திருவனந்தபுரம் பத்மநாபசாமி கோவில் இரகசிய அறையில் இருந்து கடலுக்கு சுரங்கப்பாதையா?

திருவனந்தபுரம் பத்மநாபசாமி கோவில் இரகசிய அறையில் இருந்து கடலுக்கு சுரங்கப்பாதையா?
திருவனந்தபுரத்தில் உள்ள பிரசித்தி பெற்ற பத்மநாபசாமி கோவிலில் உள்ள 6 ரகசிய அறைகளை திறந்து அங்கிருக்கும் நகை மற்றும் பொருட்களை மதிப்பீடு செய்து அறிக்கை அளிக்க உச்ச நீதிமன்றம் ஒரு குழுவை நியமித்து உத்தரவிட்டது. இக்குழுவினர் கோவிலின் 5 அறைகளை திறந்து ஆய்வு செய்ததில் மட்டும் பல லட்சம் கோடி மதிப்பிலான நகைகள் இருந்ததை கண்டனர்.

அடுத்து அறாவது அறையை திறக்க முயன்றபோது அதற்கு கோவிலை நிர்வகிக்கும் மன்னர் குடும்பத்தினர் எதிர்ப்பு தெரிவித்தனர்.

அறையை திறக்கும் முன்பு தேவபிரசன்னம் பார்க்க வேண்டும் என்று கூறிய அவர்கள் 4 நாட்கள் கோவிலில் ஜோதிடர்களை கொண்டு தேவபிரசன்னம் பார்த்தனர். இதில் 6வது அறையை திறக்கக்கூடாது என்று ஜோதிடர்கள் தெரிவித்தனர்.

ஆனால் உச்சநீதிமன்றம் நியமித்த குழுவினர் நீதிமன்ற உத்தரவுபடி அறையை திறக்கவும், அதில் இருக்கும் பொருட்களை மதிப்பீடு செய்யும் பணியும் நடைபெறும் என்று கூறினர். இதையடுத்து மன்னர் குடும்பத்தினர் அறையை திறக்க தடைவிதிக்க வேண்டும் என்று உச்ச நீதிமன்றில் ஒரு புதிய மனு தாக்கல் செய்துள்ளனர்.

அந்த மனு விரைவில் விசாரணைக்கு வர இருக்கிறது. இதற்கிடையே கோவிலில் இருந்து கடலுக்கு ஒரு சுரங்கப்பாதை இருப்பதாக பக்தர்கள் மத்தியில் ஒரு தகவல் பேசப்பட்டு வந்தது. தற்போது இந்த சுரங்கப்பாதை திறக்கப்படாத 6வது அறையில் இருந்து தொடங்குவதாகவும் எனவே அந்த அறையை திறக்கக்கூடாது என்றும் சிலர் பேசி வருகிறார்கள்.

இது உச்சநீதிமன்றம் அமைத்த குழுவினருக்கு பிரச்சினையை ஏற்படுத்தி உள்ளது. எனவே இந்த சந்தேகத்தை நிவர்த்தி செய்ய கேரள அரசு ஐதராபத்தில் உள்ள தேசிய நில ஆய்வியல் மையத்தினை தொடர்பு கொண்டு கருத்து கேட்டனர். அவர்கள் நவீன கருவிகள் மற்றும் ரேடார் மூலம் கோவிலுக்கும், கடலுக்கும் இடையே சுரங்கப்பாதை இருக்கிறதா? என்பதை கண்டுபிடித்து விடலாம் என்று கூறினர்.

இதையடுத்து அந்த ஆய்வை மேற்கொள்ளும்படி ஐதராபாத் தேசிய நில ஆய்வியல் மைத்துக்கு கேரள அரசு கோரிக்கை விடுத்துள்ளது. விரைவில் இம்மையத்தின் அதிகாரிகள் கேரளா சென்று கோவிலில் இருந்து கடலுக்கு சுரங்கப்பாதை இருக்கிறதா? என்ற ஆய் வை நடத்துவார்கள் என்று தெரிகிறது.

:+:-: