அகஸ்டஸ் சீசர்

ரோமானிய பேரரசின் முதல் பேரரசரான இவர் கி.மு. 63 - கி.பி. 14 வரை வாழ்ந்தார். இவர் மூன்று பெயர்களில் அழைக்கப்பட்டார். கேயஸ் அக்டேவியஸ் என்பது இவரது குழந்தைப்பருவ பெயராகும். ஜீலியஸ் சீசர் அக்டோவியஸ் என்றும் அழைக்கப்பட்டார். இவரது மூன்றாவது பெயர் பேரரசர் அகஸ்டஸ் சீசர் என்பதாகும். இவர் ரோமப் பேரரசராக கி.மு. 27-ஆம் ஆண்டு முடிசூட்டிக் கொண்டார்.

இவரது ஆட்சிக்காலம் ரோமானிய இலக்கியத்திற்கும், கட்டடக்கலைக்கும் பொற்காலம் ஆகும். ரோமாபுரியைச் செங்கற்களால் பார்த்தேன், அங்கு பளிங்குக் கற்களை விட்டுச் சென்றேன் என்று பெருமிதத்துடன் இவர் கூறிக்கொண்டார்.

அகஸ்டஸ் சீசர் அமைதியில் நாட்டம் கொண்டவராக இருந்தாலும், இவரது பேரரசின் எல்லையை ஸ்பெயின், கால் (இன்றைய பிரான்ஸ்), பன்னோனியா, தால்மேசியா (இன்றைய ஹங்கேரி), யூக்கோஸ்லேவியாவின் பகுதிகள், எகிப்து வரை விரிவுப் படுத்தினார்.

சொந்த மகன் இல்லாத காரணத்தால் தமது வாரிசாகவர தகுதிபடைத்த ஒருவரைத் தேடி அலைந்தும் அவர் அதில் வெற்றிப் பெறவில்லை. இவருடைய மகளும், பேத்தியும் கற்பிழப்புக் குற்றத்திற்காக நாடு கடத்தப்பட்டனர். இதனால், சொல்லொண்ணாத் துயருற்ற இவர் தம் இறுதி காலத்தில் கொடுங்கோலராய் மாறினார்.