வாலிபாலில் ஸ்டாராக விளங்கும் சூஸன்!

சென்னை எழும்பூரில் உள்ள ராதாகிருஷ்ணன் விளையாட்டு அரங்கம்... வியர்க்க விறுவிறுக்க... பறந்து பறந்து பந்தை ஆக்ரோஷத்தோடு அடிக்கிறார் சூஸன் பாத்திமா.

'வாலிபால் விளையாட்டில் எங்கள் கல்லூரியின் ஸ்டார்' என்று கல்லூரி முதல்வர் முதல் மாணவியர் வரை கொண்டாடும் சூஸன் வளர்ந்து வரும் வாலிபால் வீராங்கனை.

தேசிய அளவில் பல சாதனைகளை படைத்து வரும் சூஸன்... போட்டின்னு மைதானத்துக்குள் இறங்கிட்டா... 'தடதட'ன்னு கலக்குற அதிரடி ஆல்ரவுண்டர்.

'ஹாய்... ஐயாம் சூஸன்...' என்று அறிமுகமாகிற சூஸனின் பேச்சு ரொம்பவே சாப்ட்! அவரிடம் பேசியபோது,

"என்னோட பெரியப்பா, அப்பா ஆகியோர் வாலிபால் வீரர்கள். அவர்கள் செய்யும் பயிற்சியைப் பார்த்தும், அவர்களோடு விளையாடியும் எனக்கும் ஆர்வம் அதிகமானது. வாலிபால் விளையாடுவதற்கு முன்பு பள்ளியில் டென்னிஸ் விளையாடிக் கொண்டிருந்தேன்.

பத்தாம் வகுப்பு படிக்கும்போது... வாலிபால் விளையாட ஆரம்பித்தபின்னர், டென்னிஸை விட்டுவிட்டு, முழுவதுமாக வாலிபால் விளையாட்டில் கவனம் செலுத்தி கடந்த ஐந்து வருடத்தில் தேசிய வீராங்கனையாக மாறிவிட்டேன்" என்று அமைதியாக பேச ஆரம்பிக்கிறார் சூஸன். இவருடைய தங்கை யாஸ்மினும் வாலிபால் வீராங்கனை.

மேலும் கூறுகையில், "வாலிபால் விளையாட்டில் எனக்கு அட்டாக் பாணிதான் ரொம்ப பிடிக்கும். அந்த பாணியில்தான் விளையாடுவேன். அதில் ஹை பாஸ் நன்றாக பண்ணுவேன்.

கடந்த ஏழு வருடங்களாக தமிழக அணியில் இடம் பெற்றுள்ளேன். ஏழு முறை தேசிய அளவிலான போட்டியில் பங்கேற்றுள்ளேன். இதுவரை மொத்தம் நூறு போட்டிகளில் பங்கேற்று, எழுபதுக்கும் மேற்பட்ட பதக்கங்களை வென்றுள்ளேன்.

கடந்த வருடம் கோவையில் நடந்த சீனியர் மாநில சாம்பியன் போட்டியில் வெற்றி பெற்றதை மறக்க முடியாது. ஒவ்வொரு போட்டியிலும் வெற்றி பெற்ற பின்னர் என்னை பயிற்சியாளர்கள் பாராட்டுவார்கள். அந்த பாராட்டுதான் எனக்கு உற்சாக டானிக்!" என்று நெகிழ்கிறார் சூஸன்.

இவருக்கு வாலிபால் தவிர, டென்னிஸ், ஷட்டில், நீளம் தாண்டுதல், எறிகுண்டு ஆகிய விளையாட்டிலும் ஆர்வம். டென்னிஸ் விளையாட்டில் மாநில அளவில் பதக்கங்களை வென்றுள்ளார்.

உங்களுடைய வாழ்க்கையில் ஏற்பட்ட மிகப் பெரிய திருப்பமாக எதை குறிப்பிடுகிறீர்கள்? என்ற கேள்விக்கு சூஸன் பதிலளிக்கும்போது, "தொடக்கத்தில் டென்னிஸ் விளையாட்டில் ஆர்வமாக இருந்தேன். மாநில அளவில் பரிசுகள் வென்று வந்தாலும், குடும்பத்தினரைப் பார்த்து வாலிபால் விளையாட்டுப் போட்டிகளில் கவனம் செலுத்தினேன்.

அப்படி மாறியதால், இன்றைக்கு தேசிய வாலிபால் வீராங்கனையாக புகழ் பெற்றுள்ளேன். இது எனது வாழ்க்கையில் ஏற்பட்ட திருப்பமாக கருதுகிறேன்.

சின்ன வயதில் விளையாட்டு வீராங்கனையாக வரவேண்டும் என்று ஆசைப்பட்டேன். அது நடந்து விட்டது. அடுத்து எம்.பி.ஏ., படித்து வேலைக்கு செல்லவேண்டும். அதோடு ரெயில்வே துறைக்காக விளையாடி இந்தியாவுக்கு பெருமை சேர்க்க வேண்டும் என்று முயற்சி செய்து வருகிறேன்.

என்னுடைய இத்தனை வெற்றிக்கு முக்கிய காரணம் எனது கல்லூரி முதல்வர் நிர்மலா பிரசாத் மற்றும் பயிற்சியாளர்கள்தான். இவர்களுடைய ஆதரவும், ஊக்கமும் எனது வெற்றிக்கான முக்கிய காரணிகள்" என்று நன்றி கூறுகிறார் சூஸன்.

எந்த வேலை இருந்தாலும் தினமும் அதிகாலை 6 மணி முதல் 9 மணி வரையும், மாலை 5 மணி முதல் 8.30 மணிவரையும் பயிற்சி எடுப்பதை வழக்கமாக கொண்டுள்ளார்.

தொடக்கத்தில் இருந்தே சூஸனுக்கு வாலிபால் பயிற்சி அளித்து, வழிகாட்டியாக இருக்கும் முகமத் ஜின்னா கூறுகையில், "கடந்த ஐந்து வருடத்தில் கல்லூரியில் படித்துக் கொண்டே தேசிய அளவில் சாதனை செய்து வருகிறார் சூஸன். இவரிடம் வாலிபால் விளையாட்டுக்குரிய அனைத்து தகுதிகளும் உள்ளன என்றாலும், ஸ்ட்ரோக் செய்வதை சீரமைத்தால் சிறப்பாக உயர்ந்த நிலைக்கு வருவார். விரைவில் இந்திய அணியில் இடம் பெறுவார் சூஸன்" என்கிறார் பெருமிதத்துடன்...

பெர்சனல்...

படிப்பு: சென்னை எம்.ஓ.பி.வைஷ்ணவா கல்லூரியில் பி.காம்.

பெற்றோர்: அப்பா அஜீஸ் இ.எஸ்.ஐ.யில் அதிகாரியாக இருக்கிறார். அம்மா ரபியா இல்லத்தரசி. இரண்டு தங்கைகள் உள்ளனர்.

ரோல்மாடல்: எனக்கு சின்ன வயதில் இருந்து வாலிபால் பயிற்சி அளித்து வரும் எனது பெரியப்பா முகமத் ஜின்னா.

பொழுதுபோக்கு: புத்தகம், நாவல்கள் படிப்பேன். பாட்டு கேட்பேன்.

பிடித்த நிறம்: கறுப்பு, நீலம்.

பிடித்த உணவு: நாண், பனீர்.

பிடித்த உடை: குர்தீஸ்.

பிடித்த நாடு: ஆஸ்திரேலியா.

பிடித்த விளையாட்டு: ஷட்டில்.

பிடித்த விளையாட்டு வீரர்: நடால்.

பிடித்த வீராங்கனை: செரீனா வில்லியம்ஸ்.

யாரை சந்திக்க ஆசை: பிரேசில் நாட்டைச் சேர்ந்த வாலிபால் அணியினரை சந்திக்க ஆசை.

மறக்க முடியாத அறிவுரை: "போட்டியின்போது எப்போதும் பயப்படாதே... உன்னிடம் திறமை இருக்கு... தைரியமாக விளையாடினால் கண்டிப்பாக வெற்றிதான்" என்று பயிற்சியாளர்கள் அடிக்கடி கூறுவார்கள். விளையாடும்போது அந்த அறிவுரையை மனதில் நிறுத்திக்கொள்வேன்.

திருத்திக்கொள்ள நினைக்கும் விஷயம்: சில நேரங்களில் என் மீதே எனக்கு தன்னம்பிக்கை குறையும். அதை மாற்றிக் கொண்டால் இன்னும் ஜொலிப்பேன்.