உலகில் நாடற்றோராக 12 மில். பேர் நிர்க்கதி

உலகில் நாடற்றோராக
12 மில். பேர் நிர்க்கதி



அடிப்படை மனித உரிமை கூட இல்லாமல் இருப்பதாக ஐ. நா. தகவல்

உலகில் எந்த நாட்டினதும் பிரஜா உரிமை இல்லாத நாடற்றவர்களாக 12 மில்லியன் பேரளவில்
வாழ்ந்து வருவதாகவும் அவர்கள் அடிப்படை மனித உரிமைகள் மறுக்கப்பட்டவர்களாக உள்ளனர்
எனவும் ஐ. நா. அகதிகளுக்கான ஆணைக்குழு குறிப்பிட்டுள்ளது.
இவ்வாறான நாடற்றவர்களுக்கு பிறக்கும் குழந்தைகள் குறித்து ஐ. நா. கவலை
வெளியிட்டுள்ளது. இந்த விடயம் குறித்து சர்வதேச நாடுகள் அக்கறை காட்ட வேண்டும் என
அது கேட்டுக்கொண்டுள்ளது.
தென் கிழக்காசியா, மத்திய ஆசியா, கிழக்கு ஐரோப்பா, மத்திய கிழக்கு மற்றும் ஆபிரிக்க
பிராந்தியங்களில் இவ்வாறான பெரும்பாலான நாடற்றோர் வாழ்ந்து வருவதாகத்
தெரிவிக்கப்பட்டுள்ளது.
“தலைமுறை தலைமுறையாக இவர்கள் துன்பங்களை அனுபவித்து வருகின்றனர். இவர்களுக்கு உதவி
தேவைப்படுகின்றது. இவர்கள் சட்டவிரோதமாகவே உலகில் வாழ்ந்து வருகின்றனர்” என
நாடற்றோர் குறித்து அகதிகளுக்கான ஐ. நா. உயர் ஆணையர் அன்டோனியே குட்ரஸ் தெரிவித்தார்.
எந்த நாட்டிலும் பிரஜா உரிமை இல்லாமல் வாழ்பவர்கள் சர்வதேச அளவில் பல சிக்கல்களைத்
தொடர்ந்தும் எதிர்நோக்கி வருகின்றனர். குறிப்பாக சொத்துக்களை வைத்திருப்பது, வங்கிக்
கணக்குகளை ஆரம்பிப்பது, திருமணத்தின் சட்ட ரீதியான தன்மை மற்றும் குழந்தை பிறப்பு
போன்ற விடயங்களில் பிரச்சினையை எதிர்நோக்கி வருகின்றனர்.
இதேபோன்று தம்மைப் பற்றி அடையாளம் காட்ட முடியாத நிலையில் நாடற்றோர் சிலர் பல காலம்
சிறைத்தண்டனையையும் அனுபவித்து வருகின்றனர்.
உலகில் நாடற்றோர்களுக்கான உரிமை வழங்கும் 1954 ஆம் ஆண்டு ஒப்பந்தத்தில் 66 நாடுகளே
இதுவரை கைச்சாத்திட்டுள்ளன. அதேபோன்று நாடற்றோர்களுக்கு பிரஜா உரிமை வழங்குவது
குறித்து 38 நாடுகள் மாத்திரமே இணக்கம் தெரிவித்துள்ளன.
அந்த ஒப்பந்தத்திற்கு 50ஆண்டுகள் எட்டும் நிலையில் இதில் கைச்சாத்திட் டுள்ள நாடுகள்
மிகக் குறைவாகவே உள்ளது என குறிப்பிட்டுள்ள அகதிகளுக்கான ஐ. நா. உயர் ஆணையர்
அன்டோனியோ குட்ரஸ், மில்லியன் கணக்கான மக்கள் அடிப்படை மனித உரிமை கூட இல்லாமல்
இருக்கும் நிலையில் பல நாடுகளும் பாராமுகமாக இருப்பது வெட்கத்திற்குரியது என
தெரிவித்தார்.

எனினும் அண்மைக்காலத்தில் குரேஷியா, பனாமா, பிலிப்பைன்ஸ் மற்றும்
துர்க்மெனிஸ்தான் போன்ற நாடுகள் இந்த ஒப்பந்தத்தில் கைச்சாத்திட்டுள்ளமை
வரவேற்கத்தக்கது என்றும் அன்டோனியோ குட்ரஸ் குறிப்பிட்டார்.
பல காரணங்களால் இவ்வாறான நாடற்றோர் உருவாவதாகக் குறிப்பிடப்பட்டுள்ளது. புதிய
நாடுகள் உருவாகும் போது பிரஜா உரிமை அற்றவர்கள் உருவாகியுள்ளனர். குறிப்பாக சோவியட்
யூனியன் உடைந்த போது இவ்வாறான நாடற்றோர் உருவாகி யுள்ளனர். அதேபோன்று காலனித்துவ
ஆட்சியில் இருந்துவிடுபடும் போது பலர் இவ்வாறு நிர்க்கதியாக்கப் படுகின்றனர்.
ஆபிரிக்க, ஆசிய நாடுகளில் இவ்வாறானோர் உள்ளனர்.
பர்மாவின் ரொஹின்கியா குழுமத்தினர், தாய்லாந்தின் மலைவாழ் கோத்திரத்தினர்,
ஐரோப்பாவில் உள்ள ஒருசில குழுமத் தினர், மத்திய கிழக்கில் உள்ள பைடு மக்கள் போன்ற
இனக்குழுமங்களும் நாடற்றோராகவே வாழ்ந்து வருகின்றனர்.