இஸ்ரேல் மன்னிப்பு கோரினால் மாத்திரம் போதாது எகிப்து அரசு அறிவிப்பு

by **நண்பன்** Mon Aug 22, 2011 8:44 am

5 பொலிஸார் சுட்டுக் கொலை;
இஸ்ரேல் மன்னிப்பு கோரினால் மாத்திரம் போதாது
எகிப்து அரசு அறிவிப்பு
இஸ்ரேல் இராணுவத்தால் எகிப்து பொலிஸார் ஐவர் சுட்டுக் கொல்லப்பட்டதற்கு அந்த நாடு மன்னிப்பு கோரினால் மாத்திரம் போதாது என எகிப்து அரசு அறிவித்துள்ளது.

இஸ்ரேல் மற்றும் எகிப்து நாட்டு இடையே சினாய் என்ற இடத்தில் பஸ்ஸில் சென்று கொண்டிருந்த எகிப்து பொலிஸ் வீரர்கள் மீது இஸ்ரேல் படையினர் துப்பாக்கிச் சூடு நடத்தினர். இச் சம்பவத்தில் எகிப்து தரப்பில் 5 பொலிஸார் பலியாயினர். நடைபெற்ற சம்பவத்திற்கு இஸ்ரேல் பொறுப்பேற்று மன்னிப்பு கோரியது. அதேசமயம் எகிப்து நாட்டில் இச் சம்பவம் பெரும் பரபரப்பை ஏற்படுத்தியுள்ளது. இஸ்ரேல் உடனான உறவை மறுபரிசீலனை செய்ய வேண்டுமென கோரிக்கை விடுக்கப்பட்டுள்ளது. அதேபோல் சினாய் எல்லைப் பகுதியில் பாதுகாப்பை அதிகரிக்கும்படியும் கோரிக்கை எழுந்துள்ளது.

இதனைத் தொடர்ந்து எகிப்து அரசு இஸ்ரேலுக்கான அந்நாட்டு தூதுவரை திருப்பி அழைத்துக் கொண்டது. இந் நிலையில் மேற்படி சம்பவத்திற்கு இஸ்ரேல் அரசு எகிப்திடம் மன்னிப்புக் கோரியது.

எனினும் இச் சம்பவத்திற்கு மன்னிப்பு கேட்டால் மாத்திரம் போதாது என எகிப்து குறிப்பிட்டுள்ளது. இது குறித்து எகிப்து அரசு குறிப்பிட்டுள்ளதாவது, “இச் சம்பவம் குறித்து இஸ்ரேலின் அறிவிப்பு சாதகமாகவே உள்ளது. எனினும் இந்த அறிவிப்பு மாத்திரம் போதாது. இச் சம்பவம் குறித்து இஸ்ரேல் அரசு விசாரணை நடத்த வேண்டும்.

எகிப்து அரசு இஸ்ரேலுடன் தொடர்ச்சியாக நல்லுறவுவை பேணி சமாதானத்தை காத்து வருகிறது. இஸ்ரேலும் இந்த விடயத்தில் அக்கறை காட்ட வேண்டும் என அந்த அறிக்கையில் கூறப்பட்டுள்ளது.

இதேவேளை, ஆயிரக்கணக்கான மக்கள் எகிப்தில் உள்ள இஸ்ரேல் தூதரகம் முன்பாக கூடி 2 ஆவது நாளாக நேற்றும் போராட்டம் நடத்தினர். போராட்டக்காரர்களில் ஒருவர் தூதரக கட்டித்தின் மீது ஏறி இஸ்ரேல் தேசிய கொடியை அவிழ்த்து எறிந்தார்.