இறை பாதையில் வழி நடத்த காலத்துக்கு காலம் தூதர்கள் வந்தனர்

முற்று முழுதான பிரபஞ்சத்தையும் படைத்து, ஏனைய அனைத்துப் படைப்பினங்களையும் படைத்த தூயவன் அல்லாஹ், மனித வாழ்வு நேரான வழியில் சீராக அமைய வேண்டும் என்ற எதிர்பார்ப்பின் அடிப்படையில், குர்ஆன் கூறி நிற்கும் நேர் வழிகாட்டல்களை வழங்குவதற்காக, காலத்திற்குக் காலம், தான் தேர்ந்தெடுத்த இறைத்தூதர்களை உலகிற்கு அனுப்பிவைத்தான். இறைவனது கட்டளைகள், ஏவல்கள் வஹி வாயிலாகப் பெறப்பட்டு, அத்தூதை மக்களுக்குச் சென்றடையச் செய்து நேர்வழி காட்டவேண்டியது இறைத்தூதர்களின் முக்கிய கடமையாக இருந்தது. இறைத்தூதர்களின் வரிசையில், முதலானவர் ஆதம் (அலை), முதல் இறுதித்தூதர் முஹம்மத் (ஸல்) அவர்கள் வரை அல்லாஹ்வின் ஏற்பாட் டின் படி ஒரு சங்கிலித் தொடரான சந்ததித்தொடர் இருந்து வந்தது.

அல்லாஹ்வினால் தேர்தெடுக்கப்பட்ட இறைத்தூதர்கள், அவ்வப்போது தோன்றும் மானிடரை இறை பாதையில் வழிநடாத்தி வந்தார்கள். அவர்கள் சகல அசுத்தங்களிலிருந்தும் தூய்மையாக்கப்பட்ட புனிதத்துவம் உடையவர்களாக திகழ்ந்தார்கள்.

*அவர்களை நாம் தேர்ந்தெடுத்து, நேரான வழியின் பால் அவர்களை நாம் செலுத்தினோம் (6:87)

*அல்லாஹ் தனது தூதர்கள் அனைவரினதும் சகல அசுத்தங்களையும் நீக்கி அவர்களை முற்று முழுதாகவே தூய்மையாக்கியுள்ளான். அதே வழியில் இறுதி இறைத்தூதராக வந்த நபி முஹம்மத் (ஸல்) அவர்களையும், அவர்களது குடும்பத்தையும் முற்று முழுதாக தூய்மைப் படுத்தியுள்ளான்.

விசுவாசம், பக்தி, இறையச்சம், பிரசாரம், இறைவனன்றி யாருக்கும் அடிபணியாமை, நற்குணவியல்புகள், ஞானம்; என்பவற்றில் இறைத்தூதர்கள், மானிடர் அனைவரையும் விட மிகைந்தவர்களாக இருந்தார்கள். அதி சிறந்தவராக உலகிற்கோர் முன்மாதிரியாக வாழ்ந்து காட்டினார்கள்.

தூய்மை பெற்று புனிதம் மிக்கவர்களாக வாழ்ந்த இவர்கள், பாவஞ்செய்வது தவறுகள் புரிவது, மறதி போன்ற இறைவனால் வெறுக்கத்தக்க செயல்களை விட்டும் தூரமான பக்குவம் பெற்ற உள்ளங் கொண்டவர்களாக பரிணமித்தார்கள்.

உண்மையாக இவ்வகையான பரிசுத்த நிலை பரிபூரணத்துவ மிக்க ஆத்மீக-உயர்வினால் ஏற்பட்டவையாகும், இறைத்தூதர்கள் ஆத்மீக, ஆன்மீக ரீதியில் உயரிய பாங்கான இறை விசுவாசத்தையும், ஆழ்ந்த இறை ஞான அறிவையும் கொண்டிருந்தார்கள். இறைத்தூதர்களின் இவ்வாறான பரிணத்துவமான நிலை அவர்களின் பரம்பரை வம்சம் நல் விழுமியங்கள், நாகரீகமாக நடைமுறை பழக்க வழக்கங்கள், எல்லாவற்றிற்கும் மேலாக இறை அருட்கொடை என்பவற்றால் ஏற்பட்டதெனலாம்.

மேலும் தன் இறைத்தூதர்களின் விடயத்தில் தூயவன் அல்லாஹ் கொண்டிருக்கின்ற அதி விசேடமான அருட்பேறு தூயவர்களான நபி மார்களுக்கு இவ்வாறான மனப்பக்குவமும், மனமுதிர்ச்சியும் கிடைக்கப்பெறச் செய்துள்ளது. இறைவனோடு நெருங்கக் கூடிய அருட் பாக்கியத்தினால் இறைத்தூதர்களின் ஆத்மபலமும் உயர்வு மிக்கதாகக் காணப்படுகின்றது.

இவ்வாறான உயரிய தன்மை பூரண விசுவாசத்தையும் உயரிய ஞானத்தையும் வழங்குகின்றது. நற் பண்புகளினால் இவர்கள் பரிசுத்தமான தூயவர்களாக விளங்குவதுடன் புனிதத்துவம் உடையவர்களாகவும் மிளிர்கின்றார்கள்.

இவ்வாறான பரிசுத்த நிலை அவர்களின் பிறப்புக் காரணமாகப் பரம்பரை வழித் தோன்றல், நற் பழக்கவழக்க சீரிய நடைமுறைகள், இறை அருட்கொடைகள் என்பவற்றால் ஏற்படுவதெனலாம்.

மற்றவர் இவர்களின் அடிச்சுவட்டைப் பின் பற்றக் கூடியதாக இவை அமைந்தன.

பரம்பரை சிறப்பியல்புகள் அமைந்த - தூய்மையும் புனிதமும் மிக்க உயர்ந்த வம்சத்தில் அல்லாஹ்வினால் தேர்ந்தெடுக்கப்பட்ட நபிமார்கள் அவதரித்துள்ளார்கள் என்பதனை குர்ஆனும், ஹதீஸ்களும், அவை சார்ந்த வரலாறுகளும் சான்று பகர்கின்றன. இறைத் தூதர்களிடம் காணப்பட்ட ஆத்மீக நல விழுமியங்களும், பரிசுத்த நிலைமைகளும், புனிதத்தன்மையும் இவர்களது பிறப்பை உறுதிப்படுத்தும் பரம்பரை வாயிலாகவே கிடைக்கப்பெற்றுள்ளது எனலாம். இவ்வாறான நிகழ்வுகளை குர்ஆன் - சுன்னா சான்றுகள் அத்தாட்சி பகர்கின்றன.

இதன் அடிப்படையில் இறைத்தூதர் எம் பெருமான் நபி முஹம்மத் (ஸல்) அவர்களும் அரேபிய உயரிய குறைஷ் வம்சத்தில், பனூஹாசிம் குடும்பத்தில் உலகிற்கே ஒளி விளக்காக அவதரித்தார்கள். உண்மை நட்பு, வீரம், தீரம், தூய்மை, நம்பிக்கை, விருந்தோம்பல், மன்னிக்கும் மனப்பாங்கு, பொறுமை என்பன அன்னாரின் குடும்பத்தின் சிறப்புப் பின்னணியாக அமைந்துள்ளதுடன் ஏனைய கோத்திரங்களை விடவும் பிரபல்யம் பெற்றிருப்பதுடன், வரலாற்றுச் சான்றுகளின் படி பொதுவாகப் பெருமானாரின் பெற்றோர்களின் குடும்பத்தினர் கண்ணியமும், கெளரவமும் மிக்க இறைவிசுவாசிகளாகவே காணப்பட்டார்கள்.

பாத்திமா முஹம்மத் ஸாதிக்