கடற்படையினர் தயாரித்த தெலிசீமியா தடுப்பு மருந்து ஏற்றும் 150 இயந்திரங்கள் விநியோகம்

by **நண்பன்** Fri 29 Jul 2011 - 14:08

கடற்படையினர் தயாரித்த தெலிசீமியா தடுப்பு மருந்து ஏற்றும் 150 இயந்திரங்கள் விநியோகம்
ஸாதிக் ஷிஹான்

படம்: நிஷங்க விஜேரட்ண
இலங்கை கடற்படையினால் தயாரிக்கப்பட்டுள்ள தெலிசீமியா நோய்க்கு தடுப்பு மருந்து ஏற்றும் 150 தடுப்பு ஊசி இயந்திரங்கள் வைத்தியசாலைகளுக்கு நேற்று இலவசமாக விநியோகிக்கப் பட்டன.

கடற்படைத் தலைமையகத்தில் கடற்படைத் தளபதி வைஸ் அட்மிரல் சோமதிலக்க திஸாநாயக்க தலைமையில் நடைபெற்ற நிகழ்வில் பிரதம அதிதியாக கலந்துகொண்ட பாதுகாப்புச் செயலா ளர் கோட்டாபய ராஜபக்ஷ மேற்படி இயந்திரங்களை உத்தியோகபூர்வமாக கையளித்தார்.

பொரளை லேடி ரிட்ஜ்வே, கொழும்பு காசல், அம்பாறை, ராகம, கண்டி, குருநாகல், பேராதனை ஆகிய ஏழு வைத்தியசாலைகளின் பணிப்பாளர்களும், தெலிசீமியா நோயினால் பாதிக்கப்பட்ட 20 சிறுவர், சிறுமிகளும் இந்த இயந்திரங்களை பெற்றுக் கொண்டனர்.

தெலிசீமியா நோயினால் பாதிக்கப்பட்டவர்களுக்கு நாளொன்றுக்கு சுமார் 10 தொடக்கம் 12 மணித்தியாலங்கள் வரை தடுப்பு ஊசி ஏற்றுவதற்காக இயந்திரம் பயன்படுத்தப்படுகின்றன.

இந்த இயந்திரம் வெளிநாடுகளிலிருந்து இறக்குமதி செய்ய வேண்டுமாயின் இயந்திரமொன்றுக்கு 75,000 ரூபா செலவிட வேண்டும்.

இந்நிலையில் அதே இயந்திரத்தை சர்வதேச தரத்தில் இலங்கையில் தயாரித்துள்ள கடற்படையின் ஆய்வு மற்றும் அபிவிருத்தி பிரிவு சுமார் 4,500 ரூபாவுக்கு பெற்றுக் கொள்வதற்கான வசதிகளை செய்துள்ளது.

தெலிசீமியா நோயினால் பாதிக்கப்பட்ட மக்களுக்கு நிவாரணம் வழங்கும் வகையில் கடற்படையின் சமூக சேவைப் பிரிவு இதற்கான நிதியை ஒதுக்கீடு செய்து 150 இயந்திரங்களையும் முற்றிலும் இலவசமாக தயாரித்து விநியோகித்துள்ளது.

தெலிசீமியா நோயினால் பாதிக்கப்பட்ட சிறார்களுக்கு தடுப்பு ஊசி இயந்திரங்கள் வழங்கப்பட்ட அதேசமயம், கடற் படையின் சேவா வனிதா பிரிவினால் பாடசாலை பொதிகளுடன் உபகரணங்களும் பரிசில்களாக வழங்கி வைக்கப்பட்டன.

பாதுகாப்பு அமைச்சின் சேவா வனிதா தலைவி அயோமா ராஜபக்ஷ, கடற்படையின் சேவா வனிதா தலைவி திருமதி திஸாநாயக்க ஆகியோர் வழங்கி வைத்தனர்.