இலங்கை அணி அபார வெற்றி

by **நண்பன்** Thu Aug 18, 2011 8:49 am

இலங்கை அணி அபார வெற்றி
லசித் மாலிங்கவின் அபார பந்து வீச்சு மற்றும் தரங்கவின் சதம் என்பவற்றின் உதவியுடன் இலங்கை அணி 78 ஓட்டங்களால் அவுஸ்திரேலிய அணியைத் தோற்கடித்தது. இதேவேளை இப்போட்டியைக் கண்டுகளிப்பதற்கு ஜனாதிபதி மஹிந்த ராஜபக்ஷ, மாலைதீவு ஜனாதிபதி முகம்மட் நசீட் ஆகியோர் மைதானத்திற்கு சென்றிருந்தமை குறிப்பிடத்தக்கது.

சதமடித்த உப்புல் தரங்க

அவுஸ்திரேலிய கிரிக்கெட் அணி இலங்கையில் சுற்றுப் பயணம் செய்து விளையாடி வருகிறது. இரு அணிகளுக்கு இடையிலான 5 போட்டி கொண்ட ஒரு நாள் தொடரில் முதல் இரு ஆட்டங்களில் அவுஸ்திரேலியா வெற்றி பெற்றிருந்தது.

இந்த நிலையில் 3 வது ஒரு நாள் போட்டி ஹம்பாந்தோட்டையில் நேற்று முன்தினம் நடந்தது. வாழ்வா - சாவா? நிலையுடன் முதலில் துடுப்பெடுத்தாட தொடங்கிய இலங்கை அணிக்கு தலைவர் டில்ஷானும், தரங்கவும் வலுவான தொடக்கம் அமைத்துக் கொடுத்தனர். இந்த ஜோடியை பிரிக்க அவுஸ்திரேலிய தலைவர் மைக்கேல் கிளார்க் 7 பந்து வீச்சாளர்களை பயன்படுத்தினாலும், அவர்களின் முயற்சிக்கு நீண்ட நேரம் பலன் கிடைக்கவில்லை.

இவர்கள் முதல் விக்கெட்டுக்கு 139 ஓட்டங்கள் சேர்த்தனர். டில்ஷான் 55 ஓட்டங்களில் ஆட்டம் இழந்தார். தொடர்ந்து அபாரமாக ஆடிய தரங்க தனது 12 வது சதத்தைப் பூர்த்தி செய்தார். இந்த ஆண்டில் இது அவரது 4 வது சதமாகும். இதன் மூலம் 2011 ஆம் ஆண்டில் அதிக சதம் அடித்தவர் என்ற பெருமையை அவர் பெற்றார். அத்துடன் ஒரு நாள் போட்டியில் 4 ஆயிரம் ஓட்டங்களை (124 ஆட்டங்கள்) வேகமாக கடந்த இலங்கை வீரர் என்ற சிறப்பும் இந்த ஆட்டத்தின்போது அவருக்கு கிடைத்தது.

அவரது சதத்தின் துணையுடன் இலங்கை அணி 9 விக்கெட் இழப்புக்கு 286 ஓட்டங்கள் குவித்தது. தரங்க 111 ஓட்டங்களும் (139 பந்து 12 பவுண்டரி), சங்கக்கார 49 ஓட்டங்களும், மஹேல ஜெயவர்த்தன 36 ஓட்டங்களும் சேகரித்தனர். அவுஸ்திரேலிய தரப்பில் போலிஞ்சர் 4 விக்கெட்டுகளும், ஜோன்சன், வாட்சன் தலா 2 விக்கெட்டுகளும் கைப்பற்றினர்.

அடுத்து ஆடிய அவுஸ்திரேலிய அணி இலங்கையின் பந்து வீச்சை தாக்குப்பிடிக்க முடியாமல் 44.2 ஓவர்களில் 208 ஓட்டங்களுக்கு சுருண்டது. இதன் மூலம் இலங்கை அணி 78 ஓட்டங்கள் வித்தியாசத்தில் வெற்றி பெற்றது. அந்த அணியில் மைக் ஹஸ்ஸி (63), தலைவர் மைக்கேல் கிளார்க் (46), ரிக்கி பொண்டிங் (22) தவிர மற்றவர்கள் சொற்ப ஓட்டங்களில் ஆட்டம் இழந்தனர். பந்து வீச்சில் மிரட்டிய வேகப்பந்து வீச்சாளர் மலிங்க 28 ஓட்டங்களே விட்டுக்கொடுத்து 5 விக்கெட்டுகளை சாய்த்தார்.

இந்த வெற்றியையடுத்து இலங்கை அணி தொடரில் 1 – 2 என்ற கண்கில் பின்தங்கியுள்ளது. இரு அணிகளுக்கு இடையிலான 4 வது ஒரு நாள் போட்டி 20 ஆம் திகதி கொழும்பில் நடக்கிறது.