குப்பையில் வீசிய குழந்தையை வளர்த்து வந்த எச்.ஐ.வி., நோயாளி

மதுரை அருகே குப்பையில் வீசிய குழந்தையை வளர்த்து வந்த எச்.ஐ.வி., நோயாளி, கல்விக்காக குழந்தையை அரசிடம் ஒப்படைக்க முன்வந்தார். மதுரை மாவட்டம் வாடிப்பட்டி அருகே பொட்டிலுபட்டியை சேர்ந்தவர் ஜெயா(பெயர் மாற்றப்பட்டுள்ளது).
எச்.ஐ.வி., நோயாளியான இவர், கணவரால் கைவிடப்பட்டு, மகளுடன் வசித்து வந்தார். நான்கு ஆண்டுகளுக்கு முன், மருத்துவமனை அருகே குப்பைத்தொட்டியில் பச்சிளம் பெண் குழந்தை ஒன்று கிடந்தது.ஆதரவற்ற தனக்கும், தன் மகளுக்கும் ஆறுதலாக, குழந்தையை வளர்க்க முடிவு செய்தார்.

குழந்தைக்கு பிரியதர்ஷினி என பெயரிட்டு, ரகசியமாக வளர்த்து வந்தார். வாடிப்பட்டி தனியார் மருத்துவமனையில் துப்புரவு பணியாளராக கிடைக்கும் ஊதியத்தை வைத்து, மூவரும் பசியாறினர். பிரியதர்ஷினிக்கு நான்கு வயதானதால், பள்ளியில் சேர்க்க முடிவு செய்தார். பிறப்பு சான்றிதழ் இல்லாததால், சேர்க்கைக்கு பள்ளிகள் மறுத்தன. செய்வதறியாது, குழந்தையை வீட்டில் முடக்கினார். இதற்கிடையில், கணவரால் கைவிடப்பட்டோருக்கான உதவித்தொகை வாங்க, மதுரை எச்.ஐ.வி., தொற்றுள்ளோர் கூட்டமைப்பை நாடினார்.

அவர்களின் விசாரணையில், பிரியதர்ஷனி குறித்த விபரம் தெரிந்தது. "குழந்தையை முறைப்படி அரசிடம் ஒப்படைக்க வேண்டும்,' என, கூட்டமைப்பு சார்பில் வலியுறுத்தப்பட்டது. வளர்த்த பாசத்தால், ஜெயா மறுத்தார். "குழந்தையின் கல்விக்கு இதைத்தவிர வேறு வழியில்லை,' என, கூறியதால், ஒப்புக்கொண்டார். ஜெயா கூறியதாவது: பிரியதர்ஷினியை என் குழந்தை போல வளர்த்து விட்டேன். படிப்பறிவு இல்லாமல் எனக்கு நேர்ந்த கொடுமைகள், அவளுக்கும் வரக்கூடாது என்பதால், இந்த முடிவுக்கு வந்தேன். அரசு ஒப்புதல் அளித்தால் நானே வளர்ப்பேன், என்றார். எச்.ஐ.வி., தொற்றுள்ளோர் கூட்டமைப்பு தலைவர் பாபு கூறியதாவது: குழந்தைக்கு எச்.ஐ.வி., பாதிப்பு இல்லை. முறைப்படி அரசு காப்பாகத்தில் ஒப்படைப்போம், என்றார்.

நல்ல காரியம் செய்தார் நன்றி அவர்களுக்கு