ஜனாதிபதிக்கு இரத்தம் தேவையானால் 20 இலட்சம் பெண்கள் வரிசையில் நின்று வழங்குவர்: பௌசி _

by **முனாஸ் சுலைமான்** Mon 15 Aug 2011 - 17:06

ஜனாதிபதிக்கு இரண்டாயிரம் பெண்களின் மார்பிலிருந்து இரத்தம் தேவையாக இருந்தால் கிறீஸ் மனிதர்களை வைத்து எடுக்கவேண்டிய அவசியமில்லை. 20 இலட்சம் பெண்களே நேரடியாக வந்து கியூவில் நின்று ஜனாதிபதிக்கு அந்த இரத்தத்தினைக் கொடுப்பார்கள் என்று அமைச்சர் ஏ.எச்.எம். பௌசி கூறினார்.

பொத்துவில் பிரதேசத்தில் ராணுவத்தினரின் துப்பாக்கிச் சூட்டில் பலியான அலியார் முஹம்மது மஹ்ஜூனின் ஜனாஸா நல்லடக்கத்தில் சனிக்கிழமையன்று கலந்து கொண்ட பின்னர் பொத்துவில் பெரிய ஜூம் ஆ பள்ளிவாசலில் இடம்பெற்ற கூட்டமொன்றில் கலந்து கொண்டு பொதுமக்கள் மத்தியில் அமைச்சர் உரையாற்றினார்.

இதன்போது, ஜனாதிபதி தொடர்ச்சியாக ஆட்சியில் இருப்பதற்காக இரண்டாயிரம் பெண்களின் மார்பிலிருந்து ரத்தம் பெற்று மாந்திரீகம் மேற்கொள்ள வேண்டியிருப்பதாகவும், அதற்காகவே கிறீஸ் மனிதர்கள் வந்துள்ளதாகவும் கூறப்பட்டு வரும் கதை குறித்து கருத்துத் தெரிவித்துப் பேசும் போதே மேற்கண்ட விடயத்தை அமைச்சர் பௌசி கூறினார்.

அவர் அங்கு தொடர்ந்து பேசுகையில், ஜனாதிபதி தொடர்பில் கூறப்படும் மேற்படி கதைகள் வெறும் வதந்திகளாகும். ஜனாதிபதி மற்றும் அரசாங்கம் மீது விரோதமுள்ளவர்களே இவ்வாறான கதைகளை உருவாக்கி விட்டுள்ளனர். இது ஒரு வகையான சூழ்ச்சியாகும். இந்த சூழ்ச்சியினை மக்கள் நம்பிவிடக் கூடாது.

நாம் நிம்மதியாக வாழ வேண்டும். 30 வருடங்களாகக் கஷ்டப்பட்டு விட்டோம். இப்போது நிம்மதியான சூழ்நிலை உருவாகியுள்ளது. அதை அனுபவிக்காமல் நாம் பிரச்சினைகளில் மாட்டிக் கொள்ளக் கூடாது.

பொத்துவிலில் இடம்பெற்ற சகோதரர் மஹ்ஜூனின் மரணம் கல்லடிபட்டுத்தான் நிகழ்ந்ததாக இராணுவ அதிகாரியொருவர் என்னிடம் கூறினார். இது நம்பும் படியாகவா உள்ளது. சகோதரர் மஹ்ஜூனின் மரணம் தொடர்பில் கிழக்கு மாகாண சபை உறுப்பினர் எம்.ஏ. அப்துல் மஜீத் சாட்சியாக உள்ளார். அவரின் சாட்சியத்தை பொலிஸாரிடமும் தெரிவித்துள்ளார்.

எனவே, இது குறித்து கவலைப்பட வேண்டாம். மஹ்ஜூனின் மரணத்தில் யார் சம்பந்தப்பட்டிருந்தாலும் நிச்சயம் தண்டிக்கப்படுவார். அதேவேளை, பாதிக்கப்பட்ட குடும்பத்திற்குத் தேவையான சகல உதவிகளையும் செய்து கொடுக்குமாறு ஜனாதிபதி உத்தரவிட்டுள்ளார்.

ஜனாதிபதிக்கும் அரசாங்கத்துக்கும் எதிராக உள்நாட்டில் மட்டுமன்றி வெளிநாடுகளிலும் சூழ்ச்சிகள் மேற்கொள்ளப்படுகின்றன. அந்த சூழ்ச்சியில் மக்களும் பயன்படுத்தப்படுகின்றார்கள். எனவே, இதில் நீங்கள் மாட்டி விடாதீர்கள்.

பொதுமக்களாகிய உங்களுக்கு ஏதாவது பிரச்சினைகள் இருந்தால் எம்மிடம் பேசுங்கள். எங்களால் செய்ய முடிந்த அனைத்தையும் நாம் செய்து தருவோம் என்றார்.