தேர்தலில் தோற்றாலும் மக்கள் மன்றத்தில் தி.மு.க. வெற்றி பெற்று இருக்கிறது: மு.க.ஸ்டாலின் பேச்சு

தஞ்சை,ஆக.22-


தஞ்சை திலகர் திடலில்
தி.மு.க. பொதுக்கூட்டம் நேற்று இரவு நடந்தது. கூட்டத்திற்கு முன்னாள்
அமைச்சர் கோ.சி.மணி தலைமை தாங்கினார். கூட்டத்தில் தி.மு.க. பொருளாளரும்,
முன்னாள் துணை முதல்-அமைச்சருமான மு.க.ஸ்டாலின் கலந்து கொண்டு பேசினார்.

அவர் கூறியதாவது:-

சமச்சீர்
கல்வியில் நமக்கு கிடைத்த வெற்றியை தமிழகம் முழுவதும் விழாவாக நடத்தி
இருக்கிறோம். சமச்சீர் கல்வியில் மிகப்பெரிய வெற்றியை பெற்று இருக்கிறோம்.
இந்த வெற்றி தனிப்பட்ட தி.மு.க.விற்கு கிடைத்த வெற்றி என்று சொல்வதைவிட
ஒட்டுமொத்த தமிழக மக்களுக்கு கிடைத்த வெற்றி என்று உணர்ந்து கொண்டாட
வேண்டும்.

2006-ம் ஆண்டு ஆட்சிமாற்றம்
ஏற்பட்டவுடன், ஒரே இடத்தில் எல்லா வசதிகளுடன் தலைமை செயலகம் அமைய வேண்டும்
என்று ஓமந்தூரார் அரசினர் தோட்டத்தில் இடம் தேர்வு செய்யப்பட்டு முதல்
பிளாக்கில் அனைத்து பணிகளும் முடிக்கப்பட்டன.

2-வது
பிளாக்கில் 60 சதவீத பணிகள் நடந்து முடிந்த நேரத்தில் தேர்தல் வந்தது.
ஆட்சிமாற்றம் ஏற்பட்டது. ஜெயலலிதா முதல்-அமைச்சர் பொறுப்புக்கு வந்தவுடன்
என்ன காரணத்தினாலோ புதிய தலைமை செயலகத்தை இழுத்து பூட்டினார்.

இது
முறையாக கட்டப்படவில்லை என்று ஓய்வு பெற்ற நீதிபதி தங்கராஜ் தலைமையில்
விசாரணை கமிஷன் அமைக்கப்பட்டது. இந்த கமிஷனின் தலைமையை ஏற்றுக்
கொள்ளமாட்டோம் என்று நீதிமன்றத்திற்கு சென்று இருக்கிறோம்.

தலைமை
செயலகத்தை வேறு பணிக்கு பயன்படுத்தி இருக்கலாம் என்று நீதிமன்றம் கேள்வி
கேட்டுவிடக்கூடாது என்ற அச்சத்தில் தான் மருத்துவமனைக்கு பயன்படுத்துவோம்
என்று அறிவித்து இருக்கின்றனர். புதிய தலைமை செயலகம் முறையாக
கட்டப்படவில்லை என்று அதை விசாரிக்க கமிஷன் அமைக்கப்பட்டுள்ள நிலையில் அந்த
கட்டிடத்தை அதாவது முறையாக கட்டப்படாத கட்டிடத்தை எப்படி மருத்துவமனைக்கு
பயன்படுத்தலாம் என்பது தான் எங்கள் கேள்வி.

மருத்துவமனைக்கு என்றவுடன் அந்த கட்டிடம் தரமாக இருக்கிறதா? ஜெயலலிதாவின் அறிவிப்பு நீதிமன்றத்தை ஏமாற்றும் நாடகம்.

கழகத்தை
அழிக்க வேண்டும் எத்தனையோ முயற்சிகள் நடக்கிறது. கழக தோழர்கள், முன்னாள்
அமைச்சர்கள், மாவட்ட செயலாளர்கள் மீது எத்தனையோ வழக்குகள். ஆட்சியில்
இருந்தபோது 5 ஆண்டுகள் மாநிலம் முழுவதும் நலத்திட்ட உதவிகள் வழங்க
சென்றேன். இப்போது சிறையில் இருக்கும் தோழர்களை பார்க்க மாநிலம் முழுவதும்
சென்று வருகிறேன்.

தேர்தலில் தோற்று இருக்கின்ற
கூட்டமா? இது. தேர்தலில் வெற்றி பெற்றவர்கள் சோகமாக இருக்கிறார்கள். நாம்
மகிழ்ச்சியுடன் கூட்டம் நடத்தி வருகிறோம். தோல்விகளை கண்டு துவண்டுவிடும்
கூட்டம் அல்ல இது.

தி.மு.க.வினருக்கு எதிராக
கட்டாயப்படுத்தி, மிரட்டி பொய்புகார் வாங்கப்படுகிறது. பொய்வழக்கு
பதிவோர், பொய்புகார் கொடுப்போர் மீது ஆட்சி மாற்றம் வந்தால்தான் தண்டிக்க
வேண்டும் என்பது அல்ல. பொய்வழக்கு யார் பதிவு செய்கிறார்களோ அவர்கள் மீது
உயர்நீதிமன்றம், உச்சநீதிமன்றத்தில் வழக்கு தொடர இருக்கிறோம். அங்கு
அவர்கள் பதில்சொல்லியே தீர வேண்டும்.

இவ்வாறு அவர் கூறினார்.
மாலை மலர்

கீழே விழுந்தாலும் மீசையில் மண் ஒட்டவில்லை என்ற பேச்சு இது .....திமுக வுக்கு இது கைவந்த கலை