மர்ம மனிதர்கள் என சந்தேகிக்கப்படும் இருவர் மீது தாக்குதல்: இருவரும் பலி _

by **ஷஹி** Fri 12 Aug 2011 - 8:28

அப்புத்தளை, தொட்டுலாகலை தோட்டத்தில் நடமாடிய மர்ம மனிதர்கள் என சந்தேகிக்கப்படும் இருவர் மீது தோட்ட மக்கள் தாக்குதல் நடத்தியதில் இருவரும் படுகாயமடைந்து உயிரிழந்துள்ளனர். இந்தச் சம்பவம் நேற்றுக்காலை 9.40 மணியளவில் இடம் பெற்றுள்ளது.

இந்தச் சம்பவத்தை அடுத்து அப்புத்தளை பகுதியில் பெரும் பதற்றம் ஏற்பட்டுள்ளது. அப்புத்தளை நகரில் கடைகள் மூடப்பட்டதுடன், பொலிஸ் பாதுகாப்பும் போடப்பட்டுள்ளதாக தெரிவிக்கப்படுகின்றது.

தொட்டுலாகல தோட்டத்தில் நேற்றுக்காலை பெண்கள் தேயிலைத் தோட்டங்களில் கொழுந்து பறித்துக்கொண்டிருந்த போது மரத்திலிருந்து இரண்டு மர்ம மனிதர்கள் பெண்களுக்கு அருகில் பாய்ந்துள்ளனர். இதனையடுத்து பெண்கள் பதறியடித்து கூக்குரல் எழுப்பியுள்ளனர். இதனால், அப்பகுதியில் ஒன்று கூடிய தோட்ட மக்கள் இருவரையும் மடக்கிப் பிடித்து நையப்புடைத்துள்ளனர். இதனால் படுகாயமடைந்த இருவரும் வைத்தியசாலைக்கு எடுத்துச் செல்லப்பட்டுள்ளனர். இருந்த போதிலும் அவர்கள் இருவரும் உயிரிழந்தனர்.

மர்ம மனிதர்கள் இருவரும் தோட்டத்திற்குள் புகுந்து பெண்களை தாக்குவதற்கு முற்பட்டபோதே அவர்களைப் பிடித்து தாக்குதல் நடத்தியதாக தோட்ட மக்கள் தரப்பில் தெரிவிக்கப்படுகின்றது.

தோட்டத்திற்குள் 6 மர்ம மனிதர்கள் புகுந்ததாகவும் தாக்குதலை அடுத்து ஏனையவர்கள் தப்பிச் சென்று விட்டதாகவும் தோட்ட மக்கள் தெரிவிக்கின்றனர். ஆனாலும் தேவையொன்றின் நிமித்தம் தோட்ட வழியாக சென்ற கிராமவாசிகளே தாக்குதலுக்கு இலக்காகியிருப்பதாகவும் தாக்குதல் மேற்கொண்டவர்களை கைது செய்ய நடவடிக்கை எடுக்கப்பட்டிருப்பதாகவும் பொலிஸார் தெரிவிக்கின்றனர்.

தோட்ட மக்களின் தாக்குதலுக்கு இலக்காகி உயிரிழந்த இருவரது சடலங்களையும் வைத்தியசாலையிலிருந்து எடுத்துச் செல்ல வந்தவர்கள் மீதும் இனந்தெரியாத குழுவொன்று கற்களை வீசி தாக்குதல் நடத்தியுள்ளது. இதனையடுத்து சம்பவ இடத்திற்கு அதிரடிப்படையினரும் பொலிஸாரும் விரைந்து வந்து நிலைமையை கட்டுப்பாட்டின் கீழ் கொண்டு வந்துள்ளனர்.

தாக்குதலில் இரு பெரும்பான்மை இனத்தவர்கள் பலியானதையடுத்து அப்புத்தளைப்பகுதியில் பெரும் பதற்றம் நிலவி வருகின்றது. அப்புத்தளை, சேர்வூட், பிட்ரத்மலை, தம்பேத்தனை, உட்பட 10க்கும் மேற்பட்ட தோட்டங்களில் பெரும் பதற்றம் நிலவிவருவதுடன் இயல்பு வாழ்க்கையும் பாதிக்கப்பட்டுள்ளது.

இதேவேளையில் தாக்குதலில் பலியானவர்கள் கொண்டு வந்ததாக கூறப்படும் சிறிய கத்திகளும் முகம் மூடுவதற்கான தலைக் கவசத்தின் ஒரு பகுதியும் மீட்கப்பட்டுள்ளன. சம்பவத்தை அடுத்து தொட்டுலாகலைத் தோட்டத்தில் பெருந்தொகையான மக்கள் கூட்டம் கூட்டமாக கூடி நின்றனர். தாக்குதலை அடுத்து ஏற்பட்டிருக்கும் பதற்றம் , பீதியைத் தணித்து பூரண அமைதியையும் இயல்பு நிலையையும் ஏற்படுத்தும் வகையில “ ஊவா மாகாண அமைச்சர் செந்தில் தொண்டமான் மாகாண பிரதிப் பொலிஸ் மா அதிபர் உள்ளிட்ட பொலிஸ் அதிகாரிகளுடன் பேச்சுவார்த்தை மேற்கொண்டு பாதுகாப்பை பலப்படுத்துமாறு கேட்டுள்ளார்.

இதனையடுத்து பதுளை, மாவட்டத்தின் பெருந்தோட்டப்பகுதிகள் மற்றும் தமிழ் மக்கள் வாழ்ந்து வரும் பகுதிகளில் பாதுகாப்பு பலப்படுத்தப்பட்டுள்ளதுடன் நடமாடும் பொலிஸ் சேவையும் இடம் பெற்று வருகின்றது. இவ்விடயம் குறித்து அமைச்சர் ஆறுமுகன் தொண்டமானுக்கும் அறிவிக்கப்பட்டுள்ளது. பதுளையில் தமிழ் மக்கள் வாழும் பகுதிகளில் பாதுகாப்பினை பலப்படுத்தும் வகையில் நடவடிக்கைகளை மேற்கொள்ளுமாறு பொலிஸ் மா அதிபரிடம் அமைச்சர் தொண்டமான் கோரியுள்ளதாக தெரிவிக்கப்படுகின்றது.