கடைசி டெஸ்டிலும் இந்தியா தடுமாற்றம்

கடைசி டெஸ்டிலும் இந்தியா தடுமாற்றம்
இங்கிலாந்துடனான 4 ஆவதும் கடைசியுமான டெஸ்ட் போட்டியிலும் இந்திய அணி ஸ்திரமான நிலையை எட்ட தடுமாறி வருகிறது. லண்டன், கென்னிங்டன் ஓவல் மைதானத்தில் கடந்த வெள்ளிக்கிழமை ஆரம்பமான போட்டியில் நாணய சுழற்சியில் வென்று முதலில் துடுப்பெடுத்தாடிய இங்கிலாந்து அணி அபாரமாக செயல்பட்டு 153 ஓவர்களில் 6 விக்கெட்டுக்களை இழந்து 591 ஓட்டங்களை பெற்று தனது முதல் இன்னிங்ஸை நிறுத்திக் கொண்டது.

இதில் கெவின் பீட்டர்ஸன் 175 ஓட்டங்களை பெற்றதோடு இயன்பெல் இரட்டைச் சதம் எட்டினார். இதன் போது இருவரும் இணைந்து 3 ஆவது விக்கெட்டுக்காக 350 ஓட்டங்களை இணைப்பாட்டமாக பெற்றனர்.

அபாரமாக ஆடிய பெல் 364 பந்துகளுக்கு 23 பெளண்டரிகளும் 2 சிக்ஸர்களும் அடங்கலாக 235 ஓட்டங்களை பெற்றார். இந்த இரட்டைச் சதத்தின் மூலம் உலகில் அதிக இரட்டைச் சதம் பெற்ற மைதானமாக ஓவல் பதிவானது. இங்கு இதுவரை 18 இரட்டைச் சதங்கள் பெறப்பட்டுள்ளன. முன்னதாக அவுஸ்திரேலியாவின் அடிலைட் மைதானம் முதலிடத்தில் இருந்தது.

அத்துடன் கடந்த இரண்டு ஆண்டுகளுக்கு இங்கிலாந்து 7 இரட்டைச் சதங்களை பெற்றுள்ளது. ஆனால் 1990 முதல் 2009 வரையான காலத்தில் அந்த அணி 8 இரட்டைச் சதங்களையே பெற்றமை குறிப்பிடத்தக்கது.

இந்நிலையில் ஆட்டத்தின் மூன்றாவது நாளான நேற்று முன்தினம் தனது முதல் இன்னிங்ஸை ஆரம்பித்த இந்திய அணி மளமளவென்று விக்கெட்டை தாரை வார்த்தது. இதன்படி மூன்றாவது நாள் ஆட்ட நேர முடிவின் போது இந்திய அணி 33 ஓவர்களில் 103 ஓட்டங்களுக்கு 5 விக்கெட்டுகளை இழந்து தடுமாறியது.

டிராவிட் 57 ஓட்டங்களுடனும் தோனி 5 ஓட்டங்களுடனும் களத்தில் இருந்தனர்.

ஏற்கனவே இந்திய அணி இரு அணிகளுக்கும் இடையிலான டெஸ்ட் தொடரில் 3 - 0 என்ற கணக்கில் பின் தங்கியுள்ளமை குறிப்பிடத்தக்கது.

:’|: இல்லை (*(: எது உங்களுக்கு ஓகே ?