மருந்துப் பொருட்களுக்கு மீண்டும் விலைக் கட்டுப்பாடு

மருந்து பொருட்கள் தொடர்பான விலைக் கட்டுப்பாட்டு முறை மீண்டும் விரைவில் நடைமுறைக்குக் கொண்டு வரப்படும் என்று சுகாதார அமைச்சர் மைத்திரிபால சிறிசேன நேற்றுத் தெரிவித்தார். அடுத்தாண்டின் முதல் காலாண்டுக்குள் மருந்து பொருட்கள் தொடர்பான விலைக்கட்டுப்பாட்டு முறை குறித்த விசேட வர்த்தமானி பிரகடனம் வெளியிடப்படும் எனவும் அவர் குறிப்பிட்டார்.

மருந்து பொருட்கள் தொடர்பான விலைக் கட்டுப்பாட்டு முறை 2002 ஆம் ஆண்டு வரையும் நடைமுறையில் இருந்த போதிலும் அதனை ஐ. தே. க. ஆட்சியாளர்களே விசேட வர்த்தமானி அறிவித்தல் மூலம் நீக்கியதாகவும் அமைச்சர் சுட்டிக் காட்டினார்.

இது தொடர்பாக அமைச்சர் மேலும் கூறுகையில், மருந்து பொருட்கள் தொடர்பான விலை கட்டுப்பாட்டு முறை நீக்கப்பட்டதால் மருந்து பொருள் விற்பனையாளர்கள் தான் பெரிதும் நன்மை அடைந்துள்ளார்கள். ஆனால் அப்பாவி நோயாளர்கள் பெரிதும் பாதிப் படைந்தார்கள். கடந்த 7, 8 வருடங்களாக இந்த நிலைமை தொடர்கின்றது.

திறந்த பொருளாதார கொள்கையின் மூலம் போட்டித் தன்மையை ஏற்படுத்தி நாட்டு மக்களுக்கு நியாய விலையில் பொருட்களை பெற்றுக்கொடுக்க முடியும் என எதிர்பார்க்கப்படுகின்றது. ஆனால், மருந்து பொருட்கள் மக்களுக்கு நியாய விலையில் கிடைக்கவில்லை. குறிப்பாக ஒரு மருந்து பொருள் ஒவ்வொரு மருந்த கங்களிலும் வெவ்வேறு விலைகளில் விற்பனை செய்யப்படுகின்றன. அத்தோடு ஒரு மருந்து பல வர்த்தக பெயர்களில் சந்தைப்படுத்தப்படுகின்றன. அதாவது பரசிட்டமோல் 17 வர்த்தக பெயர்களில் சந்தையில் காணப்படுகின்றது.

டொக்டர்கள் மருத்துவ பெயர்களில் எழுதும் மருந்து சிட்டைகளுக்கு சில மருந்தகங்களில் வர்த்தகப் பெயர் மருந்துப்பொருட்களே விநியோகிக்கப் படுகின்றன.

பொது மக்கள் வழங்கிய வெவ்வேறு புகார்களின் அடிப்படையிலேயே மருந்து பொருள் தொடர்பான கட்டுப்பாட்டு விலை முறையை மீண்டும் நடைமுறைக்குக் கொண்டு வரத் தீர்மானித்துள்ளேன் என்றார்.