2407 மத்திய நிலையங்களில் உயர்தர பரீட்சை இன்று ஆரம்பம்; 3,94,861 பேர் தோற்றுவர் _

2011 ஆம் ஆண்டிற்கான கல்விப்பொதுத் தராதர உயர்தரப்பரீட்சை நாடளாவிய ரீதியில் இன்று திங்கட்கிழமை 2407 மத்திய நிலையங்களில் ஆரம்பமாகின்றது என்று பரீட்சைகள் திணைக்களம் அறிவித்துள்ளது.

புதிய பாடத்திட்டம் மற்றும் பழைய பாடத்திட்டம் என இரண்டு பாடத்திடங்களின் கீழ் இம்முறை பரீட்சைக்கு 3 இலட்சத்து 94 ஆயிரத்து 861 பரீட்சார்த்திகள் தோற்றவிருக்கின்றனர். புதிய பாடத்திட்டத்தின் கீழ் 1 இலட்சத்து 47 ஆயிரத்து 761 பேரும், பழைய பாடத்திட்டத்தின் கீழ் 1 இலட்சத்து 47 ஆயிரத்து 100 பேரும் என இம்முறை 3 இலட்சத்து 94 ஆயிரத்து 861 பேர் தோற்றவிருக்கின்றனர்.

பரீட்சைக்கு தேவையான சகல ஏற்பாடுகளும் நிறைவடைந்துள்ளதாக அறிவித்துள்ள திணைக்களம், காலநிலை மாற்றத்தினால் இயற்கை அனர்த்தங்களுக்கு முகம்கொடுக்கும் இடங்களில் பரீட்சையை முன்னெடுப்பதில் இடையூறுகள் ஏற்படுமாயின் அதற்கான மாற்று ஏற்பாடுகள் செய்துகொடுப்பதற்கும் திணைக்களம் நடவடிக்கைகளை மேற்கொண்டுள்ளது.

பரீட்சார்த்திகள், பரீட்சைக்கு தேவையான உபகரணங்கள் மற்றும் ஆள் அடையாளத்தை உறுதிப்படுத்தகூடிய தேசிய அடையாள அட்டை அல்லது தபால் அடையாள அட்டை போன்றவற்றை தவிர வேறு எந்தபொருட்களையும் பரீட்சை மண்டபத்திற்குள் எடுத்து வரவேண்டாம் என்றும் திணைக்களம் அறிவித்துள்ளது.

இதேவேளை, வவுனியா புனர்வாழ்வு முகாம்களில் புனர்வாழ்வு பெற்ற புலி உறுப்பினர்கள் 302 பேர் இம்முறை பரீட்சைக்கு தோற்றவிருக்கின்றனர். ஆறு முகாம்களில் புனர்வாழ்வு பெற்றவர்களே பரீசைக்கு தோற்றவிருப்பதாக புனர்வாழ்வு மற்றும் சிறைச்சாலைகள் மறுசீரமைப்பு அமைச்சு அறிவித்துள்ளது.

வவுனியாவிலுள்ள பரீட்சை மத்திய நிலையத்திலேயே அவர்கள் பரீசைக்கு தோற்றவிருப்பதாகவும் அவர்களில் 230 பேரும் கலை பிரிவிலும் வர்த்தக பிரிவில் ஏழு பேரும், உயிரியல் விஞ்ஞான, கணிதப்பிரிவுகளில் தலா 12 பேரும் இம்முறை பரீட்சைக்கு தோற்றவிருக்கின்றனர்.

இதேவேளை கடந்த முறை பரீட்சையில் 371 பேர் தோற்றியதுடன் அதில் 222 பேர் சித்தியடைந்துள்ளமை குறிப்பிடத்தக்கதாகும் என்று புனர்வாழ்வு மற்றும் சிறைச்சாலைகள் மறுசீரமைப்பு அமைச்சு அறிவித்துள்ளது.

நல்ல தகவல் நன்றி