யுதாண்ட்

கி.பி. 1909 - ஆம் ஆண்டு ஜனவரி 22 - ஆம் நாள் பர்மாவின் பாண்டனாவ் என்ற இடத்தில் பிறந்தவர் யுதாண்ட் (Uthant). பாண்டனாவில் இளமையில் கல்வி பயின்ற அவர் பின் பர்மாவின் தலைநகர் ரங்கூனில் உயர் கல்வி கற்றார். பின்னர் பாண்டனா தேசிய உயர்நிலைப் பள்ளியில் 1931 - ஆம் ஆண்டு தலைமை ஆசிரியராகப் பொறுப்பேற்றார். 1947 - ஆம் ஆண்டில் அரசாங்கப் பணியில் சேர்ந்தார். பின்னர் ஒலிபரப்பு இயக்குநராகப் பணிபுரிந்தார்.

ஐக்கிய நாடுகளின் பொது அவையில் பர்மா குழுவின் சார்பில் 1952 - ஆம் ஆண்டு இடம்பெற்றார். இவரது ஆற்றலாலும், பெரும் சாதனைகளாலும் 1957 - ஆம் ஆண்டு இவர் நிலையான பேராளராக்கப்பட்டார். அப்போதைய ஐக்கிய நாடுகள் சபை செயலர் டாக் ஹம்மர்ஸ்லோட் மரணமடையவே தற்காலிகமாக அப்பதவியை ஏற்றார். 1962 - ஆம் ஆண்டு நவம்பர் 30 - ஆம் நாள் மீண்டும் ஐநா சபை செயலராக தேர்வு செய்யப்பட்டார்.

இவரது கியூபாக் கொள்கை, இவரது திறமைக்கு ஓர் எடுத்துக்காட்டாகும். 1965 - இல் நடைபெற்ற இந்தியா பாகிஸ்தான் போரை அமைதி வழியில் தீர்த்து வைத்தார். அரேபிய நாடுகள் ஏற்பட்ட சிக்கல்களை 1967 - ஆம் ஆண்டில் தம் சொந்த பொறுப்பில் தீர்வு கண்டார். அதே ஆண்டு ஏற்பட்ட அராபிய - இஸ்ரேல் போரின்போது இவர் கடுமையான எச்சரிக்கைகள் விடுத்தார்.

1972 - ஆம் ஆண்டு ஜனவரி மாதம் 1 - ஆம் நாள் ஐநா பொதுச் செயலாளர் பதவியிலிருந்து ஓய்வுப் பெற்றார். இவர் அமெரிக்காவின் நியூயார்க்கில் குடியேறினார். 1974 - ஆம் ஆண்டு நவம்பர் 25 - ஆம் நாள் இவர் மரணமடைந்தார்.