தர்மம் கொடுப்பதை பிறருககு கூறலாகாது!

தர்மம் கொடுப்பதை பிறருககு கூறலாகாது!
எல்லா நிலைமைகளிலும் இறை பாதையில் செலவு செய்வதானது தக்வாவை அடைந்துகொண்டவர்களின் பண்புகளின் ஒன்றாகும். புனித அல்குர்ஆன் கூறுகிறது.

இன்னும் நீங்கள் உங்கள் இறைவனின் மன்னிப்பைப் பெறுவதற்கும் சுவனபதியின் பக்கமும் விரைந்து செல்லுங்கள். அதன் (சுவனபதியின்) அகலம். வானங்கள், பூமியைப் போன்றுள்ளது. அது பய பக்தியுடையோருக்காகவே தயார் செய்து வைக்கப்பட்டுள்ளது. (பயபக்தியுடையோர் எத்தகையோரென்றால்), அவர்கள் இன்பமான (செல்வ) நிலையிலும் துன்பமான (ஏழ்மை) நிலையிலும் (இறைவனின் பாதையில்) செலவிடுவார்கள்’ (அல்குர்ஆன்-3:133,134)

“அல்லாஹ்வின் பாதையில் தங்கள் செல்வத்தைச் செலவிடுபவர்களுக்கு உவமையாவது ஒவ்வொரு கதிரிலும் நூறு தானிய மணிகளைக் கொண்ட ஏழு கதிர்களை முளைப்பிக்கும் ஒரு வித்தைப் போன்றது. அல்லாஹ்தான் நாடியவர்களுக்கு (இதை மேலும்) இரட்டிப் பாக்குகின்றான். இன்னும் அல்லாஹ் விசாலமான (கொடையுடைய)வன், யாவற்றையும் நன்கறிபவன். அல்லாஹ்வின் பாதையில் எவர் தங்கள் செல்வத்தை செலவிட்ட பின்னர் அதைத் தொடர்ந்து அதைச் சொல்லிக் காண்பிக்காமலும் அல்லது (வேறு விதமாக) நோவினை செய்யாமலும் இருக்கின்றார்களோ அவர்களுக்கு அதற்குரிய நற்கூலி அவர்களுடைய இறைவனிடத்தில் உண்டு. இன்னும் அவர்களுக்கு அத்தகைய பயமுமில்லை. அவர்கள் துக்கமும் அடையமாட்டார்கள்’.

(அல்குர்ஆன்: 2:261, 262)

ஸஹாபாக்களின் தியாகச் செயல்கள் மூலம் நாம் படிப்பினை பெறவேண்டும். அவர்கள் ஒருபோதும் கொடுத்ததை சொல்லிக்கொட்டியதில்லை.

தபூக் யுத்தத்திற்காக உள்மான் (ரழி) அவர்கள் முழுமையாக தயார் செய்யப்பட்ட ஆயிரம் ஒட்டகங்களையும், ஆயிரம் தினார்களையும் நபி (ஸல்) அவர்களிடம் ஒப்படைத்தபோது நபியவர்கள், ‘உஸ்மான் இதன் பின்னர் எதைச் செய்தாலும் அது அவருக்கு தீங்களிக்க மாட்டாது’ எனக் கூறினார்கள்.

அப்துர் ரஹ்மான் பின் அவ்ப் (ரழி) அவர்கள் நான்காயிரம் திர்ஹம்களை தர்மம் செய்தார்கள். தன்னிடம் எட்டாயிரம் திர்ஹம்கள் இருந்ததாகவும், அதில் பாதியை தனக்கும் தனது குடும்பத்திற்கும் வைத்துவிட்டு மிகுதியை இறைவழியில் செலவிட கொண்டு வந்துள்ளதாகக் கூறியபோது நபியவர்கள், நீர் கொண்டு வந்ததிலும் விட்டுவிட்டு வந்ததிலும் அல்லாஹ் பரகத் செய்வானாக! எனப் பிரார்த்தனை செய்தார்கள்.

செய்த நன்மையைச் சொல்லிக்காட்டி மனங்களைப் புண்படுத்துவது ஸதகாவின் நன்மையை முழுமையாக இழக்கச் செய்யும் சொல்லிக்காட்டும் போலி தர்மத்தைவிடவும் கனிவான இனிய சொற்களும் மன்னித்ததும் சிறந்தது என அல்லாஹ் திருக்குர்ஆனிலே கூறுகிறான்.

கனிவான இனிய சொற்களும் மன்னித்தலும் தர்மம் செயதபின் நோவினையைத் தொடரும்படி செய்யும் தர்மத்தைவிட மேலானவையாகும். தவிர அல்லாஹ் (எவரிடத்தும் எவ்விதத்)தேவையுமில்லாதவன். சகிப்புத் தன்மையுடயவன்.

(அல்குர்ஆன் 2:263)

மேலும் அல்லாஹ் தெளிவுபடுத்துகிறான்.

நம்பிக்கை கொண்டவர்களே! அல்லாஹ்வின் மீதும் இறுதி நாளின் மீதும் நம்பிக்கை கொள்ளாமல் மனிதர்களுக்குக் காட்டுவதற்காகவே தன் பொருளைச் செலவழிப்பவனைப் போல், கொடுத்ததைச் சொல்லிக்காண்பித்தும் நோவினைகள் செய்தும் உங்கள் ஸதகாவை (தான தர்மங்களைப்)பாழாக்கிவிடாதீர்கள். அ(ப்படிச் செய்ய)வனுக்குஉவமையாவது, ஒரு வழுக்குப் பாறையாகும்.

அதன் மேல் சிறிய மண் படிந்துள்ளது. அதன் மீது பெருமழை பெய்து (அதிலிருந்த சிறிது மண்ணையும் கழுவிக் ) துடைத்து விட்டது. இவ்வாறே அவர்கள் செய்த (தானத்) திலிருந்து யாதொரு பலனையும் அடையமாட்டார்கள். இன்னும் அல்லாஹ் காஃபிரான மக்களை நேர் வழியில் செலுத்துவதில்லை.

(அல்குர்ஆன்: 2:264)

இவ்வாறாக தர்மம் செய்வதன் முக்கியத்துவத்தை வலியுறுத்தி அவர்களுக்கு மேலான அந்தஸ்தையும் கூலியையும் அல்லாஹ் பின்வருமாறு தெளிவுபடுத்துகிறான்.

யார் தங்கள் பொருட்களை, (தான தர்மங்களில்), இரவிலும் பகலிலும் இரகசியமாகவும் பகிரங்கமாகவும் செலவு செய்கிறார்களோ, அவர்களுக்கு அவர்களுடைய இறைவனிடத்தில் நற்கூலி இருக்கிறது. அவர்களுக்கு அச்சமும் இல்லை. அவர்கள் துக்கப்படவும் மாட்டார்கள்’.

(அல்குர்ஆன் 2:274)

ஏ.எம். முஹம்மத் ஸப்வான்

தர்மம் செய்து தர்ம கர்த்தா என்று பெயர் எடுபதர்காக வெளிப்படையாக செய்யக் கூடாது .ஆனால் நாம் செய்வதை பிறர் பார்த்தால் அது அவர்களையும் செய்ய தூண்டும் என்ற எண்ணத்தில் செய்யலாம்