சுவாசமே...

by **selvakumarm** Wed 3 Feb 2016 - 10:25

அன்பின் சக்திக்கு,
நேற்று தொடங்கியது போல் இருக்கிறது..
இது 100 வது பதிவு.
எனக்குத்தெரிந்ததை எழுதுகிறேன்.
தெரியாதது தேடி ஓடுகிறேன்.
புதுக்கோட்டை கணினித் தமிழ்ச்சங்கம் என்னை எழுதத்தூண்டியது இணையத்தில்.
ஆரம்பத்தில் என்னை எழுதவைத்த கலை இலக்கியப்பெருமன்றம்.
எப்போதும் எழுது எழுது என தூண்டிக்கொண்டிருக்கும் உன் அம்மா..கவிஞர் சுவாதி.
என் எழுத்துக்களை சிலாகிக்கும் நட்பு வட்டம். வலைப்பூ எழுத ஆரம்பித்தபின் கிடைத்த அபூர்வ தோழமைகள்.
நீ, சூர்யா உள்ளிட்ட அனைவருக்கும் என் நன்றிகள்.
இந்த 100இல் நான் முடிந்தவரை வீணான பதிவுகளை எழுதவில்லை என்ற திருப்தி இருக்கிறது.
எழுதியே ஆகவேண்டிய கட்டாயம் இல்லை..ஆனால் பின்னூட்டங்கள் மீண்டும் எழுதத்தூண்டுகிறது..
பின்னூட்டமிட்டு என்னை வளர்த்தெடுக்கும் அன்பு உள்ளங்களுக்கு என் தனி அன்பு..
இருக்கட்டும் சக்தி..
பள்ளிவாழ்க்கை மட்டுமேயான என் கல்வி முடிந்தபின்..
பாடங்கள் தாண்டியும் எது என்னை துடிப்புடன் வைத்திருக்கிறது.?
எல்லாப்பிரச்சனைகளையும் தாண்டி எது என்னை மூச்சுவிடச்செய்து கொண்டிருக்கிறது?
கொஞ்சமேனும் தமிழ் வார்த்தைகளை எது வழங்கியது?
எந்த சந்தேகமும் வேண்டாம்.
வாசிப்பு மட்டுமே என்னை வசிக்கவைத்திருக்கிறது.
புத்தகங்கள் பாராத நாள்...
துக்கநாள்.
வாசிக்கவேண்டும் சக்தி..
என்ன வேண்டுமானாலும் வாசி.
நீ வாசிக்கும் புத்தகங்கள் தான் உன்னை யோசிக்க வைக்கும்.
நூல்கள் இல்லாத வீட்டை கற்பனை செய்தும் பார்க்காதே.
புத்தகம் படிப்பது பற்றிய ஆயிரம் கருத்துகள் இருக்கலாம்.
மிக எளிமையாய் இதையும் சேர்த்துக்கொள்.
வாசிப்பு இல்லாமல் சுவாசிப்பதும் பயனில்லை..
முதலில் படி..
பின்
தேர்ந்து படி.
உங்கள் தலைமுறைக்கு படிக்க நிறைய இருக்கிறது..
பள்ளிப்பாடங்கள் தாண்டியும் படியுங்கள்.
படிப்பொன்றே
காணும் கடவுள்..

அன்புடன்.
செல்வக்குமார்.

http://naanselva.blogspot.com/2016/02/blog-post_3.html?m=1

by **நேசமுடன் ஹாசிம்** Wed 3 Feb 2016 - 10:45

எழுத்தோடு தொடருங்கள்
எழுத்து உங்களை அரசனாக்கிடும்
எழுத்து உங்களை ஆட்சிசெய்யும்
தொடருங்கள் மகிழுங்கள் வாழ்த்துகள்

by **Nisha** Wed 3 Feb 2016 - 13:37

100 ஆவது பதிவுக்கு வாழ்த்துகள்!
வாசிப்பை நேசித்தால் அதிகம் யோசிக்க மாட்டோம்! வாசிப்பு குறித்த கருத்து அருமை! நிரம்ப வாசியுங்கள், எழுதுங்கள், பாராட்டுகள்!