பத்து தலைமுறை கல்யாணப் பத்திரிகை

by **rammalar** Sun 22 Aug 2021 - 16:27

உங்கள் அப்பா, தாத்தா பெயர் உங்களுக்குத் தெரியும்.
சிலருக்கு அப்பாவின் தாத்தா வரைகூட தெரியும்.
தாத்தாவின் தாத்தா பெயர்?

தங்கள் பரம்பரையின் பெருமை பேசவும் கேட்கவும் விரும்பாத
நபர்களே இல்லை. ஆர்வம் அதிகமிருந்தாலும், அதிகபட்சம்
கொள்ளுத்தாத்தா வரை மட்டுமே தெரிந்துகொள்ள முடிகிறது.

ஆராய்ச்சியாளர்கள் வரலாற்று நாயகர்களின் பரம்பரையைக்
கண்டறிவார்கள். சாதாரண மக்களின் பரம்பரைகளைக் கண்டறிய
முடியுமா என்றால் மவுனமே பதிலாகக் கிடைக்கும்.
-
சுமார் பத்தாண்டுகளுக்கு முன்னர் குங்குமம் இதழில் வந்த
செய்தி:
---------------------------

பத்து தலைமுறை கல்யாணப் பத்திரிகை
-

பத்து தலைமுறை கல்யாணப் பத்திரிகை Kungum17

திருச்சியில் ஒரு விவசாயி, தன்னுடைய 10 தலைமுறை
மூதாதையர்களின் பெயர்களைக் கண்டறிந்துள்ளார். அவற்றை
மகனின் திருமண அழைப்பிதழில் அச்சிட்டும் அசத்தியுள்ளார்!

தலைமுறைகளைத் திரும்பிப் பார்க்க வைத்த இம்முயற்சி
குறித்து செல்வராஜிடம் கேட்டோம்...

‘‘எங்களது சொத்துகள் குறித்த ஆவணங்களை எடுத்துப் பார்த்தேன்.
அது குறித்து கிராம நிர்வாக அலுவலர், வட்டாட்சியர் அலுவலகங்களில்
கிடைத்த ஆவணங்களைப் பார்த்தேன். முதலில் மூன்று தலைமுறை
பெயர்கள் கிடைத்தது. முடிந்த வரை முன்னோர் பெயர்களைக்
கண்டறிவோம் என்று தேடினேன்.

ஆரம்பத்தில் கொஞ்சம் சுணக்கமாக இருந்தாலும், தொடர் முயற்சியால்,
பத்து தலைமுறையினர் பெயர்களைக் கண்டறிந்தேன். இதில் நான்,
என் மகன், பேரப் பிள்ளைகள் என 3 தலைமுறையினர் இப்போது
உள்ளனர்.

சேகரித்த பெயர்களை ஆக்கபூர்வமாகப் பயன்படுத்த வேண்டுமே...
மகன் திருமணம் வந்தது. அழைப்பிதழில் குடும்ப மரத்தையே
உருவாக்கினோம். மொத்தம் 10 தலைமுறைகளைச் சேர்ந்த
112 பெயர்களை அச்சிட்டிருந்தோம். அவர்களில் 84 பேர் இப்போது
உள்ளனர். அதில் 75 பேர் திருமணத்துக்கு வந்தனர். அவர்களுடன் குழுவாக
உட்கார்ந்து புகைப்படம் எடுத்துக்கொண்டது பெருமகிழ்வான நிகழ்வு.

எங்கள் தலைமுறையை ஊருக்குச் சொல்லியதில் குடும்பமே மகிழ்ச்சியாக
இருக்கிறது.

நன்றி- குங்குமம் 10-10-2011