ஐ.பி.எல்.லில் சூதாட்டத்திற்கு தூண்டும் தரகர்கள் குறித்து மொடல் அழகி புகார்

by **நேசமுடன் ஹாசிம்** Thu 12 May 2011 - 12:10

இங்கிலாந்தைச் சேர்ந்த கிரிக்கெட் சூதாட்ட தரகர்கள் தனக்கு போன் செய்து இந்திய வீரர்களுடன் உள்ள நெருக்கத்தை பயன்படுத்தி அவர்களை ஐ.பி.எல். போட்டியில் சூதாட்டத்தில்..
..ஈடுபடுமாறு செய்யவேண்டுமென்று மிரட்டுவதாக மொடல் அழகி லிசா மாலிக் பொலிஸில் புகார் கொடுத்துள்ளார்.

பிரபல மொடல் அழகி லிசா மாலிக் பொலிவூட் படங்களிலும் நடித்துள்ள இவர் டான்சிங் குயின் உட்பட பல்வேறு ரி.வி.ரியாலிட்டி நிகழ்ச்சிகளில் பங்கேற்று வருகிறார். இவருடைய பல நிகழ்ச்சிகளில் இந்திய கிரிக்கெட் அணி மற்றும் ஐ.பி.எல்.போட்டியில் பங்கேற்கும் வெளிநாடுகளைச் சேர்ந்த கிரிக்கெட் வீரர்கள் பங்கேற்று ஆட்டம் போட்டு வருகின்றனர். மேலும் கடந்த ஆண்டு ஐ.பி.எல்.போட்டிகள் முடிவில் நடைபெற்ற விருந்து நிகழ்ச்சிகளில் லிசா மாலிக் தினந்தோறும் கலந்து கொண்டார் என்பது குறிப்பிடத்தக்கது.

இந்த நிலையில் லிசா மாலிக் நேற்று முன்தினம் ஒஷிவாரா பொலிஸ் நிலையத்தில் ஒரு புகார் கொடுத்தார். அதில் லண்டனைச் சேர்ந்த ரசாக் அக்கா ராஸ் என்பவரிடமிருந்து எனக்கு அடிக்கடி தொலைபேசி அழைப்பு வருகிறது. தன்னை சூதாட்ட தரகர் என்று கூறிக்கொள்ளும் அவர் இந்திய கிரிக்கெட் அணிவீரர்களுடன் உங்களுக்கு நெருக்கமான பழக்கம் உள்ளது. இதனைப்பயன்படுத்தி அவர்களை ஐ.பி.எல்.கிரிக்கெட் போட்டிகளில் சூதாட்டத்தில் ஈடுபடுமாறு செய்யவேண்டும். இந்த வேலைக்காக உங்களுக்கு 50 இலட்சம் ரூபா பணம் தருவோம் என்று கூறி மிரட்டுகிறார் என தெரிவித்துள்ளார்.

இந்த புகாரின் பேரில் அடையாளம் தெரியாத ஒருவருக்கு எதிராக பொலிஸார் வழக்குப்பதிவு செய்தனர். மேலும் அவரிடமிருந்து மீண்டும் தொலைபேசி அழைப்பு வந்தால் உடனே எங்களுக்கு தகவல் தெரிவிக்கவேண்டுமென்று லிசா மாலிக்கிடம் பொலிஸார் கூறினார்கள்.
இதுபற்றி ஒஷிவாரா பொலிஸ் நிலைய அதிகாரிகள் கூறுகையில்; மொடல் அழகி லிசா மாலிக் புகார் பற்றி விசாரித்து வருகிறோம். இதில் தேவைப்படும் பட்சத்தில் எப்.ஐ.ஆர்.பதிவு செய்யப்படுமென்று தெரிவித்தனர்.