்காணிக்க வேண்டும்.

தினகரன்