கம்யூனிஸ்டு கூட்டணிக்கு மன்மோகன்சிங் விருப்பம்: மீண்டும் கை கோர்க்க முடிவு

புதுடெல்லி, ஆக. 9-

பிரதமர் மன்மோகன் சிங் தலைமையில் கடந்த 2006-ம் ஆண்டு மத்திய அரசு பதவி ஏற்ற போது, அந்த கூட்டணி அரசில் இடதுசாரிகள் முக்கிய பங்கு வகித்தனர். மந்திரி சபையில் இடது சாரிகள் பங்கேற்கா விட்டாலும், சபாநாயகர் பதவியை மார்க்சிஸ்ட் மூத்ததலைவர் சோம்நாத் சட்டர்ஜி ஏற்றார்.

கடந்த 2008-ம் ஆண்டு இந்தியா-அமெரிக்கா அணு ஒப்பந்தம் தொடர்பாக காங்கிரசுடன் கருத்து வேறுபாடு ஏற்பட்டதால் கூட்டணியில் இருந்து இடது சாரிகள் விலகினார். கடந்த பாராளுமன்றத் தேர்தலில் காங்கிரசும், இடது சாரிகளும் தனித் தனியாக போட்டியிட்டனர். காங்கிரஸ் மீண்டும் மத்தியில் ஆட்சிக்கு வந்த நிலையில் இடது சாரிகள் கடும் இழப்பை சந்தித்தனர்.அதன் பிறகு நடந்த கேரளா, மேற்கு வங்க தேர்தல்களிலும் கம்யூனிஸ்டுகளுக்கு தோல்வியே ஏற்பட்டது.

இந்த நிலையில் கேரள மாநிலத்தை சேர்ந்த 5 மார்க்சிஸ்ட் எம்.பி.க்களும், பொலிட் பீரோ உறுப்பினர் சீதாராம் எச்சூரியும் நேற்று பிரதமர் மன்மோகன்சிங்கை சந்தித்துப் பேசினார்கள். அவர்களிடம் மன்மோகன் சிங் நீண்ட நேரம் மனம் விட்டுப் பேசினார். இடது சாரிகள் வழங்கி வந்த நல்ல ஆலோசனைகளை தான் இழந்து விட்டதாக அவர் கவலையுடன் கூறினார். அவரது பேச்சு மூலம், இடது சாரிகளுடன் மீண்டும் காங்கிரஸ் கூட்டணி சேர விரும்புவதை சூசகமாக வெளிப்படுத்தி உள்ளதாக கூறப்படுகிறது.

மார்க்சிஸ்ட் எம்.பி.க்களிடம் பிரதமர், என் மீது நம்பிக்கை இல்லையா? என்று கேட்டாராம். அதற்கு மார்க்சிஸ்ட் எம்.பி.க்கள், "உங்கள் நேர்மை மீது நாங்கள் ஒரு போதும் சந்தேகப்பட்டது இல்லை" என்றார்களாம். இதையடுத்து நாம் மீண்டும் ஒன்று பட்டு செயல்பட வேண்டும் என்று மன்மோகன் சிங் கூறியதாக தெரிகிறது.

இதன் தொடர்ச்சியாக கம்யூனிஸ்ட் தலைவர்கள் அடுத்து நிதி மந்திரி பிரணாப் முகர்ஜியை சந்தித்து பேச திட்டமிட்டுள்ளனர். சில கூட்டணி கட்சிகளின் செயல்பாடுகளில் அதிருப்தி அடைந்துள்ள பிரதமர் மன்மோகன் சிங், இடது சாரிகளை தனது நட்பு வளையத்துக்குள் வைத்து கொள்ள இந்த நடவடிக் கைகளை மேற்கொண்டுள்ளதாக கூறப்படுகிறது.

ஸ்பெக்ட்ரம், காமன் வெல்த் ஊழல் குற்றச்சாட்டுக்களில் பா.ஜ.க. பிரதமர் மீது குற்றம் சாட்டி வரும் நிலையில், இடது சாரிகள் இந்த விவகாரத்தில் பிரதமர் மீது எதுவும் சொல்லாமல் இருப்பது குறிப்பிடத்தக்கது.